TIPISALEMA 94

₁Oho Yehovha, Xikwembu xa ku rihisela!

Xikwembu xa ku rihisela, tivonakarise!

₂Pfuka Muavanyisi wa misava!

U nyika vatikukumuxi hakelo ya vona!

₃Oho Yehovha, lavo homboloka, va ta fika kwihi,

Lavo biha va ta tsaka ku yisa kwihi?

₄Va vulavula hi ku tikukumuxa;

Hinkwavo lava dyohaka va tidzunisa.

₅Oho Yehovha!

Va kandziyela tiko ra wena;

Va xanisa ndzhaka ya wena;

₆Va dlaya nsati wa noni ni n'eni,

Va lovisa swisiwana.

₇Va ku: “Yehovha a nga swi voni,

Xikwembu xa Yakobo a xi swi endli mhaka!”

₈Tivoneleni n'wina vavanuna va mitlunya!

Na n'wina swihunguki, mi ta tlhariha rini?

₉La nga mirisa ndleve, a nga ka a nga twi xana?

La nga vumba tihlo, a nga ka a nga voni xana?

₁₀La layaka matiko, a nga ka a nga tshinyi xana?

Kasi hi yena la dyondzisaka vanhu vutlhari.

₁₁Yehovha u tiva miehleketo ya vanhu leswaku i swahava.

₁₂Ku katekile munhu loyi u n'wi layaka, Yehovha!

Loyi u n'wi dyondzisaka hi nawu wa wena.

₁₃U ta n'wi rhulisa loko masiku ya khombo ma humelela,

Ku kondza rindzi ri celeriwa lowo biha.

₁₄Hikuva Yehovha a nga ka a nga cukumeti tiko ra yena,

A nga tshiki ndzhaka ya yena.

₁₅Hikuva ku avanyisa ku ta tlhelela eku lulameni,

Kutani hinkwavo va timbilu to lulama va ta ku khensa.

₁₆I mani la nga ta ndzi lwela eka lavo biha?

Ni ku ndzi pfuna emahlweni ka vadyohi?

₁₇Loko ngi Yehovha a nga ndzi pfunanga,

Moya wa mina ingi wu yile exivandleni xa ku miyela.

₁₈Kakuloko ndzi ku:

“Nenge wa mina wu rhetemuka!”

Vunene bya wena, Yehovha, byi ndzi seketela.

₁₉Mbilu ya mina loko yi tele mivilelo,

Ku chavelela ka wena ku tsakisa moya wa mina.

₂₀Xana u nga va ni ku hlangana ni xiluvelo xa vahomboloki,

Vona lava sorisaka nawu xana?

₂₁Va rhambanela moya wa lowo lulama,

Va avanyisa ngati ya la nga riki na nandzu.

₂₂Kambe Yehovha i khokholo ra mina.

Xikwembu xa mina i ribye ra xichavelo xa mina.

₂₃U ta vuyisela ka vona ku homboloka ka vona,

U ta va herisa hi vudyohi bya vona;

Ina, Yehovha, Xikwembu xa hina u ta va herisa.