VARHOMA 4

₁Loko swi ri tano, hi ta ku yini? Xana Abrahama, tata wa hina u fuwe yini hitlhelo ra nyama-ke? ₂Hikuva loko hi nga ku: Abrahama u hlayiwile la lulameke hikwalaho ka mitirho, u ni nkarhi wa ku tidzunisa; kambe ku nga ri emahlweni ka Xikwembu. ₃Hikuva Tsalwa ri te yini? Ri te: “Abrahama u pfumerile eka Xikwembu, kutani u hlayeriwe swona leswaku i ku lulama ka yena.” ₄Kasi, loko yi ri hakelo ya la tirhaka, a yi hlayiwi leswaku i tintswalo, kambe va ri i nandzu. ₅Kutani la nga tirhiki, kambe a pfumela ntsena eka la khanisaka mudyohi, ku pfumela ka yena ku hlayiwa leswaku i ku lulama.

₆Kukota loko na yena Davhida a vula ku kateka ka munhu loyi Xikwembu xi n'wi hlayaka la lulameke ku nga ri hi mitirho, loko a ku: ₇“Ku katekile lava rivaleriweke ku homboloka ka vona, lava swidyoho swa vona swi funengetiweke! ₈Ku katekile munhu loyi Hosi yi nga n'wi hlayeriki ku dyoha ka yena.”

₉Loko swi ri tano, xana ku kateka loku ku tela lavo yimba ntsena xana? Xana a ku teri na vona lava nga yimbangiki xana? Hikuva ha ha ku vula leswaku Abrahama u hlayeriwile ku pfumela ka yena ku lulama. ₁₀Xana u hlayeriwe a lo yini? Xana hi loko a yimbile, kumbe loko a nga si yimba? A hi loko a yimbile, kambe loko a nga si yimba. ₁₁Kutani a nyikiwa mfungho wa ku yimba ku tiyisa ku lulama ka ku pfumela, loku ngi a ri na kona loko a nga si yimba, leswaku a va tata wa hinkwavo lava pfumelaka hambi va nga yimbanga, leswaku na vona va hlayeriwa ku lulama; ₁₂ni leswaku a va tata wa lavo yimba na vona va nga ri lavo yimba ntsena, kambe va ri lava fambaka hi mitila ya ku pfumela, loku tata wa hina Abrahama ingi a ri na kona, loko a nga si yimba.

₁₃Hambi ku ri ku hlayeriwa leswaku a ta va mudyandzhaka wa misava, a ku nyikiwanga Abrahama ni vatukulu va yena hi nawu kambe ku nyikiwile hi ku lulama ka ku pfumela. ₁₄Hikuva loko vadyandzhaka va ri vona hi nawu, ku pfumela ku hundzukile xilo xa hava, na kona ku tshembisiwa ku herisiwile, ₁₅hikuva nawu wu humesa vukari, hikuva laha nawu wu nga riki kona, ni ku tlula a ku kona.

₁₆Hikwalaho-ke, swi humelele hi ku pfumela, leswaku swi endliwa hi tintswalo, leswaku ku tshembisa ka Xikwembu ku ta tiya eka rixaka hinkwaro, ku nga ri eka rixaka leri nga rona hi nawu ntsena, kambe ku va ni ka leri nga rona hi ku pfumela ka Abrahama, loyi a nga tata wa hina hinkwerhu, ₁₇kukota leswi ku tsariweke leswaku: “Ndzi ku vekile tata wa matiko layo tala”; u tano emahlweni ka Xikwembu lexi a pfumeleke eka xona, lexi hanyisaka lava feke, kutani xi vitana swilo leswi nga riki kona kukota loko ngi swi ri kona.

₁₈Abrahama u pfumele hi ku tshemba, hambi wu nga ri nkarhi wa ku tshemba, kutani u endliwile hakona tata wa matiko layo tala, hi leswi a swi byeriweke leswaku: “Rixaka ra wena ri ta va lero tano.” ₁₉Kutani, hikuva a nga tsanangi eku pfumeleni, a nga hlayangi miri wa yena lowu ngi wu file (kasi malembe ya yena a ma lava ku va dzana), a nga hlayanga ni ku fa ka mbeleko ya Sara; ₂₀kutani a nga vilelanga hi ku tshembisa ka Xikwembu hi ku ka a nga pfumeri; ntsena a tiyisiwa hi ku pfumela, a ri karhi a dzunisa Xikwembu, ₂₁a kholwa swinene leswaku la n'wi tshembiseke u ni matimba ya ku endla; ₂₂hikwalaho, ku pfumela koloku, u ku hlayeriwile ku lulama.

₂₃Kambe loko ku tsariwile leswaku u ku hlayeriwile ku lulama, a ku vuriwi yena a ri swakwe, ₂₄kambe ku vuriwa na hina, leswaku hi ta ku hlayeriwa, hina lava pfumelaka ka loyi a pfuxeke Yesu, Hosi ya hina, eku feni, ₂₅a nga yena la nyiketiweke hikwalaho ka ku dyoha ka hina, kutani u pfuxiwile hikwalaho ka ku khanisiwa ka hina.