TIPISALEMA 30

₁Yehovha, ndza ku kurisa hikuva u ndzi tshunxile;

A ku tshikanga valala va mina va tsaka ha mina.

₂Yehovha, Xikwembu xa mina,

Ndzi huwelele eka wena, kutani u ndzi horisile.

₃Yehovha, u humesile moya wa mina exivandleni xa vafi,

U ndzi hanyisile exikarhi ka lava xikelaka esirheni.

₄Yimbelelani Yehovha, n'wina lava n'wi rhandzaka,

Mi dzunisa vito ra yena leri kwetsimaka, mi ri tsundzuka.

₅Hikuva vukari bya yena i bya nkarhinyana ntsena,

Kambe tintswalo ta yena, i ta vutomi hinkwabyo;

Swirilo swi nga hambukela eka munhu nimadyambu,

Kambe nimixo i ku tsaka.

₆Eku tiphineni ka mina, a ndzi ku: “Ndzi nga ka ndzi nga tsekatseki, ni siku ni rin'we?”

₇Yehovha! Hi tintswalo ta wena, u tiyisile ntshava ya mina;

Kambe u fihle mombo wa wena, kutani ndzi kanakana.

₈Oho Yehovha! Ndzi huwelele eka wena;

Ndzi khongerile Yehovha, ndzi ku:

₉“Xana u nga fuwa yini hi ngati ya mina,

Loko ndzi xikela esirheni?

Xana ntshuri wu nga ku dzunisa?

Xana wu nga vula ku tshembeka ka wena xana?

₁₀Yehovha, ndzi yingise, u va u ndzi twela vusiwana;

Yehovha, u va mupfuni wa mina!”

₁₁U hundzuluxile mihloti ya mina ku tsaka,

U tshunxile nguvu ya mina leyo khwaxa,

kutani u ndzi ambexe ku tsaka,

₁₂Leswaku mbilu ya mina yi ku yimbelela yi nga miyeli.

Yehovha, Xikwembu xa mina, ndzi ta ku dzunisa hi masiku.