Ku rila loku hundzuluxiweke ku tsaka.
Eka mufambisi wa vasimi. Pisalema ya Davhida.
1Yehovha, ndzi chavela eka wena:
Ndzi nga khomiwi hi tingana ni siku ni rin'we!
Ndzi tshunxe eku lulameni ka wena!
2Wa nga ndzi yingisa, u hatlisa ku ndzi ponisa!
U va ribye ra mina ra xichavelo,
Ni khokholo laha ndzi nga chavelaka kona.
3Hikuva hi wena ribye ra mina ni khokholo ra mina;
Hikwalaho ka vito ra wena, u ta ndzi komba ndlela, u ndzi fambisa,
4U ta ndzi tshunxa entlhan'wini lowu va ndzi lunghiseleke wona;
Hikuva hi wena xichavelo xa mina.
5Ndzi nyiketa moya wa mina emavokweni ya wena;
U ta ndzi kutsula, wee Yehovha, Xikwembu xa ku tshembeka!
6Ndzi venga lava namarhelaka swikwembu swahava;
Loko ndzi ri mina, ndzi titshembela Yehovha.
7Ndzi ta ba mikulungwana, ndzi tsakela musa wa wena,
Wena la langutaka khombo ra mina, u tivaka mahlomulo ya moya wa mina,
8A ku ndzi nyiketanga emavokweni ya nala,
Kambe u tiyisile mikondzo ya mina erivaleni.
9Yehovha, ndzi tsetselele, hikuva ndzi le mahlomulweni;
Mahlo ya mina ma herisiwa hi swirilo, swin'we ni moya wa mina, ni marhumbu ya mina;
10Hikuva vutomi bya mina byi helela eku vavisekeni,
Ni malembe ya mina eku konyeni.
Matimba ya mina ma tsanile hikwalaho ka ku homboloka ka mina,
Kutani marhambu ya mina ma gudlagudla.
11Ndzi xisandzu hikwalaho ka valala va mina hinkwavo;
Xisandzu lexikulu eka lava akeke na mina;
Lava ndzi vonaka ehandle va tsutsumela ekule na mina.
12Ndzi rivariwile etimbilwini kukota mufi,
Ndzi fana ni swirhengele.
13Hikuva ndzi twa ku sandza ka lavo tala,
Ku tshuka ku ndzi rhendzele,
Loko va hlamulana kun'we ehenhla ka mina;
Va anakanya ku susa vutomi bya mina.
14Kambe ndzi vekile ku tshemba ka mina eka wena, Yehovha;
Ndzi ku: “U Xikwembu xanga!”
15Mikarhi ya mina yi le vokweni ra wena;
Ndzi tshunxe emavokweni ya valala va mina, ni ya lava ndzi xanisaka.
16Tsuvukisa mombo wa wena ehenhla ka nandza wa wena,
U ndzi ponisa hi nsovo wa wena.
17Yehovha, ndzi nga tshuki ndzi khomiwa hi tingana, hikuva ndzi ku khongele;
Lavo homboloka vona a va khomiwe hi tingana,
A va xike va miyela exivandleni xa vafi!
18Milomu leyi hembaka, a yi hundzuke ya mbheveve,
Leyi sandzaka la lulameke,
Leyi vulavulaka hi ku tikukumuxa ni ku sola!
19Ku kurile swonghasi ku kateka ka wena.
Loku ku vekelaka lava ku chavaka,
Loku u tirhaka hakona emahlweni ka vana va vanhu,
Ni ku pfuna lava chavelaka eka wena.
20U va fihla exihundleni lexi nga emahlweni ka wena ekule ni lava xanisaka;
U va sirhelela entsongeni wa wena; ekule ni tindzimi leti lumaka.
21A ku dzuniwe Yehovha!
Hikuva u ndzi kombisile nsovo wa yena,
Kukotisa loko ngi ndzi vekiwe ekhokholweni.
22A ndzi hatlisa, ndzi ku:
“Ndzi susiwile emahlweni ka wena”;
Kambe u yingisile rito ra ku khongela ka mina,
Loko ndzi huwelele eka wena.
23Rhandzani Yehovha,
n'wina hinkwenu varhandziwa va yena.
Yehovha u hlayisa lava tshembekaka,
Kambe u tlherisela eka la tikurisaka, hinkwaswo leswi n'wi faneleke.
24Tiheni matimba; timbilu ta n'wina a ti tiye,
N'wina hinkwenu lava langutelaka Yehovha!
