VARHOMA 11

₁Kambe ndzi ri: Xana Xikwembu xi cukumetile tiko ra xona xana? E-e! Niswitsanana! Hikuva na mina ndzi Muisraele, wa rixaka ra Abrahama, wa nyimba ya Benjamini. ₂Xikwembu a xi cukumetanga tiko ra xona, leri xi ri tiveke eku sunguleni. Xana a mi swi tivi leswi Tsalwa ri swi vulaka ehenhla ka Eliya, hilaha a nga rila eka Xikwembu hikwalaho ka Israele, a ku: ₃“Hosi, va dlele vaprofeta va wena, va hlanhlile magandzelo ya wena, kutani mina ndzi sele ndzi ri swanga, kutani va lava ku ndzi dlaya!” ₄Kambe Xikwembu xi n'wi hlamurise ku yini xana? Xi te: “Ndzi tihlayisele vavanuna va ntlhanu wa makume na makume mambirhi ya madzana, lava nga khinsamangiki emahlweni ka Baali.” ₅Swi tano ni le mikarhini yoleyi; ku sele ntlawanyana lowu nga kona hi ku hlawuriwa ka tintswalo. ₆Kambe loko ku ri hi tintswalo, a ka ha ri hi mitirho; hikuva loko ku ri hi mitirho, tintswalo a ti nga ha vi tintswalo.

₇Swo vini kutani? Lexi Israele a nga xi lava, a nga xi kumanga, kambe vahlawuriwa va xi kumile; kasi van'wana va nonon'hwisiwile, ₈kukota leswi ku tsariweke leswaku: “Xikwembu xi va nyikile moya wa vurhongo, ni mahlo lama nga voniki, ni tindleve leti nga twiki; ni namuntlha swa ha ri tano.” ₉Davhida, na yena, u te: “Tafula ra vona ri va hundzukele ntlhamu ni rindzi, ni ku khunguvanyeka, ni ku rihisiwa! ₁₀A ku nyamisiwe mahlo ya vona leswaku ma nga voni ni mihlana ya vona a yi herheke hi masiku.”

₁₁Kambe ndzi ri: “Xana va khunguvanyekele makumu xana?” Niswitsanana! Kambe hi ku wa ka vona, ku hlayiseka ku fikele vamatiko, leswaku va ta va pfuxa hi mona. ₁₂Kutani loko ku wa ka vona ku hundzukile ndzalo ya vamatiko, ku hundzuka ka vona hinkwavo ku ta va loko tano swonghasi!

₁₃Ndzi byela n'wina vamatiko, hikuva ndzi muapostola wa vamatiko, ndzi dzunisa ntirho wa mina ₁₄leswaku, kumbe ndzi ta pfuxa va nyama ya mina hi rilondzo, ndzi ponisa van'wana va vona. ₁₅Hikuva loko ku tshiketiwa ka vona ku hundzukile ku hlanganisiwa ka misava, ku amukeriwa ka vona ku ta va yini, loko ku nga ri ku pfuka ka lava feke xana?

₁₆Loko swirhangana swi kwetsimile, vunyingi, na byona, byi kwetsimile; kutani loko rimitsu ri kwetsimile, marhavi, na wona, ma tano. ₁₇Kambe loko marhavi man'wana ma phatluriwile, kutani wena, mutlhwari wa nhova, u tlhomiwile eka wona, kutani u hlanganisiwile ni rimitsu, u phameriwa mafurha ya mutlhwari wa le kaya, ₁₈u nga tshuki u tikukumuxa, u sandza marhavi ya kona; hikuva hambi u tikukumuxisa xisweswo, a hi wena la rhwalaka rimitsu, kambe rimitsu, hi rona leri ku rhwalaka. ₁₉Kambe u ta ku: “Marhavi ma phatluriwile leswaku ndzi tlhomiwa ematshan'weni ya wona.” ₂₀Hi swona; ma phatluriwile hikwalaho ka ku kala ku pfumela; kambe wena u yima hi ku pfumela, u nga tshuki u tikukumuxa, kambe u chava. ₂₁Hikuva, leswi Xikwembu xi nga tsetselelangiki marhavi ya xiviri, xi nga ka xi nga ku tsetseleri, na wena.

₂₂Hikwalaho, tsundzuka tintswalo ta Xikwembu, ni tihanyi ta xona; tihanyi ehenhla ka lava weke, ni tintswalo ehenhla ka wena, loko u tiyisela etintswalweni teto; hikuva loko u nga tiyiseri kona, u ta tsemiwa, na wena.

₂₃Na vona loko va nga tshami eku kaleni ka ku pfumela, va ta tlheriseriwa emutlhwarini; hikuva Xikwembu xi ni matimba ku va tlherisela kona. ₂₄Hikuva leswi wena u tekiweke emutlhwarini lowu nga wa nhova hi ntumbuluko, u nghenisiwile emutlhwarini wa le kaya, hi mukhuva lowu nga riki wa ntumbuluko, ngopfungopfu marhavi lama nga wona hi xiviri, ma ta tlhomiwa emutlhwarini lowu nga wona.

₂₅Hikuva, vamakwerhu, a ndzi swi rhandzi leswaku mi fihleriwa xihundla lexi, mi nga ti tshuka mi tiendla lavo tlhariha: swi ri leswaku ku nonon'hwa ku humelele Vaisraele hitlhelo rin'wana, ku tala ka vamatiko ku ko ku nghena; ₂₆kutani hi mukhuva wolowo, Vaisraele hinkwavo va ta hlayisiwa, hilaha ku tsariweke leswaku: “Mukutsuri u ta huma eSiyoni, u ta susa xisandzu eka Yakobo”; ₂₇“kutani hi wona ntwanano lowu ndzi nga ta va tiyisela wona, siku ndzi susaka swidyoho swa vona.” ₂₈Kunene, hitlhelo ra Evhangeli, i valala hikwalaho ka n'wina; kambe hitlhelo ra ku hlawuriwa, va ha ri varhandziwa hikwalaho ka vatatana va vukulukulu, ₂₉hikuva ku nyika ka Xikwembu, ni ku vitana ka xona, a ku na ku hundzuka. ₃₀Kutani kukota leswi na n'wina, eku sunguleni, a mi nga yingiseri Xikwembu, kasi sweswi, mi tsetseleriwile hikwalaho ka ku tiarisa ka vona; ₃₁hi mukhuva wolowo, na vona, va hundzuke lava nga yingisiki, hi ku tsetselela loku mi humeleleke, leswaku, na vona, va tsetseleriwa. ₃₂Hikuva Xikwembu xi pfalele hinkwavo eku tiariseni, leswaku xi ta va tsetselela hinkwavo.

₃₃Oho! A hi ku enta ka rifuwo, ni ka vutlhari, ni ka vutivi bya Xikwembu! Ku avanyisa ka xona a ku twisisiwi, ni tindlela ta xona a ti tiviwi! ₃₄“Hikuva i mani la nga tivaka ku anakanya ka Hosi, kumbe i mani la nga mutsundzuxi wa yona?” ₃₅“Kumbe i mani la yi nyikeke nchumu eku sunguleni, wu ta tlherisiwa eka yena.” ₃₆Hikuva swilo hinkwaswo swi hume eka yena, swi kona eka yena, kambe swi endleriwa yena! Ku kwetsima a ku ve eka yena hilaha ku nga heriki! Amen!