TIPISALEMA 74

₁Oho Xikwembu,

u hi cukumetele makumu ha yini-ke?

U karihele ntlhambi lowu u wu risaka hikwalaho ka yini?

₂Tsundzuka tiko leri u nga titekela rona khale,

Leri u nga ri kutsula tani hi rixaka ra ndzhaka ya wena!

Tsundzuka ntshava ya Siyoni, leyi u nga titshamela eka yona.

₃Yisa milenge ya wena etindhawini letiya lama nga marhumbi hi masiku:

Nala u herisile hinkwaswo evukwetsimelweni bya wena.

₄Valala va wena va dzumadzumile etempeleni ya wena;

Va vekile swikombiso swa vona swi va swikombiso swa kona.

₅Va voniwile swange i vanhu lava tlakusaka swihloka

Exihlahleni xa mirhi yo tala.

₆Kutani kan'wekan'we va fayile leswi vatliweke hinkwaswo,

Hi ku ba hi swihloka ni tinyundzu.

₇Va hisile vukwetsimelo bya wena hi ndzilo;

Va yi wisile va yi sandzile yindlu ya vito ra wena.

₈A va ku etimbilwini ta vona:

“A hi swi heriseni hinkwaswo xikan'we.”

Va hisile swivandla hinkwaswo swo gandzela kona etikweni.

₉A ha ha voni swikombiso swa hina,

A ka ha ri na muprofeta;

Exikarhi ka hina, a ku na la tivaka leswaku ku ta yisa kwihi.

₁₀Oho Xikwembu!

Muxanisi u ta sandza ku yisa kwihi?

Xana nala u ta sola vito ra wena hi masiku ni masiku?

₁₁U khondlela yini voko ra wena, voko ra wena ra xinene xana?

Ri humese exifuveni xa wena, u va heta.

₁₂Xikwembu i Hosi ya nga ku sukela emikarhini ya khale,

Xona lexi ponisaka la emisaveni.

₁₃Hi wena la nga avanyisa lwandle hi matimba ya wena,

U fayile tinhloko ta madragona ematini,

₁₄U pyanyeterile tinhloko ta tingwenya,

U ti nyikile swi va swakudya swa swivandzana swa le mananga.

₁₅U pfelerisile swihlovo ni milambu,

U omisile milambu leyi nga tiviki ku phya.

₁₆Nhlekanhi i wa wena, na byona vusiku i bya wena;

U vumbile ku vonakala, na rona dyambu.

₁₇U vekile mindzilekana hinkwayo ya misava;

U tiyisile ximumu ni vuxika.

₁₈Tsundzuka leswaku nala wa sandza, Yehovha,

Tiko leri nga riki na mano ri sola vito ra wena.

₁₉U nga nyiketi eswivandzaneni moya wa gugurhwana wa wena;

U nga rivali hi masiku ntlhambi wa wena wa lava xanisekaka!

₂₀Anakanya ntwanano wa wena,

Hikuva swivandla swa tiko leswi nga etlhelweni, swi tele mabako ya vaxanisi.

₂₁Loyi a xanisiwaka a nga tshuki a muka a ri ni tingana;

Loyi a hluphekaka, ni loyi a pfumalaka a va tlangele vito ra wena!

₂₂Pfuka, oho Xikwembu, lwela mhaka ya wena.

Tsundzuka ku sandziwa loku nala a ku sandzaka hakona hi masiku!

₂₃U nga rivali ku huwelela ka valala va wena,

Ni pongo leri engetelekaka hi masiku ra lava ku pfukelaka!