TIPISALEMA 49

₁Yingisani timhaka leti, n'wina, matiko hinkwawo,

Rhiyani tindleve, n'wina vaaki hinkwavo va misava;

₂Lavatsongo ni lavakulu, vafuwi ni swisiwana!

₃Nomu wa mina wu ta vula marito ya vutlhari,

Mianakanyo ya mbilu ya mina yi ta tala hi ku twisisa.

₄Ndzi ta rhiyela rito ra vutlhari ndleve,

Ndzi ta hlamusela xifaniso xa mina ndzi va ndzi yimba haripa.

₅Xana ndzi ta chavela yini emasikwini ya khombo,

Loko ndzi rhendzeriwa hi ku homboloka ka valala va mina?

₆Va tshemba rifuwo ra vona,

Va tidzunisa hi vukulu bya ku fuwa ka vona.

₇Munhu a nga swi koti ku kutsula makwavo,

Hambi ku ri ku humesela Xikwembu ntsengo wa yena.

₈Ntsengo wa moya wa vona wu dura ngopfu;

Munhu a nge wu humesi ni siku ni rin'we;

₉Va nga ka va nga hanyi hi masiku lama nga heriki,

Leswaku va nga voni sirha;

₁₀Kambe va ta ri vona: lavo tlhariha va fa,

Na swona swihunguki ni swiphukuphuku swi fa na swona,

Va siyela van'wana rifuwo ra vona.

₁₁Va ringanisa leswaku tindlu ta vona ti ta va kona hi masiku,

Ni vuako bya vona etinxakeni ta tinxaka,

Va tshula matiko hi mavito ya vona.

₁₂Hambiswiritano, munhu la nga eku vonakaleni a nga tiyi,

U fana ni swiharhi leswi faka.

₁₃Hi yona ndlela ya vona ni vuhunguki bya vona,

Ni lava va landzaka va tsakela marito ya vona.

₁₄Va nghenisiwa exivandleni xa lava feke kukota ntlhambi,

Va dyiwa hi rifu,

Ni mixo, lava lulameke va va kandziyela hi milenge;

Vumbhurhi bya vona byi dyiwa hi sirha byi pfumala vutshamo.

₁₅Kambe Xikwembu xi ta kutsula moya wa mina exivandleni xa vafi,

Hikuva xi ta ndzi tekela eka xona.

₁₆U nga chavi loko munhu a andzisa rifuwo ra yena,

Loko ku kwetsima ka yindlu ya yena ku engeteleka;

₁₇Hikuva siku a nga ta fa, a nga ka a nga teki nchumu wa swona,

Ku kwetsima ka yena ku nga ka ku nga xikeli endzhaku ka yena.

₁₈Hambi a khensa moya wa yena eku hanyeni ka yena,

Hambi vanhu va ku khensa hikwalaho ka ku titsakisa ka wena,

₁₉Hambiswiritano, u ta xikela erixakeni ra vatata wa wena,

Lava nga ha tiki vona ku vonakala ni siku ni rin'we.

₂₀Munhu la nga eku vonakaleni, kambe a nga ri na ku twisisa,

U fana ni swiharhi leswi faka.