Ku kanganyisa ka munhu ni ku lulama ka Xikwembu.
Eka mufambisi wa vasimi. Hi haripa ya tingoti ta ntlhanu na tinharhu. Pisalema ya Davhida.
1Hi hlayise, Yehovha! Hikuva vanhu lavanene va hela,
Lavo tshembeka va lova exikarhi ka vana va vanhu.
2Va hembelana ku yenga ku le milon'wini ya vona,
Va vulavula, va ni timbilu timbirhi.
3Yehovha u ta herisa milomu leyi yengaka,
Ni ririmi leri tisaselaka hi leswikulu,
4Va nga vona lava nge:
“Hi ta hlula hi tindzimi ta hina,
Milomu yi na hina; hi nga fuma hi mani?”
5“Hikwalaho ka khombo ra swisiwana ni ku rila ka vapfumari,
Ndzi ta pfuka sweswi,” ku vula Yehovha;
“Ndzi ta ponisa lava xanisiwaka.”
6Marito ya Yehovha i marito layo tenga;
I ntsopfu lowu basisiweke entshengelweni,
Lowu nyukisiweke kantlhanu na kambirhi.
7Wena Yehovha u ta va hlayisa;
U va sirhelela eka rixaka leri hi masiku.
8Loko ku fuma vanhu lava fanelaka ku soriwa,
Lavo homboloka va tifambela hinkwako.
