Ntirho wa rito ra Xikwembu ni milawu ya xona eka vanhu vo lulama.
1Ku katekile lava tengeke emahanyelweni ya vona,
Lava fambaka enawini wa Yehovha!
2Ku katekile lava hlayisaka ku tsundzuxa ka yena,
Lava n'wi lavaka hi timbilu hinkwato ta vona;
3Lava nga endliki swo homboloka,
Kambe va famba etindleleni ta yena!
4U hi lerisile swiletelo swa wena,
Leswaku swi hlayisiwa hi mafundza,
5Tindlela ta mina a ti tiyisiwe,
Ndzi ta kota ku hlayisa timfanelo ta wena!
6Hi laha ndzi nga tiki va ni tingana,
Loko ndzi anakanya ku lerisa ka wena hinkwako.
7Ndzi ta ku dzunisa hi mbilu leyi lulameke,
Loko ngi ndzi dyondzile ku avanyisa ka wena loko lulama.
8Ndzi rhandza ku hlayisa timfanelo ta wena:
U nga tshuki u ndzi tshikela makumu!
9Jaha ri ta tengisa ku yini ku famba ka yena xana?
Hi loko a ku xaxameta ni rito ra wena.
10Ndzi ku lava hi mbilu ya mina hinkwayo:
U nga ndzi tshiki ndzi hambuka ku lerisa ka wena!
11Ndzi hlayisa rito ra wena embilwini ya mina,
Leswaku ndzi nga ku dyoheli.
12A ku dzunisiwe wena, Yehovha!
Ndzi dyondzise timfanelo ta wena!
13Hi milomu ya mina ndzi vula ku avanyisa hinkwako
Loku humeke enon'wini wa wena.
14Ndzi titsakela endleleni ya mitsundzuxo ya wena,
Kukotisa loko ndzi fuwile swilo hinkwaswo.
15Ndzi rhandza ku anakanya swiletelo swa wena,
Ni ku veka tindlela ta wena emahlweni ka mina.
16Ndzi titsakisa hi timfanelo ta wena,
Kambe a ndzi rivali rito ra wena.
17U endla nandza wa wena swinene,
Ndzi ta hanya ndzi hlayisa rito ra wena!
18Hanyanyisa mahlo ya mina,
Ndzi ta vona mahlori enawini wa wena!
19Ndzi muendzi emisaveni;
U nga ndzi fihleri ku lerisa ka wena!
20Moya wa mina wu hela
Hi ku navela milawu ya wena hi masiku.
21U laya vatikurisi lava rhukaniweke,
Lava hambukaka ku lerisa ka wena.
22Susa eka mina xisandzu ni ku nyenyiwa,
Hikuva ndzi hlayisa ku tsundzuxa ka wena!
23Tihosana ti tshamisa ti kanela makungu ya ku lwa na mina;
Nandza wa wena u ehleketa timfanelo ta wena.
24Switsundzuxo swa wena i ku tsaka ka mina,
Ni vaanakanyisi va mina.
25Moya wa mina wu namarhele entshurini;
Ndzi hanyise hi rito ra wena!
26Ndzi ku tivisile tindlela ta mina, kutani u ndzi twile;
Ndzi dyondzise timfanelo ta wena!
27Ndzi letele ndlela ya swiletelo swa wena,
Ndzi ta anakanya mahlori ya wena.
28Moya wa mina wu rila hi mahlomulo,
Ndzi pfuxe hi rito ra wena!
29U ndzi tingisa ndlela ya vunwa,
U ndzi ha ku tiva nawu wa wena!
30Ndzi tihlawulela ndlela ya vunene,
Ndzi tiyisela ku veka nawu wa wena emahlweni ka mina.
31Ndzi namarhele ku tsundzuxa ka wena;
Oho Yehovha! Ndzi nga khomisiwi tingana!
32Ndzi ta tsutsuma endleleni ya ku lerisa ka wena,
Loko u anamisile mbilu ya mina.
33Yehovha, ndzi dyondzise ndlela ya timfanelo ta wena,
Leswaku ndzi famba ha yona ku yisa makumu!
34Ndzi nyike ku twa swinene, leswaku ndzi ta hlayisa nawu wa wena;
Ndzi endla ha wona hi mbilu ya mina hinkwayo!
35Ndzi fambise hi ndlela ya swileriso swa wena,
Hikuva ndza swi tsakela!
36Kokela mbilu ya mina leswaku yi yingisa ku tsundzuxa ka wena,
Ku nga ri leswaku yi rhandza ku fuwa.
37Fularhisa mahlo ya mina, ma nga languti swahava,
U ndzi hanyisa etindleleni ta wena!
