Tidyondzo ta timhaka ta Vaisraele.
Risimu ra Asafa.
1Yingisa tidyondzo ta mina, tiko ranga;
Rhiyani tindleve, mi yingisa marito ya nomu wa mina.
2Ndzi ta ahlamisa nomu wa mina hi marito,
Ndzi ta vulavula leswi fihliweke swa mikarhi ya khale.
3Leswi hi nga swi twa, leswi hi swi tivaka,
Leswi vatata wa hina va nga hi byela swona,
4Hi nga ka hi nga swi fihleri vana va vona;
Hi ta hlayela vatukulu swidzuniso swa Yehovha,
Swin'we ni matimba ya yena ni mahlori lawa a nga ma endla.
5Yena u yimisile vumbhoni eka Yakobo,
U vekile nawu eka Israele,
Lowu a nga lerisa vatata wa hina ku wu dyondzisa vana va vona.
6Leswaku wu ta tiviwa hi rixaka leri tlhandlamaka,
Hi vana lava nga ta velekiwa,
Vona va ta kula, kutani va ta byela vana va vona,
7Leswaku va veka ku tshemba ka vona eka Xikwembu,
Va nga tshuki va rivala mitirho ya Xikwembu,
Va ta hlayisa ku lerisa ka xona,
8Va nga tshuki va fana ni vatata wa vona,
Rixaka ra ku tiarisa, ro dzumadzuma,
Rixaka leri nga fambiki hi mbilu yo tiya,
Leri moya wa rona, wu nga tshembiki Xikwembu.
9Vana va Efrayimi, lava hlomeke va tameleke vurha,
Va fularhele hi siku ra ku lwa.
10A va hlayisanga ntwanano wa Xikwembu,
Va arile ku famba enawini wa xona.
11Va rivele mitirho ya xona,
Ni masingita lawa xi nga va kombisa wona.
12Emahlweni ka vatata wa vona xi tirhile mahlori,
Etikweni ra Egipta, etimbaleni ta Sowani.
13Xi tsemakanyisa lwandle, xi va perisa,
Xi yimisa mati ma endla swange i khumbi.
14Ninhlekanhi xi va fambisa hi papa,
Nivusiku hinkwabyo hi ku voninga ka ndzilo.
15Xi pandzile maribye le mananga,
Kutani xi va nwisa swange va nwa eswidziveni swa lwandle.
16Xi humesile tinseledyana eribyeni,
Kutani xi pfelerisa mati eka rona swange i milambu.
17Kambe va engetile va xi dyohela,
Va dzumadzumela La nge henhlahenhla le mananga;
18Va ringile Xikwembu etimbilwini ta vona.
Hi ku kombela swakudya leswi va nga swi navela.
19Va hleva Xikwembu, va ku:
“Xana Xikwembu xi nga hi phamela kwala mananga-ke?
20Maswivo, xi bile ribye, kutani mati ma humile,
Ni milambu yi khulukile;
Xana xi nga swi kota ku nyika vuswa,
Ni ku lunghisela tiko ra xona nyama xana?”
21Hikwalaho, Yehovha, loko a swi twa, a kariha,
Kutani ndzilo wu pfurhela Yakobo,
Ni vukari byi pfukela Israele,
22Hikuva a va pfumelangi eka Xikwembu,
A va tshembanga ku pfuna loku humaka eka xona.
23Xi lerisile mapapa ehenhla,
Kutani xi pfula tinyangwa ta tilo.
24Xi va nisela manna, swi va swakudya swa vona,
Xi va nyika koro ya tilo.
25Hinkwavo va dyile swakudya swa tihosi,
Xi va rhumele swakudya va kondza va xurha.
26Xi humesa mheho ya vuxa ematilweni,
Xi vitana moya wa dzonga hi matimba ya xona;
27Xi va nisela nyama swange ntshuri,
Ni tinyanyana le ta timpapa, swange i sava ra lwandle;
28Xi ti wisa exikarhi ka magovela ya vona,
Hi matlhelo hinkwawo ya vuako bya vona.
29Va dya va xurha ngopfu:
Xi va rhumela leswi va swi naveleke.
30Kavaloko ku navela ka vona ingi loko ka ha ri kona,
Loko swakudya swa ha ri kona emilon'wini ya vona,
31Ku kariha ka Xikwembu ku va pfukela;
Xi dlaya tinhenha ta vona,
Xi wisa majaha ya Israele.
32Hambi swilo leswi hinkwaswo swi humelele va engeta va dyoha,
A va pfumelanga masingita ya xona.
33Xi va tshika, masiku ya vona ma hela hi vuhava,
Ni malembe ya vona hi ku hela loku tshukisaka.
34Loko xi ri karhi xi va dlaya, a va xi lava,
A va tlhela, a va hatla ku lava, Xikwembu;
35A va tsundzuka leswaku Xikwembu a ri ri ribye ra vona,
Ni leswaku Xikwembu lexi nge henhlahenhla a a ri mukutsuri wa vona.
36Kambe a va xi kanganyisa hi milomu ya vona,
Va xi hembela hi tindzimi ta vona;
37Timbilu ta vona a ti nga lulamanga emahlweni ka xona,
A va nga tshembekanga entwananweni wa xona.
