Xikwembu a xi dzunisiwe hikwalaho ka tinyiko ta xona!
Eka mufambisi wa vasimi. Pisalema ya Davhida. Risimu.
1Oho Xikwembu!
U ta dzunisiwa hi ku rhula eSiyoni,
Ku hlambanya ku ta hetisiwa eka wena.
2Wena la yingisaka mikhongelo!
Vanhu hinkwavo va ta ta eka wena!
3Ku tika ka swidyoho ku ndzi hlurile,
Kambe wena u ta hi rivalela ku dyoha ka hina.
4Ku katekile loyi u n'wi hlawulaka, loyi u n'wi tshinetaka eka wena!
U ta tiakela etihubyeni ta wena.
Hi ta xurha hi rifuwo ra yindlu ya wena,
Ni ku kwetsima ka tempele ya wena.
5U hi hlamula hi mitirho leyi chavisaka ya ku lulama ka wena,
Xikwembu xa ku hlayiseka ka hina,
Wena la nga ku tshemba ka matlhelo hinkwawo ya misava ni ya lwandle!
6U tiyisa tintshava hi matimba ya wena, Wena la ambaleke matimba;
7U miyeta ku pfuma ka malwandle,
Ni ku pfuma ka magandlati ya wona,
Ni pongo ra matiko.
8Lava akeke emakun'wini ya misava va chava mahlori ya wena;
U tsakisa matlhelo ya le vuxeni ni le vupeladyambu.
9U endzela misava, u yi cheleta ngopfu,
U yi nyika ndzalo leyikulu ngopfu;
Xinambyana xa Xikwembu xi tala hi mati;
U mirisa mavele loko u lunghisisa misava hi sweswo.
10U cheleta vurimo bya yona, u fayetela mabuwu ya yona,
U yi olovisa hi timpfula, u katekisa mirombo ya mavele.
11U tlhandleka lembe hi harhi ya rifuwo ra wena,
Ni mafurha ma tshonela emitileni ya wena;
12Ma tshonela emabanyini ya le mananga,
Kutani switsunga swi ambele ku tsaka;
13Vudyelo byi funengetiwa hi tinyimpfu,
Ni mikova yi ambexiwa hi mavele;
Swi huwelela hi ku tsaka, swi va swi yimbelela.