38Tiyisela nandza wa wena rito ra wena
Leri u ri tshembiseke lava ku chavaka!
39Tshineta ekule na mina xisandzu lexi ndzi xi chavaka!
Hikuva ku avanyisa ka wena ku tele vunene.
40Vona, ndzi navela swileriso swa wena.
Ndzi ponise hi ku lulama ka wena!
41Tintswalo ta wena a ti te eka mina, oho Yehovha!
Ni ku hlayiseka ka wena, hi laha u hi tshembiseke hakona!
42Leswaku ndzi tiva ku hlamula la ndzi sandzaka,
Hikuva ndzi tshembile rito ra wena.
43U nga suseli makumu rito ra ntiyiso enon'wini wa mina,
Hikuva ndzi langutile ku avanyisa ka wena.
44Ndzi ta hlayisa nawu wa wena hi masiku,
Hi laha ku nga yiki helo, ni makumu.
45Ndzi ta famba endleleni leyi anameke,
Hikuva ndzi lava swiletelo swa wena.
46Ndzi ta vula switsundzuxo swa wena emahlweni ka tihosi,
Kambe a ndzi nga vi na tingana.
47Ndzi ta titsakisa hi swileriso swa wena,
Ndza swi rhandza.
48Ndzi ta tlakusela ku lerisa ka wena mavoko ya mina, hikuva ndza ku rhandza,
Ndzi engeta ndzi anakanya timfanelo ta wena.
49Tsundzuka rito ra wena leri u nga ri hlayela nandza wa wena,
Leswi u nga ndzi nyika ku tshemba.
50Ku chaveleriwa ka mina emakhombyeni ya mina,
Hi leswaku leswi vuriweke hi wena swi ndzi hanyisile.
51Vatikurisi va ndzi hleka ngopfungopfu,
Hambiswiritano, a ndzi hambukanga enawini wa wena.
52Yehovha, ndzi anakanya ku avanyisa ka wena ka khale!
Kutani ndza chaveleriwa.
53Ndzi khomiwa hi nhlamalo wa vukari
Loko ndzi vona lavo biha va tshika nawu wa wena.
54Timfanelo ta wena ti ndzi humesela tinsimu,
Endlwini ya vuendzi bya mina.
55Nivusiku ndzi anakanya vito ra wena, Yehovha,
Kutani ndzi hlayisa nawu wa wena.
56Lexi ndzi fanelaka,
Hi leswaku ndzi hlayisa swileriso swa wena.
57Ka averiwa ka mina, oho Yehovha!
I ku hlayisa rito ra wena.
58Ndzi lavile mombo wa wena hi mbilu hinkwayo ya mina;
Ndzi tsetselele hi laha u ndzi tshembiseke hakona!
59Ndzi anakanya mahanyelo ya mina,
Kambe ndzi kongometa milenge ya mina eku tsundzuxeni ka wena.
60Ndza hatlisa, a ndzi hlweri
Ku hlayisa swileriso swa wena.
61Marindzi ya lavo biha ma ndzi rhendzele;
Kambe a ndzi rivali nawu wa wena.
62Ndzi pfuka exikarhi ka vusiku, ndzi ku dzunisa,
Hikwalaho ka ku avanyisa ka wena ka ku lulama.
63Ndzi tolovela hinkwavo lava ku chavaka,
Ni lava hlayisaka swileriso swa wena.
64Yehovha, misava a yi tele vunene bya wena;
Ndzi dyondzise timfanelo ta wena!
65Yehovha, u endlela nandza wa wena hi vunene,
Hi laha u n'wi tshembiseke hakona.
66Ndzi dyondzise, ndzi he ku twa lokunene, ni ku twisisa!
Hikuva ndzi pfumerile ku lerisiwa hi wena.
67Loko ndzi nga si tsongahatiwa, a ndzi hambuka ndlela;
Kambe sweswi ndzi hlayisa rito ra wena.
68U nene, wa hanana;
Ndzi dyondzise timfanelo ta wena.
69Vatikurisi va ndzi lumbeta hi vunwa;
Kambe mina ndzi hlayisa swileriso swa wena hi mbilu ya mina hinkwayo.
70Timbilu ta vona ti nonile, a va ha twi;
Kambe mina ndzi titsakisa hi nawu wa wena.
71Swi lulamile eka mina leswi ndzi nga tsongahatiwa,
Leswaku ndzi ta dyondza timfanelo ta wena.
72Nawu lowu humeke enon'wini wa wena
Eka mina wu tlula khume ra madzana ya mitirho ya nsuku ni silivhere.
