Ku yingisa ku tlula magandzelo.
Eka mufambisi wa vasimi. Pisalema ya Davhida.
1Ndzi langutele Yehovha hi ku tiyisela,
Kutani u ndzi korhamele,
a yingisa ku huwelela ka mina.
2U ndzi humesile ekheleni ra ku onhaka,
ni le tshobyeni ra ndzhope;
U vekile mikondzo ya nga eribyeni,
a tiyisa ku famba ka mina.
3U nghenise enon'wini wa mina risimu lerintshwa,
Ku dzunisa Xikwembu xa hina.
Lavo tala va swi vonile va ve ni ku chava,
Kutani va tshembile Yehovha.
4Ku katekile munhu la vekaka ku tshemba ka yena eka Yehovha,
La nga hundzukeriki eka lava tikukumuxaka ni ka vahembi!
5Wena Yehovha, Xikwembu xanga, u andzisile ngopfu
Masingita ni makungu ya wena ehenhla ka hina;
Swa hi hlula ku ma hlaya emahlweni ka wena.
Hambi ndzi rhandza ku ma hlaya ni ku ma vula,
Ntsengo wa wona wu tlula leswi nga hlayiwaka.
6A ku tsakelangi magandzelo ni tinyiko;
U pfurile tindleve ta mina.
A ku lavanga holokosta ni magandzelo ya xidyoho.
7Kutani ndzi te: “Vona, ndzi tile
Hi laha ku tsariweke hakona hikwalaho ka mina ebukwini.
8Xikwembu xanga, ndzi tsakela ku endla ku rhandza ka wena!
Kutani nawu wa wena wu le mbilwini ya mina.”
9Ndzi twarisile ku lulama enhlengeletanweni leyikulu;
Vona, a ndzi pfalanga milomu ya mina,
Yehovha, wa swi tiva.
10A ndzi fihlanga ku lulama ka wena embilwini ya nga,
Ndzi vurile ku tshembeka ka wena ni ku hlayiseka ka wena,
A ndzi fihlelanga nhlengeletano leyikulu tintswalo ta wena, ni ku lulama ka wena.
11Wena Yehovha u nga ka u nga ndzi aleli tintswalo ta wena!
Musa wa wena ni ku lulama ka wena, swi ta ndzi hlayisa hi masiku.
12Hikuva makhombo lama nga hlayiwiki ma ndzi rhendzele;
Milandzu ya mina yi ndzi khomile, ndzi hluleka ku yi vona;
Yi tlula ntsengo wa misisi ya nhloko ya mina,
Kutani ndzi heleriwa hi mbilu.
13Oho Yehovha, wa nga ndzi tshunxa!
Oho Yehovha, hatlisa ku ta ndzi pfuna!
14A va kanakane, a va khomiwe hinkwavo hi tingana
Lava lavaka vutomi bya mina ku byi susa;
A va tlhelele endzhaku, a va khomiwe hi tingana,
Lava tsakelaka ku onhaka ka mina!
15A va chavisiwe hi tingana ta vona
Lava vulaka ehenhla ka mina: “Ha! Ha!”
16A va tsake, a va titsakele ha wena
Hinkwavo lava ku lavaka!
Lava rhandzaka ku hlayiseka ka wena,
A va vule hi masiku, va ku:
“A ku kurisiwe Yehovha!”
17Loko ndzi ri mina, ndzi xisiwana ni mupfumari;
Kambe Hosi ya ndzi anakanya.
U mupfuni wa nga ni mukutsuri wa nga:
Xikwembu xa mina, u nga hlweri!
