TIPISALEMA 89

₁Ndzi ta yimbelela tintswalo ta Yehovha hi masiku;

Milomu ya mina yi ta tivisa ku tshembeka ka wena hi laha ku nga heriki.

₂Hikuva ndzi ku:

“Vunene bya wena byi ni masungulo lama nga heriki:

U vekile ku tshembeka ka wena le tilweni.”

₃U te: “Ndzi endlile ntwanano ni muhlawuriwa wa mina;

Ndzi hlambanyile eka Davhida, nandza wa mina,

₄Ndzi ku: ‘Ndzi ta tiyisa rixaka ra wena hi masiku ni masiku,

Ndzi ta tiyisa xiluvelo xa wena hi laha ku nga heriki.’ ”

₅Matilo ma dzunisa masingita ya wena, oho Yehovha!

Ndzi vutshembeki bya wena enhlengeletanweni ya vakwetsimi.

₆Hikuva i mani, le tilweni, la nga tiringanisaka na Yehovha?

Exikarhi ka vana va Xikwembu, i mani la fanaka na Yehovha?

₇Xikwembu xa chavisa enhlengeletanweni leyikulu ya vakwetsimi,

Xi chaviwa hi ku tlurisa hi lava xi rhendzeleke.

₈Oho Yehovha, Xikwembu xa tinyimpi,

i mani la fanaka, na wena hi matimba?

Ku tshembeka ka wena ku ku rhendzela hi matlhelo hinkwawo.

₉U fuma ku tikukumuxa ka lwandle;

Loko magandlati ma pfuka wa ma miyeta.

₁₀U phyandlasile Egipta kukota munhu la feke,

U hangalasile valala va wena hi matimba ya voko ra wena,

₁₁Tilo ni misava i swa wena,

U tumbuluxile misava ni swilo hinkwaswo swa yona.

₁₂U endlile n'walungu ni dzonga;

Taboro na Hermoni swi dzunisa vito ra wena.

₁₃Matimba ma le vokweni ra wena,

Xandla xa wena xa xinene xi tiyile, xi tlakukile.

₁₄Ku lulama ni ku avanyisa i masungulo ya xiluvelo xa wena,

Tintswalo ni vunene swi le mahlweni ka mombo wa wena.

₁₅Ku katekile tiko leri tivaka mpfumawulo wa nanga!

Ri famba eku vonakaleni ka mombo wa wena, Yehovha.

₁₆Masiku hinkwawo ri tsakela vito ra wena,

Ri tidzunisa hi ku lulama ka wena.

₁₇Hikuva u ku kwetsima ka matimba ya rona.

Hi tintswalo ta wena, u tlakusa rimhondzo ra hina,

₁₈Hikuva xitlhangu xa hina i Yehovha,

Mukwetsimi wa Israele i Hosi ya hina.

₁₉Khale u vurile enorhweni eka Muhlawuriwa wa wena

U ku: “Ndzi pfunile nhenha,

Ndzi wundlile jaha exikarhi ka tiko.

₂₀Ndzi kumile Davhida, nandza wa mina,

Ndzi n'wi cherile hi mafurha ya mina layo kwetsima.

₂₁Voko ra mina ri ta n'wi akisa,

Voko ra mina ri ta n'wi tiyisa.

₂₂Nala a nga ka a nga n'wi wongi,

Mukanganyisi a nga ka a nga n'wi xanisi.

₂₃Ndzi ta pukutsa emahlweni ka yena vakaneti va yena,

Ndzi ta ba lava n'wi vengaka.

₂₄Ku tshembeka ka mina ni vunene bya mina swi ta va na yena,

Matimba ya yena ma ta tiyisiwa hi vito ra mina.

₂₅Ndzi ta veka voko ra yena henhla ka lwandle,

Ni ra xinene ra yena ehenhla ka milambu.

₂₆Yena u ta ndzi khongela, a ku:

‘Hi wena tatana, Xikwembu xanga ribye ra ku hlayiseka ka mina!’

₂₇Mina ndzi ta n'wi endla mativula ya mina,

La tlulaka tihosi hinkwato ta misava.

₂₈Ndzi ta n'wi hlayisela vunene bya mina hi masiku;

Ntwanano wa mina na yena wu ta tiya hi masiku.

₂₉Rixaka ra yena ri ta va leri nga heriki;

Xiluvelo xa yena xi ta tiya tani hi masiku ya matilo.

₃₀“Kungakuloko vana va yena va tshika nawu wa mina,

Va nga fambi eku leriseni ka mina,

₃₁Loko va tlula milawu ya mina,

Va nga hlayisi ku lerisa ka mina,

₃₂Ndzi ta ba hi nkhavi ku dyoha ka vona,

Ndzi ba ku homboloka ka vona hi ntshilana;

₃₃Kambe ndzi nga ka ndzi nga n'wi tekeri vunene bya mina,

Ndzi nga ka ndzi nga hundzuluxi ku tshembeka ka mina mavunwa.

₃₄Ndzi nga ka ndzi nga onhi ntwanano wa mina,

Ni ku hundzuluxa rito leri nga huma emilon'wini ya mina.

₃₅“Ndzi hlambanyile kan'we hi ku kwetsima ka mina;

Xana ndzi ta hembela Davhida-ke?

₃₆Rixaka ra yena ri ta va kona hi laha ku nga heriki.

Xiluvelo xa yena xi ta va kona emahlweni ka mina tani hi dyambu,

₃₇Xi ta tiyisiwa hi mikarhi, tani hi n'weti.

Mbhoni leyi nga ematilweni ya tshembeka.”

₃₈Hambiswiritano, u cukumetile muhlawuriwa wa wena,

U n'wi tshikile u n'wi karihele.

₃₉U nyenyile ntwanano lowu u wu endleke ni nandza wa wena,

U sandzile harhi ya yena, u yi cukumete hansi,

₄₀U mbundzumuxile rirhangu hinkwaro ra yena.

U endlile makhokholo ya yena marhumbi.

₄₁Vahundzi hinkwavo va yiva swa yena;

U endliwile xisandzu eka vanakulobye.

₄₂U tlakusile voko ra xinene ra vaxanisi va yena;

U tsakisile vavengi hinkwavo va yena.

₄₃U bvinyile ku kariha ka tlhari ra yena;

A ku n'wi tiyisanga eku lweni.

₄₄U herisile ku kwetsima ka yena;

U mbundzumuxile hansi xiluvelo xa yena.

₄₅U komisile masiku ya vuntshwa bya yena,

U n'wi khomisile tingana.

₄₆Oho Yehovha, u ta tifihla ku yisa kwihi?

Vukari bya wena byi ta pfurha tani hi ndzilo ku fika kwihi?

₄₇Anakanya vutomi bya mina, leswaku byi komile,

Ni leswaku u endlele swahava vana hinkwavo va vanhu.

₄₈U kwihi munhu la hanyaka, a nga tiki vona rifu xana?

U kwihi la nga kutsulaka moya wa yena exivandleni xa vafi-ke?

₄₉Oho Yehovha, ti kwihi tintswalo ta wena leto sungula,

Leti u nga hlambanyela Davhida ha tona hi ku tshembeka ka wena?

₅₀Oho Yehovha, anakanya tingana ta malandza ya wena,

Ni leswaku ndzi rhwala exifuveni xa mina xisandzu xa matiko layo tala.

₅₁Oho Yehovha, anakanya swisolo swa valala va wena!

Xisolo lexi va solaka mitila ya muhlawuriwa wa wena ha xona.

₅₂A ku khensiwe Yehovha hi masiku!