I Tihosi 5

₁Hiramu hosi ya Tiri a twa leswaku Solomoni ú nyikiwile vuhosi bya tata wa yena hi ku cheriwa mafurha enhlokweni; hiloko a rhumela malandza ya yena eka Solomoni, hikuva hi minkarhi hinkwayo Hiramu a a ri nakulobye wa Davhida. ₂Solomoni a hlamula Hiramu hi rito leri nge: ₃“Wa swi tiva leswaku, hi mhaka ya ku hlaseriwa hi valala hi matlhelo hinkwawo, Davhida ú tsandzekile ku aka yindlu yo twarisa vito ra HOSI Xikwembu xa yena, ku fikela loko HOSI Xikwembu xi nyiketa valala va yena va va ehansi ka minkondzo ya yena. ₄Kambe masiku lawa, HOSI Xikwembu xa mina xi ndzi nyikile ku rhula matlhelo hinkwawo. Ndzi hava nala; hambi xi ri xo hiha, ndzi hava ni xin'we. ₅Hikokwalaho, ndzi ni makungu yo aka yindlu yo twarisa vito ra HOSI Xikwembu xa mina, hikuva xi tshembisile tata wa mina Davhida, xi ku: ‘N'wana wa wena loyi ndzi nga ta n'wi nyika vuhosi bya wena, hi yena la nga ta aka yindlu yo twarisa vito ra mina.’ ₆Kutani ke, lerisa vanhu leswaku va ndzi tsemela timhandze ta kedari ta le Lebanoni; malandza ya mina ma ta tirhisana ni malandza ya wena, kutani ndzi ta ku tamerisa muholo wa malandza ya wena, hi ku ya hi ntsengo lowu u nga ta wu veka, hikuva wa swi tiva leswaku, laha ka hina, vavanuna lava tivaka ku tsema timhandze kukotisa Vasidoni a va kona.”

₇Loko Hiramu a vikeriwile marito lawa ya Solomoni, a tsaka ngopfu, kutani a ku: “HOSI a yi nkhensiwe namuntlha, leswi yi nyikeke Davhida en'wana wo tlhariha ku fuma tiko lerikulu leri.” ₈Kutani Hiramu a rhumela Solomoni erito leri nge: “Mahungu lawa u nga ndzi rhumela wona, ndzi ma kumile. Ndzi tiyimisele ku endla hinkwaswo hilaha u navelaka hakona, emhakeni ya timhandze ta kedari ni ta kipresi. ₉Malandza ya mina ma ta tsema timhandze leti entshaveni ya Lebanoni ma ti rhelerisela elwandle; kona ndzi ta ti boha ti papama ematini, kutani ti ta kokeriwa endhawini leyi u nga ta ndzi komba yona, laha ti nga ta ntshunxiwa kona, u ti rhwala. Kutani wena u ta ndzi nkhensa hi ku ndzi tisela swakudya swo phamela muti wa mina.”

₁₀Hikokwalaho, Hiramu a rhumela Solomoni timhandze hinkwato ta kedari ni ta kipresi, leti Solomoni a ti kombeleke. ₁₁Loko a ri yena Solomoni, a nkhensa Hiramu hi masaka ya 20 000 ya koroni yo phamela muti wa yena, ni tinkho ta 20 ta mafurha ya risima. Solomoni ú humesile swakudya leswi lembe rin'wana ni rin'wana, a nkhensa Hiramu ha swona. ₁₂Kutani HOSI Xikwembu xi nyika Solomoni evutlhari, hilaha xi n'wi tshembiseke hakona. Hiramu na Solomoni va akisana hi ku rhula, ha vambirhi va vumba xinakulobye.

₁₃Hosi Solomoni a lerisa mintirho ya xibalo etikweni hinkwaro ra Israele, kutani ku huma vavanuna va 30 000. ₁₄A va rhumela eLebanoni, hi mintlawa yo ncincana ya vavanuna va 10 000 hi n'hweti, va tirha n'hweti eLebanoni, kutani va wisa tin'hweti timbirhi ekaya. Mulanguteri wa mintirho ya xibalo a a ri Adonirama. ₁₅Naswona, Solomoni a a ri ni vavanuna va 70 000 vo hlengeleta nhundzu, ni vavanuna va 80 000 lava a va cela maribye emagangeni. ₁₆Ehandle ka vona lava, Solomoni a a ri ni valanguteri lavakulu va 3 300 lava a va fambisa vatirhi, va kamba mintirho ya vona. ₁₇Hi ku lerisiwa hi hosi, vatirhi a va vatla maribye lamakulu ya nkoka, va endlela ku aka masungulo ya yindlu ya Tempele hi maribye ya kona. ₁₈Hi ndlela leyi vaaki va Solomoni ni vaaki va Hiramu va vatla timhandze ni maribye hi ku pfunana ni Vagebali, va lulamisa swo aka yindlu ya Tempele ha swona.