I Tihosi 17

₁Eliya wa le Tixibe, un'wana wa vaaki va tiko ra Giliyadi, a ku ka Akabu: “Ndza tiyisa emahlweni ka HOSI Xikwembu xa Israele lexi hanyaka, lexi ndzi xi tirhelaka, ndzi ri: Malembe lawa, mpfula ni mberha swi nga ka swi nga vi kona, loko ndzi nga si vula nchumu.” ₂Kutani rito ra HOSI Xikwembu ri ta eka Eliya, ri ku: ₃“Rhurha, u kongoma evuxeni, u ya tumbela exinkobyaneni xa Keriti lexi cheletaka Yordani hi tlhelo ra vuxa. ₄Mati, u ta ma kuma exinambyaneni xa kona, naswona ndzi lerisile mawukuwuku leswaku ma ku phamela kona.” ₅Kutani Eliya a yingisa rito ra HOSI Xikwembu, a khoma ndlela, a ya tshama exinkobyaneni xa Keriti lexi cheletaka Yordani hi tlhelo ra vuxa. ₆Kutani mawukuwuku ma n'wi phamela vuswa ni nyama nimixo, ma engeta ma n'wi phamela swakudya swo tano nimadyambu; mati wona, a a ma kuma exinambyaneni. ₇Endzhaku ka masiku, xinambyana xi phya, hikuva mpfula a yi nga ha ni etikweni.

₈Kutani rito ra HOSI Xikwembu ri ta eka Eliya, ri ku: ₉“Suka kwalaho u kongoma emutini wa Vasidoni lowu vuriwaka Sarepta, u ya tshama kona. Vona! Ndzi lerisile wansati wa noni kona ku ku phamela.” ₁₀Eliya a suka a kongoma eSarepta. Kutani loko a fika enyangweni ya muti, o tshuka a vona wansati wa noni loyi a a ri eku rhoteleni ka swihlahlana; a n'wi kongoma, a ku ka yena: “Hi ka manana, wa nga ndzi tisela matinyana yo nwa hi xindzhekwana!”

₁₁Loko wansati a ri karhi a ya eku keni ka mati, Eliya a n'wi yimisa a ku: “U ndzi tisela ni mpandzwa wa vuswa!” ₁₂Noni yi hlamula yi ku: “Ndzi tiyisa emahlweni ka HOSI Xikwembu xa wena lexi hanyaka: A ndzi na swo swekiwa ekaya. Ndzo va ni xandla xa mapa ntsena embiteni, ni mafurhanyana exikhudzeni. Sweswi ndzi le ku rhoteleni ka swihlahlana swi nga ri swingani, leswaku hi ya tiswekela swakudyanyana mina ni n'wana; kutani loko hi dyile, ku to sala ku va hi fa.”

₁₃Kambe Eliya a ku ka yena: “U nga chavi, famba u ya endla hilaha u nga vula hakona. Ntsena sungula hi ku ndzi swekela ximbhundzwa hi mapanyana ya kona, u ndzi tisela xona. Kutani endzhaku ka sweswo, u tiswekela swakudya, wena ni n'wana wa wena, ₁₄hikuva HOSI Xikwembu xa Israele xi vula sweswo xi ri: ‘Mapa ma nga ka ma nga heli embiteni; na wona mafurha ma nga ka ma nga kayiveli exikhudzeni, ku fikela siku leri mina HOSI ndzi nga ta nisa mpfula ha rona.’ ”

₁₅Kavaloko wansati a ya endla hilaha Eliya a n'wi leriseke hakona. Kutani va dya va xurha masiku layo tala, yena ni va ndyangu wa yena, swin'we na Eliya. ₁₆Mapa a ma helanga embiteni; hambi ma ri mafurha a ma kayivelanga exikhudzeni, hilaha HOSI Xikwembu a xi vurile hakona hi nomo wa Eliya.

₁₇Endzhaku ka timhaka leti, wansati loyi wa noni, manana wa muti, a vabyeriwa hi n'wana wa yena. Vuvabyi bya kona byi ya byi tshikelela n'wana, a ko a heleriwa hi ku hefemula. ₁₈Kavaloko wansati a ku ka Eliya: “Xana ndzi ku hoxele hi yini, we munhu wa Xikwembu? A wo ta ntsena laha ka mina ku ta paluxa ku dyoha ka mina ni ku ta dlaya n'wana wa mina!” ₁₉Kambe Eliya a ku ka wansati: “Tisa n'wana wa wena!” Kutani muprofeta a teka n'wana exifuveni xa mana wa yena, a khandziya na yena ekamarini ra le henhla laha a a etlela kona, kutani a lata n'wana esangwini. ₂₀Kutani a huwelela eka HOSI Xikwembu a ku: “We HOSI Xikwembu xanga, xana hakunene u nga vanga khombo lero tano eka noni leyi yi nga ndzi rhurhela ke, hi ku lovisa ni n'wana wa yona, xana?” ₂₁Kavaloko Eliya a pavalala kanharhu ehenhla ka n'wana, a huwelela eka HOSI Xikwembu a ku: “We HOSI Xikwembu xanga, endla leswaku moya wa n'wana loyi wu tlhela wu vuyela eka yena.” ₂₂HOSI Xikwembu xi amukela xikombelo xa Eliya: Moya wa n'wana wu tlhela wu vuyela eka yena, kutani a pfuka. ₂₃Kutani Eliya a n'wi tlakula, a rhelela na yena hi le kamarini ra le henhla, a nghena ndlwini, a n'wi yisa eka mana wa yena. Kutani Eliya a ku ka wansati: “Languta manana, n'wana wa wena wa hanya.” ₂₄Wansati a n'wi hlamula a ku: “Hakunene sweswi ndza swi tiva leswaku wena u munhu wa Xikwembu, ni leswaku rito ra xona leri humaka enon'weni wa wena i rito ra ntiyiso.”