ZAKARIYA 6

₁Ndzi engeta ndzi tlakusa mahlo, ndzi languta, kutani ndzi vona ku humelela tigolonyi ta mune leti humaka exikarhi ka tintshava timbirhi, tintshava teto ti ri ta koporo. ₂Egolonyini yo sungula a ku ri ni tihanci to tshwuka; egolonyini ya vumbirhi ti ri tihanci ta ntima; ₃egolonyini ya vunharhu ti ri tihanci to basa; egolonyini ya vumune ti ri tihanci ta mavala ta matimba. ₄Ndzi byela ntsumi leyi ngi yi vulavula na mina, ndzi ku: “Sweswo ntswini hosi yanga?” ₅Kutani ntsumi yi ndzi angula, yi ku: “Sweswo i mimoya ya mune ya tilo leyi humaka laha yi nga yima emahlweni ka Hosi ya misava hinkwayo. ₆Tihanci ta golonyi yin'wana, ti ri leta ntima, ti humela etikweni ra n'walungu, to basa ti landzela mitila ya tona; ta mavala ti humela etikweni ra le dzongeni,” ₇loko ti ri leta matimba, ti huma ti tiyisela ku suka, ti ya fambafamba emisaveni. Ntsumi yi ku: “Sukani, mi tsendzeleka emisaveni.” Kutani ti tsendzeleka emisaveni. ₈Ntsumi yi ndzi vitana, yi ku eka mina: “Vona leti humelaka etikweni ra le n'walungwini ti yisa Moya wa mina etikweni ra n'walungu.”

₉Rito ra Yehovha ri ta eka mina, ri ku: ₁₀“Teka mihlengo ya lava humaka evukhumbini, ya Helidayi, na Tobiya, na Yedaya, u ya hi siku leri, endlwini ya Yosiya, n'wana Sofoniya, laha va fikeleke kona, loko va huma eBabilona. ₁₁U teka silivhere ni nsuku, u endla ha swona harhi ya vuhosi, u yi veka enhlokweni ya Yoxuwa, muprista lonkulu, n'wana Yosadaki. ₁₂U ku eka yena: ‘Ku vuriwile hi Yehovha wa tinyimpi: “Vonani, wanuna loyi, vito ra yena a nga Xihluke, u ta mila ematshan'weni ya yena, u ta aka yindlu ya Yehovha. ₁₃Hi yena la nga ta aka yindlu ya Yehovha, u ta funengela ku kwetsima, u ta tshama a ri hosi exiluvelweni xa yena, kambe u ta va muprista exiluvelweni xa yena; kutani makungu ya ku rhula ma ta va kona exikarhi ka vumbirhi byebyo.” ’ ₁₄Loko yi ri harhi, yi ta vekiwa endlwini ya Yehovha, xi va xitsundzuxo xa Heleme, ni xa Tobiya, ni xa Yedaya, ni xa Heni n'wana Sofoniya. ₁₅Lava nga ekule va ta ta va ta aka yindlu ya Yehovha; kutani mi ta tiva leswaku Yehovha wa tinyimpi u ndzi rhumile eka n'wina; swi ta va tano, loko kunene mi yingisa rito ra Yehovha, Xikwembu xa n'wina.”