TIPISALEMA 27

₁Yehovha i ku vonakala ka mina, ni ku hlayiseka ka mina:

Ndzi nga tshukisiwa hi mani?

Yehovha i khokholo ra vutomi bya mina:

Ndzi nga rhurhumela emahlweni ka mani xana?

₂Kungakuloko lavo biha va ndzi tela

Ku ta phorha nyama ya mina,

Valala va mina ni lava ndzi vengaka,

Hi vona lava khunguvanyekaka va wa ehansi.

₃Ni loko nyimpi yi nga ta ku ndzi lavelela,

Mbilu ya mina yi nga ka yi nga chavi nchumu;

Ni loko fumu ri nga ndzi pfuka,

Na kona, mbilu ya mina yi ta va ni ku tshemba.

₄Ndzi komberile xilo xin'we eka Yehovha, ndza ha xi navela ngopfu:

Hi leswaku ndzi tshama endlwini ya Yehovha hi masiku hinkwawo ya ku hanya ka mina.

Ndzi ta hlalela ku kwetsima ka Yehovha,

Ndzi va ndzi kambisisa tempele ya yena.

₅Hikuva u ta ndzi fihla entsongeni wa yena hi siku ra khombo,

U ta ndzi tumbeta exichavelweni xa Tabernakela ya yena,

Kutani a ndzi khandziyisa ehenhla ka ribye lero tiya.

₆Sweswi, nhloko ya mina yi ta ungamela valala lava ndzi rhendzeleke;

Kambe ndzi ta humesa magandzelo va ku tsaka eTabernakeleni ya yena,

Ndzi ta yimbelela, ndzi va ndzi twarisa Yehovha.

₇Yingisa, Yehovha, rito ra nga ra ku vita;

Ndzi twele vusiwana, u ndzi hlamula.

₈Mbilu ya nga yi ndzi byela swa wena, yi ku: “Lavani mombo wa mina!”

Ndzi ta lava mombo wa wena, oho Yehovha!

₉U nga ndzi fihleri mombo wa wena,

U nga cukumeti nandza wa wena hi ku kariha;

Hi wena la ndzi pfunaka; u nga ndzi lahli, u nga ndzi tshiki,

Xikwembu xa ku hlayiseka ka mina.

₁₀Hambiloko tatana na manana va nga ndzi tshika,

Yehovha u ta ndzi rhola.

₁₁Yehovha, ndzi kombise ndlela ya wena,

U ndzi fambisa endleleni leyi lulameke,

Hikwalaho ka lava nga valala eka mina.

₁₂U nga ndzi nyiketi eku rhandzeni ka lava lwaka na mina,

Hikuva timbhoni ta vunwa ti ndzi pfukele,

Ni vanhu lava hefemulaka ku kariha ntsena.

₁₃Loko ngi ndzi nga pfumeri leswaku ndzi ta vona vunene bya Yehovha

Emisaveni ya lava hanyaka! ...

₁₄Langutela Yehovha, u tshama u tiya;

Mbilu ya wena a yi tiye!

U titshembela Yehovha!