I Yohane 3

₁Ma nga vona rirhandzu lerikulu leri Tatana a hi rhandzaka ha rona, ku fika laha hi vuriwaka vana va Xikwembu; nisweswi, hi vona. Lexi endlaka leswaku misava yi nga hi tivi, i mhaka ya leswi yi nga n'wi tivangiki. ₂Varhandziwa, sweswi hi vana va Xikwembu. A swi si tikomba swinene leswi hi nga ta va swona, kambe ha swi tiva leswaku loko Kriste a humelela, hi ta fana na yena, hikuva hi ta n'wi vona hi xiviri xa yena. ₃Kutani un'wana ni un'wana loyi a n'wi tshembaka, ú tihlayisa a tshama a tengile, tanihi leswi yena a tengeke.

₄Un'wana ni un'wana loyi a dyohaka, ú ni nandzu wa ku hanya ehandle ka Nawu. Ku dyoha i ku hanya ehandle ka Nawu. ₅Ma swi tiva leswaku Kriste ú humelele ku ta susa swidyoho, kutani eka yena ku hava ku dyoha. ₆Ku hava ni un'we la tshamelaka ku dyoha, loko a ri eka yena. Un'wana ni un'wana la tshamelaka ku dyoha, a nga n'wi vonanga, naswona a nga n'wi tivanga.

₇Vana vanga, mi nga pfumeli ku xisiwa hi munhu ni un'we. Loyi a endlaka leswo lulama ú lulamile, kukota leswi Kriste a lulameke. ₈Loyi a tshamelaka ku dyoha i wa Diyavulosi, hikuva Diyavulosi ú dyohile ku sukela eku sunguleni. Lexi N'wana wa Xikwembu a humeleleke ku ta endla xona, a ku ri ku ta herisa mintirho ya Diyavulosi.

₉Ku hava ni un'we loyi a tshamelaka ku dyoha, loko a tswariwile hi Xikwembu, hikuva mbewu ya Xikwembu yi mirile eka yena, kutani a nga ka a nga ha tshameli ku dyoha, hikuva ú tswariwile hi Xikwembu. ₁₀Ku hambana exikarhi ka vana va Xikwembu ni vana va Diyavulosi, ku nga vonaka hi ndlela leyi: Hileswaku un'wana ni un'wana loyi a nga endliki leswo lulama, kumbe loyi a nga rhandziki makwavo, a hi wa Xikwembu.

₁₁Rito leri hi ri tweke ku sukela eku sunguleni, hileswaku hi fanele ku rhandzana. ₁₂Hi nga fani na Kayini, loyi a a twanana na Lowo biha, kutani ú dlele makwavo. Xana ú n'wi dlele hikwalaho ka yini? Hikuva mintirho ya yena a yi ri leyo biha, kasi ya makwavo a yi ri leyo lulama.

₁₃Hikokwalaho, mi nga hlamaleni, vamakwerhu, loko misava yi mi venga. ₁₄Ha swi tiva leswaku hi humile eku feni ku ya nghena evutomini, hikuva hi rhandza vamakwerhu. Loyi a nga riki na rirhandzu, ú tshama eku feni. ₁₅Un'wana ni un'wana loyi a vengaka makwavo i mudlayi, kutani ma swi tiva leswaku ku hava mudlayi loyi vutomi lebyi nga heriki byi tshamaka eka yena. ₁₆Hi nga tiva leswi rirhandzu ri nga swona loko hi tiva Kriste, loyi a nyiketeke vutomi bya yena hikwalaho ka hina. Kutani na hina swa hi fanela ku nyiketa vutomi bya hina hikwalaho ka vamakwerhu. ₁₇Kambe loko munhu a ri ni swilo swa misava leyi, kutani a vona makwavo a ri eku pfumaleni, kambe a nonon'hwisa mbilu ya yena a nga n'wi pfuni, xana rirhandzu ro rhandza Xikwembu ri nga tshamisisa ku yini eka yena xana? ₁₈Vana vanga, hi nga rhandzaneni hi marito kumbe hi ku vulavula ntsena, kambe a ku ve hi mintirho ni ntiyiso.

₁₉Kutani, ndlela ya ku hi khorwisa leswaku hi vanhu va ntiyiso, ni ya ku tiyisa ripfalo ra hina emahlweni ka Xikwembu hi leyi: ₂₀Loko ripfalo ra hina ri hi avanyisa, hi tiva leswaku Xikwembu xi tlula ripfalo leri ra hina hi vukulu, naswona xi tiva hinkwaswo. ₂₁Varhandziwa, loko ripfalo ra hina ri nga hi avanyisi, hi ni ku tshemba emahlweni ka Xikwembu. ₂₂Hi amukela eka xona hinkwaswo leswi hi swi kombelaka, hikuva hi hlayisa milawu ya xona ni ku endla leswi xi swi tsakelaka. ₂₃Kutani hi lowu nawu wa xona: Hileswaku hi pfumela eka N'wana wa xona Yesu Kriste, ni ku rhandzana hilaha xi hi leriseke hakona. ₂₄Loyi a hlayisaka milawu ya xona, ú tshame eka xona, na xona eka yena. Kutani ndlela leyi hi tivaka leswaku xi tshame ka hina, hi leyi: Hileswaku hi ni Moya lowu xi hi nyikeke wona.