I Tikronika 18

₁Endzhaku ka timhaka teto, Davhida a tlhela a lwa ni Vafilista a va hlula, a heta matimba ya mfumo wa vona, a va tekela muti wa Gati ni swimitana swa wona.

₂Kutani a hlula Vamowabu, va va hansi ka yena, va humesa ndzuvo va n'wi luva.

₃Loko Davhida a ri le Hamata, a hlula Hadadi-Ezere hosi ya le Soba loyi a a ringeta ku fikisa mfumo wa yena ematlhelweni ya nambu wa Yufrata. ₄Davhida a khoma makalichi ya Hadadi-Ezere ya 1 000, ni vagadi va tihanci va 7 000, a khoma ni ntlawa wa masocha ya 20 000 lawa a ma famba hi milenge; naswona Davhida a lerisa leswaku tihanci hinkwato ta makalichi ti lamatiwa hi ku tsemiwa minsiha ya milenge, a siya leti ringanaka ku koka makalichi ya dzana ntsena. ₅Loko Vasiriya va le Damaska va ya phalala Hadadi-Ezere hosi ya le Soba, Davhida a lwa na vona, a dlaya vavanuna va 22 000. ₆Kutani Davhida a veka mintlawa ya varindzi leswaku va rindza Vasiriya va le Damaska, kwalaho Vasiriya va va ehansi ka mfumo wa Davhida, va humesa ndzuvo va n'wi luva. HOSI Xikwembu a xi nyika Davhida ntamu wa ku hlula valala va yena hinkwako lomu a a famba a ya lwa kona. ₇Davhida a teka switlhangu swa nsuku leswi a swi tirhisiwa hi tinhenha ta Hadadi-Ezere, a ya na swona eYerusalema. ₈Emitini ya Tibihata na Kuni leyi a yi ri hansi ka Hadadi-Ezere, Davhida a phangha koporo leyo tala, leyi Solomoni a nga vumba ha yona nhlambeto leyikulu leyi vuriwaka “lwandle”, leyi a nga yi tirhisa ni ku vumba tiphuphu ta koporo kun'we ni swingolongondzwana swin'wana.

₉Loko Tohu hosi ya le Hamata a twa leswaku Davhida ú hlurile mavuthu hinkwawo ya Hadadi-Ezere hosi ya le Soba, ₁₀a rhumela n'wana wa yena Hadorama ku ya pfuxela Davhida, ni ku nkhensa leswi a hluleke Hadadi-Ezere enyimpini, hikuva Tohu na Hadadi-Ezere a va tshamela ku lwa. Hadorama a famba a tamele tinyiko ta nsuku, ni ta silivhere, ni ta koporo. ₁₁Davhida a teka tinyiko leti, a ti veka etlhelo leswaku ti ta tirhiseriwa HOSI Xikwembu, a veka etlhelo ni swingolongondzwana hinkwaswo swa nsuku ni swa silivhere, leswi a swi phangheke etikweni ra Vaedomu, ni ra Vamowabu, ni ra Vaamoni, ni ra Vafilista, ni ra Vaamaleke.

₁₂Abixayi n'wana Seruya ú dlayile Vaedomu va 18 000 eka “Nkova wa Munyu”, ₁₃kutani a veka varindzi etikweni ra Edomu. Hi mukhuva wolowo, Vaedomu hinkwavo va va ehansi ka mfumo wa Davhida. HOSI Xikwembu a xi nyika Davhida ntamu wa ku hlula valala va yena hinkwako lomu a a ya kona.

₁₄Kutani Davhida a fuma tiko hinkwaro ra Israele. A a fambisa vanhu va yena hinkwavo hi moya wo lulama, a nga yi hi nghohe.