TIPISALEMA 130

₁Oho Yehovha, ndzi vitana ka wena ndzi ri ku enteni ehansi!

₂Wee Hosi, yingisa rito ra mina!

Tindleve ta wena a ti yingisele

Rito ra ku khongela ka mina!

₃Loko ngi u hlayisa ku tsundzuka ka swidyoho, Yehovha,

Ku ta hanya mani, wee Hosi?

₄Hikuva ku rivalela ku le ka wena,

Leswaku u chaviwa.

₅Ndzi tshembile Yehovha; moya wa mina wu n'wi langutele,

Ndzi tshemba rito ra yena.

₆Moya wanga wu navela Hosi,

Ku tlurisa leswi valanguteri va navelaka vurhonga,

Ina, ku tlurisa leswi va langutelaka vurhonga.

₇Israele, tshemba Yehovha!

Hikuva tintswalo ti le ka Yehovha,

Ku kutsula ku kona ka yena hi ku tala.

₈Hi yena la nga ta kutsula Israele

Eku dyoheni hinkwako ka yena.