Xikhongelo xa loyi a xanisiwaka.
Ya Davhida.
1Oho Yehovha! Ndzi lwele eka lava ndzi pfukaka,
Lwana ni lava lwaka na mina!
2Khoma xitlhangu lexitsongo ni lexikulu,
U pfuka ku ta ndzi pfuna!
3Hlomula tlhari, u sivela lava ndzi hlongorisaka!
U ku eka moya wa mina:
“Hi mina ku hlayiseka ka wena!”
4A va kanakane, a va khomiwe hi tingana, lava lavaka vutomi bya mina!
A va tlhelele endzhaku, a va kanakane, lava ehleketaka ku ndzi lovisa!
5A va fane ni mungu lowu hungiwaka hi mheho,
Ntsumi ya Yehovha a yi va hlongorise!
6Ndlela ya vona a yi ve leya munyama, leyi rhetemukaka,
Ntsumi ya Yehovha a yi va hlongorise!
7Hikuva va lunghisile exihundleni ntlhamu ku ndzi phasa mahala,
Va cerile rindzi ku rindzela vutomi bya mina mahala.
8Ku onhaka a ku va wele ehenhla va nga swi tivi,
A va phasiwe hi ntlhamu lowu va wu fihleke;
A va wele kona, va lova.
9Hi kona moya wanga wu nga ta titsakela eka Yehovha,
Wu ta tsakela ku hlayiseka ka yena.
10Marhambu hinkwawo ya mina ma ta ku:
“Yehovha, i mani la fanaka na wena,
La ponisaka xisiwana eka la n'wi tlulaka hi matimba,
La nga ekhombyeni ni swisiwana, eka vawutleri va vona.”
11Timbhoni ta ku hemba ti yima,
Ti ndzi vutisa timhaka leti ndzi nga ti tiviki.
12Ti ndzi rihela vunene hi leswo biha;
Moya wa mina wu le vusiwaneni.
13Kasi mina, eku vabyeni ka vona, a ndzi funengela tinguvu to khwaxa;
A ndzi tsongahata moya wa mina hi ku titsona swakudya,
Xikhongelo xa mina xi tlhela xi vuya exifuveni xa mina.
14A ndzi famba khwatsi kukotisa loko ngi ndzi rilela nakulorhi, kumbe makwerhu;
A ndzi famba ndzi korhamile enkosini kukotisa loko ndzi feriwe hi manana.
15Kambe loko ndzi lava ku wa, va tsaka, va hlengeletana;
Va hlengeletana ku ndzi sola, ndzi nga swi tivi;
Va nga rhuteli ku ndzi handzula.
16Kun'we ni vasandzi lava hlekisaka emikhubyeni,
Va ndzi getselela meno.
17Wena Hosi, u ta swi hlalela ku fika rini xana?
Ponisa moya wanga eku onheni ka vona,
Ni vutomi bya mina etinghaleni!
18Ndzi ta ku twarisa enhlengeletanweni leyikulu,
Ndzi ku vonga exikarhi ka vanhu lavo tala.
19Va nga tshuki va tsaka ha mina lava nga valala eka mina ntsena,
Va nga tshuki va tshunyeta hi mahlo lava ndzi vengaka ntsena!
20Hikuva ku rhula a ku kona eku vulavuleni ka vona,
Va anakanyela va ku rhula va le tikweni, marito ya ku hemba.
21Va ndzi anamele milomu ya vona,
Va ku: “Haha! Haha! Mahlo ya hina ma vonile!”
22U swi vonile, Yehovha, u nga tshuki u miyela!
U nga yimi ekule na mina, we Hosi!
23Pfuka u yima ku ndzi lulamisela timhaka,
Xikwembu xanga ni Hosi ya mina, pfuka ku ndzi lwela!
24U ndzi avanyisa hi ku lulama ka wena, Yehovha, Xikwembu xanga!
Va nga tshuki va tsaka ha mina.
25Va nga tshuki va vula etimbilwini ta vona va ku:
“Haha! Hi leswi hi swi navelaka!”
Va nga tshuki va ku: “Hi n'wi mitile!”
26A va khomiwe hi tingana, a va kanakanisiwe kun'we
Lava tsakelaka swo biha leswi ndzi telaka!
A va funengetiwe hi tingana ni xisandzu
Lava tikurisaka ehenhla ka mina!
27A va yimbelele, a va tsake lava rhandzaka ku lulama ka mina,
A va vule hi masiku:
“A ku vongiwe Yehovha!
La rhandzaka ku rhula ka nandza wa yena!”
28Ririmi ra mina ri ta vula ku lulama ka wena,
Ri ta vula ku dzuna ka wena hi masiku.
