Loko hi ri ni Xikwembu hi ta hlula hambi hi hluriwile.
Eka mufambisi wa vasimi. Hi “Xoxanimi.” Risimu ra Davhida ra ku dyondzisa, ra nkarhi lowu a lwaka ni Vasiriya va le Mesopotamiya, ni Vasiriya va le Soba, ni loko Yowabu a vuya eku hluleni ka Vaedomu enkoveni wa munyu, a dlaye vanhu va 12 000.
1Oho Xikwembu, u hi cukumetile, u hi hangalasile,
U karihile: hi pfuxe sweswi!
2U tsekatsekise misava, u yi handzurile:
Horisa tinfa ta yona, hikuva ya dedeleka!
3U kombisile tiko ra wena swilo leswo nonon'hwa;
U hi nwise vhinyo leyi pyopyisaka.
4U nyikile lava ku chavaka mfungho,
Leswaku va pfuka hikwalaho ka vutshembeki bya wena.
5Ponisa hi voko ra wena, u hi hlamula,
Leswaku varhandziwa va wena va lweriwa!
6Xikwembu xi vurile eku kwetsimeni ka xona xi ku: “Ndzi ta hlula,
Ndzi ta avanyisa Xikeme, ndzi pima nkova wa Sukoti;
7Giliyadi i wa mina, Manase i wa mina;
Efrayimi i khokholo ra nhloko ya mina,
Yuda i nhonga ya mina ya vuhosi;
8Mowabu i nkambana lowu ndzi hlambelaka eka wona;
Ndzi hoxa ntanghu ya mina ehenhla ka Edomu;
Filista, huwelela hi ku tsaka ha mina!”
9I mani la nga ta ndzi fambisa emutini wa khokholo?
I mani la nga ta ndzi fikisa eEdomu?
10Xana a hi wena Xikwembu lexi ngi u hi cukumetile,
Wena Xikwembu lexi ngi u nga ha humi ni tinyimpi ta hina xana?
11Hi pfune leswaku hi tiva ku huma emapfalweni,
Hikuva ku pfuna ka munhu i swahava ntsena.
12Hi Xikwembu hi ta hlula.
Hi xona lexi nga ta phyandlasa valala va hina.
