1Ndzi xiluva xa le Xaroni, ndzi khon'wa ya mikova.
2Kukotisa khon'wa exikarhi ka mitwa,
Swi tano ni murhandziwa wa mina exikarhi ka vanhwanyana.
3Kukotisa murhi wa maapula exikarhi ka mirhi ya xihlahla,
Swi tano ni murhandziwa wa mina exikarhi ka majaha.
Ndzi naverile ku tshamisa ehansi ka ndzhuti wa yena
Mbhandzu wa yena wu nandziha emalakeni ya mina.
4A ndzi yisa endlwini ya vhinyo,
Xikombiso xa yena ehenhla ka mina i rirhandzu.
5Ndzi tiyiseni hi swimbundzu swa vana va vhinya,
Mi ndzi tsakisa hi maapula hikuva ndza vabya hi rirhandzu.
6Voko ra yena ra ximatsi a ri ve ehansi ka nhloko ya mina,
A a ndzi vukarhe hi lera xinene.
7Ndza mi lerisa, n'wina vanhwanyana va Yerusalema,
Hi timhala, ni timbavala ta le nhoveni,
Leswaku mi nga n'wi hiti, ni loko ku ri ku pfuxa murhandziwa wa mina,
A nga si swi rhandza.
8I rito ra murhandziwa wanga!
Vona, wa ta,
U tsemakanya ehenhla ka tintshava,
A tlula ehenhla ka switsunga.
9Murhandziwa wa mina u fana ni mhala,
Kumbe rhole ra mbavala:
Vona, u yime endzhaku ka rihlampfu ra rikwerhu,
U languta hi mafasitere, u hlometela hi fasitere.
10Murhandziwa wa mina a vulavula, a ku eka mina:
“Pfuka, murhandziwa wanga, xisaseki xa mina, u ta.
11Hikuva vona, xixika xi hundzile,
Mpfula yi xile, yi mukile,
12swiluva swa baleka etikweni;
Nkarhi wa miloti ya tinyanyana wu fikile,
Rito ra tuva ra twakala etikweni ra rikwerhu.
13Murhi wa nkuwa wu humesa mihandzu ya wona leya rilambyana,
Ni tivhinya ti neha risuna lero nandziha.
Pfuka, murhandziwa wa mina, xisaseki xa mina, u ta!
14Tuva ra mina, leri nga emipatseni ya maribye,
Ni le mabakweni ya mawa,
ndzi kombise mombo wa wena,
a ndzi twe rito ra wena;
Hikuva ra nandziha rito ra wena,
ni mombo wa wena wu sasekile.
15Hi khomeleni timhungubye,
ni swimhungubyana leswi onhaka tivhinya;
Hikuva tivhinya ta hina ti ni mihandzu leya ku olova.”
16Murhandziwa wa mina i wa mina,
mina ndzi wa yena;
U dyisela mitlhambi ya yena exikarhi ka makhon'wa,
17Ri kondza ri xa, ni mindzhuti yi ko yi muka,
Vuya, murhandziwa wa mina,
U fana ni mhala, kumbe mbavala leyitsongo,
Etintshaveni leti hi hambanyisaka.