38Kambe xona hi tintswalo ta xona xi va rivalele ku dyoha, a xi va hetanga.
Hakanyingi xi tlhelele evukarini bya xona,
A xi pfumelangi vukari hinkwabyo bya xona ku pfuka.
39Xi tsundzuka leswaku a va ri nyama ntsena,
Ni moya lowu hundzaka, lowu nga vuyiki.
40Hakanyingi va xi dzumadzumela emananga,
Ni ku xi karihisa!
41A va tshikanga ku ringa Xikwembu,
Ni ku pfuxa Mukwetsimi wa Israele.
42A va ha tshamanga va anakanya voko ra xona,
Ni loko ri ri siku leri xi va tshunxeke eka nala ha rona,
43Siku xi endleke mahlori etikweni ra Egipta,
Ni swihlamariso emabanyini ya Sowani.
44Xi hundzula milambu ya vona ngati,
Kutani va hluleka ku nwa mati ya yona.
45Xi va rhumela tinxaka ta mabawa lama va heteke,
Ni mitlambya leyi va loviseke.
46Kutani xi nyiketa swivungu masimu ya vona,
Ni tinjiya mihandzu ya ntirho wa vona.
47Xi herisa tivhinya ta vona hi xihangu,
Ni mikuwa ya vona hi xirhami.
48Kutani xi nyiketa xihangu tihomu ta vona,
Ni ndzilo wa le henhla mitlhambi ya vona.
49Xi va rhumela ndzilo wa vukari bya xona,
Byi ri vukari, ni nhlundzuko, ni mahlomulo,
Ni vandla ra tintsumi ta makhombo.
50Xi ri karhi xi nyika vukari bya xona nkarhi,
Kutani a xi alelanga rifu mimoya ya vona,
Kambe xi nyika vutomi bya vona swi va swakudya swa ntungu;
51Xi ba mativula hinkwawo etikweni ra Egipta,
Ni mativula ya matimba ya vona emitsongeni ya Hamu.
52Xi humesa tiko ra xona tani hi tinyimpfu,
Kutani xi va fambisa emananga tani hi ntlhambi.
53Xi va byisa hi ku lulama, kutani a va tshukangi nchumu,
Kambe lwandle ri funengeta valala va vona.
54Kutani xi va fikisa emindzilekaneni ya xona leyi hlawuriweke,
Entshaveni yoleyo leyi tshumbiweke hi voko ra xona ra xinene.
55Xi hlongorisa matiko emahlweni ka vona,
Xi va avanyisela ku averiwa ka ndzhaka ya vona hi pindza,
Kutani xi akisa tinxaka ta Israele emitsongeni ya vona.
56Kambe va ringa Xikwembu Lexi nge henhlahenhla, va xi dzumadzumela,
Kutani a va hlayisangi ku lerisa ka xona.
57Va tlhela ndzhaku, va va ni mano kukota vatata wa vona,
Va va tani hi vurha lebyi kanganyisaka.
58Va vanga vukari bya xona hi swivandla leswi tlakukeke swa vona,
Ni rilondzo ra xona hi swifaniso swa swikwembu swa vona.
59Kutani Xikwembu, loko xi vona sweswo, xi kariha,
Xi phirweka ngopfu hi Vaisraele;
60Xi tshika vuako bya Xilo,
Ntsonga lowu ngi xi tshame eka wona exikarhi ka vanhu,
61Kutani xi tshika ku kwetsima ka xona ku yisiwa eku bohiweni,
Ni ku twala ka xona ku wela emavokweni ya valala.
62Kutani xi nyiketa fumu tiko ra xona,
Xi va xi karihela ndzhaka ya xona.
63Xi herisa majaha ya vona hi ndzilo,
Ni vanhwana va vona a va tamanga va dzunisiwa.
64Vaprista va vona va wisiwa hi tlhari,
Kutani tinoni ta vona a ti vanga ti rila.
65Hosi yi phaphama tani hi munhu la etleleke,
Tanihi nhenha leyi baka huwa, leyi vulavurisiwaka hi vhinyo.
66Xi tlhava valala va xona endzhaku,
Xi va byarisa tingana leti nga heriki.
67Hambiswiritano, xi lahlile ntsonga wa Yosefa,
Kutani a xi hlawulanga rixaka ra Efrayimi.
68Kambe xi hlawula rixaka ra Yuda,
Ni ntshava ya Siyoni leyi xi yi rhandzaka.
69Kutani xi aka vukwetsimelo bya xona tani hi tindhawu leti tlakukeke.
Tanihi misava leyi xi nga yi tiyisa hi laha ku nga heriki.
70Kutani xi hlawula Davhida, nandza wa xona,
Xi n'wi teka ematshangeni ya tinyimpfu;
71Xi n'wi susa eka tinyimpfu ta matswele,
A ta va murisi wa Yakobo, tiko ra xona,
Na Israele, ndzhaka ya xona.
72Kutani Davhida a va risa hi mbilu leyi tengeke,
A va fambisa hi mavoko layo tlhariha.
