RISIMU RA TINSIMU 4

₁Vona, u sasekile, murhandziwa wa mina;

u sasekile swonghasi!

Mahlo ya wena i matuva ehansi ka xisirhelo xa wena;

Misisi ya wena yi fana ni ntlhambi wa timbuti,

Lowu vonakaka entshaveni ya Giliyadi.

₂Meno ya wena ma fana ni ntlhambi wa tinyimpfu leti tsemeriweke,

Leti pfaka eku hlantswiweni;

Hinkwato ti veleke mahahla,

A ku na yin'we exikarhi ka tona leyi nga nyumba.

₃Milomu ya wena yi fana ni ngoti ya xivunguvungu;

Mavulavulele ya wena ma nandziha,

Marhama ya wena ma fana ni swiphemu swa girenada

Ehansi ka xisirhelo xa wena.

₄Nhamu ya wena yi fana ni khokholo ra Davhida

Leri akeriweke matlhari,

Laha ku hayekiwaka kona switlhangu swa khume ra madzana;

Hinkwaswo i switlhangu swa tinhenha.

₅Mavele ya wena ha mambirhi ma kotisa timbavala letitsongo.

Ta mahahla ha timbirhi leti dyelaka exikarhi ka makhon'wa.

₆Ku fikela loko byi xa, mindzhuti yi suka,

Ndzi ta ya entshaveni ya mirha, ni le switsungeni swa mirhi ya risuna.

₇Murhandziwa wa mina, u sasekile swonghasi!

A ku na xisandzu eka wena.

₈Tana hi muka eLebanoni, muvutiwa wa mina,

U yima, u languta u ri enhlohlorhini ya Amana,

Enhlohlorhini ya Seniri na Hermoni,

Evuchavelweni bya tinghala, etintshaveni ta tiyingwe.

₉U teke mbilu ya mina, makwerhu muvutiwa wa mina,

U teka mbilu ya mina hi tihlo rin'we ra wena,

Hi nketana yin'we ya nhamu ya wena.

₁₀A hi ku nandziha ka rirhandzu ra wena, makwerhu, muvutiwa wa mina!

Rirhandzu ra wena ri nandziha swonghasi, ri tlula vhinyo;

Ku nun'hwela ka wena ku tlurisa mirhi hinkwayo ya risuna!

₁₁Milomu ya wena, muvutiwa wa mina,

yi ntshona vulombe;

Vulombe ni ntswamba swi le hansi ka ririmi ra wena;

Ku nun'hwela ka swifunengelo swa wena

ku fana ni ku nun'hwela ka Lebanoni.

₁₂Makwerhu, muvutiwa wa mina, u nsimu leyi biyeriweke,

U xihlovo lexi pfariweke, ni xihlovo lexi tiyisiweke.

₁₃Swimila swa wena i nsimu ya mirhi ya girenada,

Ya mihandzu leyo nandziha, ni tikipresi, ni tinarda.

₁₄Narda ni safroni, ni rihlanga, ni sinamoni,

Ni mirhi hinkwayo leyi nun'hwelaka;

Mirha ni mhangana, ni hinkwaswo leswa risuna.

₁₅U xihlovo xa masimu,

U nseledyana wa mati lama pfelelaka,

Ni milambu leyi pfaka eLebanoni.

₁₆Pfuka, moya wa le n'walungwini!

U ta, wena dzonga!

Mi hungela ensin'wini ya mina,

Leswaku ku nun'hwela loku nandzihaka ka yona ku twakala.

Murhandziwa wa mina a a nghene ensin'wini ya yena,

A dya mihandzu ya yona leyo nandziha.