NHLAVUTELO 9

₁Ntsumi ya vuntlhanu yi yimba nanga, kutani ndzi vona nyeleti leyi humaka etilweni, yi wele emisaveni; kutani ntsumi yi nyikiwa mpfungura wa khele ra tihele. ₂Kutani yi pfula khele ra tihele, kutani ku huma ekheleni musi lowu fanaka ni musi wa hondo lowukulu; kutani dyambu ni mpfhuka swi hundzuka ntima hi musi lowu humaka ekheleni. ₃Kavaloko tinjiya ti huma emusini, ti ta emisaveni, ti nyikiwe matimba ya swipame swa misava. ₄Kutani ti lerisiwa leswaku ti nga tshuki ti onha byanyi bya misava, hambi swi ri hinkwaswo swa rilambyana, ni mirhi hinkwayo, kambe ti xanisa vanhu ntsena lava nga riki na mfungho wa Xikwembu emimombyeni ya vona. ₅Kambe ti nyikiwa ku nga ri ku va dlaya, kambe ku va xanisa hi tin'hweti ta ntlhanu; ku vavisa ka tona a ku fana ni ku vavisa ka xipame loko xi luma munhu. ₆Emikarhini yoleyo, vanhu va ta lava rifu kambe va nga ka va nga ri kumi; va ta navela ku fa, kambe rifu ri ta va balekela. ₇Xivumbeko xa tinjiya teto a xi fana ni xa tihanci leti lunghiseriweke ku lwa; ti rhwele etinhlokweni ta tona leswi fanaka ni tihari ta nsuku; mimombo ya tona a yi fana ni mimombo ya vanhu. ₈Kambe a ti ri ni misisi kukotisa misisi ya vavasati; meno ya tona a ya fana ni meno ya tinghala. ₉A ti ri ni swisirhelelo eswifuveni kukota swisirhelelo swa nhumbu, mpfumawulo wa timpapa ta tona a wu fana ni mpfumawulo wa tigolonyi ta tihanci leto tala, lama tsutsumelaka enyimpini. ₁₀A ti ri ni micila leyi kotisaka ya swipame ni mindzhombo emicileni ya tona. A ti ri ni matimba ya ku xanisa vanhu hi tin'hweti ta ntlhanu. ₁₁A ti fumiwa hi hosi, yi nga ntsumi ya khele; vito ra yona hi Xiheveru, i Abadoni; hi Xigriki, i Apoliyoni. ₁₂Ku hundzile khombo ro sungula; vonani, ka ha ta makhombo mambirhi endzhaku ka rona.

₁₃Ntsumi ya ntlhanu na yin'we yi yimba nanga, kutani ndzi twa rito leri humaka etimhondzweni ta alitari ya nsuku, leyi nga emahlweni ka Xikwembu, ₁₄ri ku eka ntsumi ya ntlhanu na yin'we leyi ngi yi ri ni nanga: “Ntshunxa tintsumi ta mune leti kulekiweke enambyeni lowukulu wa Yufrata.” ₁₅Kavaloko ku tshunxiwa tintsumi leta mune, leti lunghiseriweke nkarhi, ni siku, ni n'hweti, ni lembe, leswaku ti dlaya ku avanyisa ka vunharhu ka vanhu. ₁₆Vunyingi bya mavandla bya lava khandziyeke tihanci a byi ri bya madzana mambirhi ya timiliyoni (200 000 000), ndzi twile ntsengo wa tona. ₁₇Emahlorini ya mina ndzi vonisa sweswo tihanci ni lava ti khandziyeke va ri ni swisirhelelo leswi fanaka ni ndzilo, ni yakinta, ni xivavula; tinhloko ta tihanci a ti fana ni tinhloko ta tinghala; ku huma emilon'wini ya tona ndzilo, ni musi, ni xivavula. ₁₈Ku avanyisa ka vunharhu ka vanhu ku dlawa hi ku biwa kanharhu loku: Hi ndzilo, ni musi, ni xivavula leswi humaka emilon'wini ya tona; ₁₉hikuva matimba ya tihanci a ma ri emilon'wini ya tona ni le micileni ya tona; micila ya tona a yi fana ni tinyoka leti nga ni tinhloko leti ti onhaka ha tona. ₂₀Kambe vanhu lava seleke, lava nga dlayiwangiki hi makhombo walawo, a va hundzukanga emitirhweni ya mavoko ya vona; a va tshikanga ku gandzela mademona, ni swifaniso swa nsuku, ni swa silivhere, ni swa koporo, ni swa maribye, ni swa mitsandze, leswi nga voniki, ni ku yingisa, ni ku famba. ₂₁Kutani a va hundzukanga eku dlayeni ka vona, ni le vungomeni bya vona, ni le vuoswini bya vona, ni le ku yiveni ka vona.