73Swandla swa wena swi ndzi endlile,
ndzi vumbiwe hi swona;
Ndzi nyike ku twa, ndzi ta dyondza ku lerisa ka wena!
74Lava ku chavaka, loko va ndzi vona va tsaka,
Hikuva ndzi tshembile ku hlayela ka wena.
75Yehovha, ndza tiva leswaku ku avanyisa ka wena ku lulamile,
Ni leswaku wa tshembeka, hambi u ndzi tsongahatile.
76Tintswalo ta wena a ti ve ku chavelela eka mina,
Hi laha u hlayeleke nandza wa wena!
77Ku tsetselela ka wena a ku ndzi tele, ndzi ta hanya!
Hikuva nawu wa wena wa ndzi tsakisa.
78Vatikurisi a va khomiwe hi tingana, hikuva va ndzi xanisa ntsena!
Loko ndzi ri mina, ndzi karhi ndzi tsundzuka swileriso swa wena.
79Lava ku chavaka a va tlhelele eka mina,
Kutani va ta tiva ku tsundzuxa ka wena!
80Mbilu hinkwayo ya mina a yi tinyikete timfanelo ta wena,
Leswaku ndzi nga khomisiwi tingana.
81Moya wa mina wu hela hi ku navela ku hlayiseka ka wena;
Ndzi karhi ndzi langutela ku hlayela ka wena.
82Mahlo ya mina ma hela hi ku langutela ku hlayela ka wena,
Kutani ndzi ri: “U ta ndzi chavelela rini?”
83Hikuva ndzi fana ni nkwama lowu omeke emusini;
A ndzi rivali timfanelo ta wena.
84Xana masiku ya nandza wa wena i mangani-ke?
U ta ndzi lunghisela rini eka vaxanisi va mina?
85Vatikurisi va ndzi celele marindzi;
Va nga lava nga fambiki hi nawu wa wena.
86Ku lerisa ka wena hinkwako hi lokunene;
Va ndzi xanisa ntsena, wa nga ndzi pfuna!
87Va lava ku ndzi lovisa, va ndzi wisela ehansi:
Kambe a ndzi tshiki swileriso swa wena.
88Ndzi hanyise hi tintswalo ta wena,
Hi kona ndzi nga ta hlayisa ku tsundzuxa ka nomu wa wena.
89Oho Yehovha! Rito ra wena ri tshama ematilweni,
Hi laha ku nga heriki.
90Vutshembeki bya wena byi tshama eka vatukulu ni vatukulwana;
U sungurile misava, kutani yi tama ya ha tiyile.
91Ni sweswi, hinkwaswo swa ha tiyile hi milawu ya wena,
Hikuva swilo hinkwaswo swi le hansi ka wena.
92Loko ingi nawu wa wena a wu ndzi tsakisanga,
Ingi ndzi herile emakhombyeni ya mina.
93Ndzi nga ka ndzi nga rivali swileriso swa wena ni siku ni rin'we,
Hikuva u ndzi hanyisile ha swona.
94Ndzi wa wena, ndzi kutsule!
Hikuva ndzi lava swileriso swa wena.
95Lavo biha va ndzi bvutamele ku ndzi lovisa;
Kambe ndzi hlayisa ku lerisa ka wena swinene.
96Ndzi vonile ku hetelela ka swilo hinkwaswo leswi hetisekeke,
Kambe ku lerisa ka wena a ku na laha ku kayivelaka kona.
97Nawu wa wena ndzi wu rhandzisa hakunene!
Ndzi wu anakanya siku hinkwaro.
98Swileriso swa wena swi ndzi tlharihisa ngopfu ku tlula valala va mina,
Hikuva swi na mina hi masiku.
99Ndzi ni ku twisisa loku tlulaka ka lava ndzi letelaka hinkwavo,
Hikuva ku tsundzuxa ka wena i ku anakanya ka mina.
100Ndzi tlula va khale hi ku tiva,
Hikuva ndzi hlayisa swileriso swa wena.
101Ndzi hambuxa nenge wa mina etindleleni hinkwato leto biha,
Leswaku ndzi hlayisa rito ra wena.
102A ndzi hambuki ku lerisa ka wena,
Hikuva hi wena la ndzi dyondzisaka.
103A hi ku nandziha ka marito ya wena emalakeni ya mina,
Ma tlula vulombe enon'wini wa mina!
104Ndzi kuma ku twisisa eku leteleni ka wena,
Hi leswo-ke ndzi vengile tindlela hinkwato ta mavunwa.
105Rito ra wena i rivoningo emilengeni ya mina,
Ni ku vonakala endleleni ya mina.
106Ndzi hlambanyile, ndzi tiyisa, ndzi ku:
Ndzi ta famba hi milawu ya ku lulama ka wena.
