Ku tsaka ka loyi a rivaleriweke swidyoho swa yena.
Ya Davhida. Risimu.
1Ku katekile munhu loyi ku rivaleriweke ku dyoha ka yena,
Loyi swidyoho swa yena swi funengetiweke!
2Ku katekile munhu loyi Yehovha a nga n'wi hlayeriki ku biha ka yena,
Loyi ku nga riki na mano embilwini ya yena!
3Loko ndzi miyerile, marhambu ya mina a ma gudlagudla,
Hi ku konya ka mina hi siku hinkwaro.
4Hikuva nhlekanhi ni vusiku voko ra wena ri tshama ri ndzi tikela,
Matimba ya mina ma hundzuka ku oma ka ximumu.
5Ndzi ku tivisile xidyoho xa nga,
A ndzi fihlanga ku homboloka ka nga;
Ndzi te: “Ndzi ta tivula ka Yehovha ku dyoha ka mina,”
Kutani u hlangurile nandzu wa xidyoho xanga.
6Hikwalaho, un'wana ni un'wana la ku rhandzaka
U ta ku khongela hi nkarhi lowu u kumiwaka ha wona;
Hambi mati lamakulu loko ma hundza, ma nga ka ma nga n'wi fikeri.
7U xichavelo xa mina; u ndzi sivelela maxangu;
U ta ndzi rhendzela hi tinsimu ta ku hlayiseka.
8Ndzi ta ku tlharihisa ndzi ku komba ndlela leyi u faneleke ku famba ha yona;
Ndzi ta ku letela, ni mahlo ya mina ma ta va eka wena.
9Mi nga tshuki mi fana ni hanci kumbe mbhongolo leyi nga riki na ku twisisa;
Swi fanele ku khomiwa enon'wini hi matomu,
Loko swi nga ri tano, swi nga ka swi nga ku tshineleri.
10Mahlomulo layo tala ma tela lowo biha,
Kambe la tshembaka Yehovha u ta rhendzeriwa hi tintswalo.
11Titsakeleni ha Yehovha, mi va mi tsakisisa, n'wina va ku lulama!
Yimbelelani hi ku tsaka,
n'wina hinkwenu va timbilu to lulama!