107Ndzi ni nhlomulo lowukulu;
Ndzi hanyise, Yehovha, hi laha rito ra wena ri vuleke hakona!
108Oho Yehovha!
Amukela gandzelo leri humaka enon'wini wa mina,
U ndzi dyondzisa milawu ya wena!
109Vutomi bya mina byi vekiwile ku lovisiwa hi masiku,
Kambe a ndzi rivali nawu wa wena.
110Lavo biha va ndzi celela marindzi,
Kambe a ndzi hambuki swiletelo swa wena.
111Ndzi tekile ku lerisa ka wena, ri va rifuwo ra mina, hi masiku,
Hikuva swi tsakise mbilu ya mina.
112Ndzi voyamisile mbilu ya mina, ku ya hi timfanelo ta wena,
Hi masiku lama nga heriki.
113Ndzi vengile miehleketo ya nsohensohe,
Kambe ndzi rhandza nawu wa wena.
114U xichavelo ni xitlhangu xanga;
Ndzi langutele ku tshembisa ka wena.
115Tshinelani ekule na mina, n'wina lavo biha,
Leswaku ndzi hlayisa ku lerisa ka Xikwembu xanga!
116U ndzi tiyisa hi ku tshembisa ka wena leswaku ndzi hanya;
U nga ndzi khomisi tingana eku tshembeni ka mina!
117Ndzi wundle ndzi ta hlayiseka,
Timfanelo ta wena ti va emahlweni ka mina hi mikarhi!
118U sandza hinkwavo lava hambukaka timfanelo ta wena,
Hikuva ku kanganyisa ka vona i swahava.
119U susa lavo biha hinkwavo emisaveni kukota khuvi;
Hikwalaho ndzi rhandza ku tsundzuxa ka wena.
120Miri wa mina wu rhurhumela hi ku chava wena,
Ndzi chava ku avanyisa ka wena.
121Ndzi hlayisa nawu ni ku lulama,
U nga ndzi nyiketi vaxanisi va mina!
122Hlayisa, u va u yimela nandza wa wena,
Vatikurisi va nga tshuki va ndzi xanisa.
123Mahlo ya mina ma navela ku hlayiseka ka wena,
Ni ku hlayela ka wena loku lulameke.
124Endlela nandza wa wena hi vunene bya wena,
U ndzi dyondzisa timfanelo ta wena.
125Ndzi nandza wa wena; ndzi nyike ku twisisa,
Ndzi ta tiva swileriso swa wena.
126I nkarhi wa wena wa ku tirha, Yehovha!
Hikuva va herisile nawu wa wena.
127Hikwalaho ndzi rhandzaka ku lerisa ka wena
Ku tlula nsuku, ni nsuku lowu tengeke;
128Ndzi kuma na kona, leswaku swiletelo swa wena swi lulamile eka hinkwaswo;
Kutani ndzi vengile tindlela ta mavunwa.
129Switsundzuxo swa wena swa hlamarisa;
Moya wa mina wa swi hlayisa hikwalaho.
130Hlavutelo ya marito ya wena ya voninga,
Yi nyika lavo rivala ku twisisa.
131Ndzi ahlamisa nomu wa mina, ndzi hefemuteka,
Hikuva ndzi navela ku lerisa ka wena.
132Rhendzelekela eka mina, u ndzi twela vusiwana,
Hi laha u toloveleke ku endlela lava rhandzaka vito ra wena hakona!
133Tiyisa milenge ya mina eritweni ra wena,
Kutani u nga pfumeleri ku biha leswaku ku ndzi fuma!
134Ndzi kutsule eku xanisiweni ka vanhu,
Leswaku ndzi ta hlayisa swiletelo swa wena!
135Vangamisela mombo wa wena eka nandza wa wena,
U ndzi dyondzisa timfanelo ta wena!
136Mahlo ya mina ma huma milambu ya mati lama khulukaka,
Hikuva a va hlayisi nawu wa wena.
137U lulamile, Yehovha,
Ku avanyisa ka wena, na kona, ku lulamile!
138U lerisile milawu ya wena hi ku lulama,
Ni vutshembeki lebyikulu.
139Ku hiseka ka mina ku ndzi dyile,
Hikuva valala va mina va rivele marito ya wena.
140Rito ra wena ri tengile hi ku tlurisa,
Ri rhandziwa hi nandza wa wena.
141Ndzi lontsongo, ndza tsan'wiwa;
Hambiswiritano, a ndzi rivali swileriso swa wena.
142Ku lulama ka wena, i ku lulama loku nga heriki;
Nawu wa wena i wa vunene.
143Ndzi khomile hi mapfalo ni ku kanakana;
Hambiswiritano ndzi tsakela ku lerisa ka wena.
144Ku lulama ka switsundzuxo swa wena hi loku nga heriki,
Ndzi nyike ku twa swinene, ndzi ta hanya!
145Ndzi huwelela hi mbilu ya mina hinkwayo:
Ndzi hlamule, Yehovha, ndzi ta hlayisa timfanelo ta wena.
146Ndzi kombela ka wena: U ndzi ponisa,
Ndzi ta tiva ku hlayisa ku tsundzuxa ka wena!
147Ndzi rhangela vurhonga, ndzi huwelela!
Ndzi ri karhi ndzi langutela ku tshembisa ka wena.
148Mahlo ya mina ma rhangela mikarhi ya ku langutela ka vusiku,
Leswaku ndzi anakanya rito ra wena.
149Yehovha, yingisa rito ra mina hi tintswalo ta wena!
Ndzi hanyise hi ku avanyisa ka wena!
150Lava landzaka swo biha, va tshinele,
Va ri karhi va yimela kule ni nawu wa wena.
151Kambe, wena Yehovha, u kusuhi,
Ni ku lerisa ka wena hinkwako hi lokunene.
152Khale, ndzi tivile ku tsundzuxa ka wena.
Leswaku u ku tiyisile hi laha ku nga heriki.
153Languta vusiwana bya mina, u ndzi ponisa!
Hikuva a ndzi rivali nawu wa wena.
154Yimela timhaka ta mina, u ndzi kutsula!
U ndzi hanyisa hi ku tshembisa ka wena!
155Ku hlayiseka ku le kule ni lavo biha,
Hikuva a va vuri nchumu hi timfanelo ta wena.
156Ku tsetselela ka wena, Yehovha, kukulu;
Ndzi hanyise hi ku avanyisa ka wena!
157Vaxanisi va mina ni vakarhati va mina va tele,
Kambe a ndzi hambukanga eku tsundzuxeni ka wena.
158Ndzi vavisiwa hi lava nga tshembekiki,
Hikuva a va hlayisi rito ra wena.
159Yehovha, tsundzuka leswaku ndzi rhandza swileriso swa wena;
U ndzi hanyisa hi tintswalo ta wena!
160Masungulo ya rito ra wena manene;
Ku avanyisa hinkwako ka ku lulama ka wena a ku heri.
161Tihosi ta ndzi xanisa ntsena;
Kambe mbilu ya mina yi rhurhumela hi marito ya wena.
162Ndzi titsakisa hi rito ra wena,
Tanihi munhu la tsakelaka ku phanga lokukulu.
163Ndzi vengile, ndzi nyenya mavunwa;
Kambe ndzi rhandza nawu wa wena.
164Ndzi ku dzunisa eka ntlhanu na kambirhi hi siku,
Hikwalaho ka milawu ya ku lulama ka wena.
165Lava rhandzaka nawu wa wena va ni ku rhula lokukulu,
A ku na ku khunguvanyisa eka vona.
166Yehovha, ndzi langutele ku hlayiseka ka wena,
Ndzi ri karhi ndzi famba hi ku lerisa ka wena.
167Moya wa mina wu hlayisa switsundzuxo swa wena,
Kutani ndza swi rhandza ku tlurisa.
168Ndzi ri karhi ndzi ya hi swileriso ni switsundzuxo swa wena,
Hikuva mfambo wa mina hinkwawo wu le mahlweni ka wena.
169Yehovha, ku huwelela ka mina a ku fike eka wena!
Ndzi nyike ku twisisa hi laha u ndzi tshembiseke hakona!
170Ku khongela ka mina a ku fike emahlweni ka wena!
U ndzi hlayisa hi laha u nga vula ha kona!
171Milomu ya mina a yi humese ku bumabumela,
Hikuva u ndzi dyondzisa timfanelo ta wena.
172Ririmi ra mina a ri dzunise rito ra wena,
Hikuva ku lerisa ka wena hinkwako ku lulamile.
173Voko ra wena a ri ndzi pfune,
Hikuva ndzi tihlawulele swileriso swa wena!
174Yehovha, ndzi naverile ku hlayiseka ka wena,
Kutani nawu wa wena i ku tsaka ka mina!
175Moya wa mina a wu hanye, wu ku dzunisa!
U ndzi hlayisa hi ku avanyisa ka wena!
176Ndzi ri karhi ndza tsendzeleka ku fana ni nyimpfu leyi lahlekeke:
Lava nandza wa wena, hikuva a ndzi rivali ku lerisa ka wena.
