II Tikronika 31

₁Loko nkhuvo wu herile, Vaisraele hinkwavo lava a va tile enkhubyeni, va huma va ya emitini ya Yuda, va fika va fayetela maribye ya vugandzeri, va tsema ni timhandze ta Axera, va hindzimuxa tialitari ta le switsungeni leswo hlawuleka, etikweni hinkwaro ra Yuda, ni ra Benjamini, ni ra Efrayimi, ni ra Manase, va nga siyi na yin'we ya tialitari teto. Kutani Vaisraele hinkwavo va hangalaka, un'wana ni un'wana a kongoma ekaya ka yena.

₂Kutani Hezekiya a hlawula mintlawa ya vaprista ni Valevhi, un'wana ni un'wana a ri ni ntirho wa yena entlaweni wa yena; a ku ri ni vaprista ni Valevhi lava a va fambisa magandzelo lama hisiwaka ni ya xinakulobye; van'wana a va tirhela HOSI Xikwembu hi ku xi tlangela ni ku xi dzunisa hi tinsimu, etinyangweni ta yindlu ya xona. ₃Hi ku ya hi nawu wa HOSI Xikwembu, Hezekiya yena a a pambula emintlhambini ya yena, a humesa swifuwo swa magandzelo lama hisiwaka siku rin'wana ni rin'wana loko ri xa ni loko ri pela; a a humesa ni swifuwo swa magandzelo lama hisiwaka ya siku ra Savata, ni ya siku ra ku tshama ka n'weti, ni ya minkhuvo leyikulu ya lembe.

₄Naswona, Hezekiya a lerisa hinkwavo lava akeke eYerusalema ku tisele vaprista ni Valevhi leswi swi va fanelaka, leswaku va va ni matimba entirhweni lowu va rhwexiweke wona hi nawu wa HOSI Xikwembu. ₅Loko Vaisraele va twa xileriso lexi, va hatla va humesa leswi va sunguleke ha swona ku tshovela, swo kota mavele, ni vhinyo, ni mafurha, ni vulombe, ni swin'wana swa le masin'wini, va humesa ni vukhume bya swilo leswi hinkwaswo, loko va hetile ku tshovela. ₆Vanhu va Israele lava akeke emitini ya Yuda, swin'we na vona va ka Yuda, va tisa vukhume bya mintlhambi ya vona ya tihomu ni tinyimpfu, va tisa ni swa le masin'wini leswi va tiboheke ku swi nyiketa eka HOSI Xikwembu xa vona, kutani va swi fumba hi tinhulu-nhulu eTempeleni. ₇Va sungula ku tisa swilo leswi hi n'hweti ya vunharhu, va heta hi n'hweti ya vu-7. ₈Loko Hezekiya ni tindhuna ta yena va vona tinhulu ta kona, va tlangela HOSI Xikwembu, va nkhensa ni Vaisraele vanhu va xona. ₉Hosi Hezekiya a vutisa vaprista ni Valevhi hi tlhelo ra matirhisele ya tinhulu teto ta swakudya, ₁₀kutani Muprista Lonkulu Azariya wa ka Sadoki a hlamula hosi a ku: “Ndhabezitha, himpfhuka xa loko Vaisraele va sungurile ku humesa mihlengo ya vona va yi tisa haleno Tempeleni, ha dya hi xurha, swin'wana swi sala. HOSI Xikwembu xi katekisile mavoko ya vanhu va xona, kutani swilo swo tala leswi mi swi vonaka, hi leswi nga sala loko hi pamburile swa hina.”

₁₁Hezekiya a lerisa leswaku ku lulamisiwa makamari ya vuhlayiselo eTempeleni, kutani ku endliwa sweswo. ₁₂Vanhu va veka eka wona mihlengo ya vona ni tinyiko tin'wana ta vona eka Xikwembu, hinkwaswo swi hlayiseka. Mulanguteri wa makamari lawa a a ri Konaniya wa ka Levhi, xandla xa yena a ri makwa wa yena Ximeyi. ₁₃Vapfuni va Koniya ni makwavo wa yena Ximeyi, a va ri Yehiele, na Azaziya, na Nahata, na Asahele, na Yerimoto, na Yozabadi, na Eliele, na Yixi-Makiya, na Mahata, na Benaya; vanhu lava a va hlawuriwile hi hosi Hezekiya hi byakwe, na Azariya murhangeri wa mintirho hinkwayo ya Tempele. ₁₄Loyi a amukelaka tinyiko leti vanhu va ti humeselaka Xikwembu hi ku titwa, a a ri Kore n'wana Imina wa ka Levhi, mulanguteri wa nyangwa ya Tempele ya le vuxeni; naswona hi yena loyi a a pambula eka leswi humeseriwaka HOSI Xikwembu ni ka leswo hlawuleka ngopfu, a phamela ha swona vaprista ni Valevhi. ₁₅Vapfuni va yena a va ri Edeni, na Miniyamini, na Yexuwa, na Xemaya, na Amariya, na Xekaniya; vanhu lava a va chivirikela ku phakela vaprista emitini ya vona, va phamela ni Valevhi-kulobye ni vana va vona, hi ku ya hi mintlawa ya vona. ₁₆Lava phakeriwaka swakudya emitini a va ri vavanuna lava tsarisiweke etibukwini, swin'we ni vana va vona va xinuna va malembe manharhu ku ya henhla. A ku phakeriwa ni lava a va ya tirha eTempeleni siku rin'wana ni rin'wana, loko nkarhi wa ntlawa wa vona wu fikile. ₁₇Vaprista a va tsarisiwa hi ku ya hi mindyangu ya ka vona. Valevhi vona a va tsarisiwa ku sukela loko va ri ni malembe ya 20, hi ku ya hi tifanelo ta vona ni mintlawa ya vona. ₁₈Hinkwavo a va tsarisiwa swin'we ni vasati va vona ni vana va vona va xinuna ni va xisati, ni va ka vona hinkwavo, hikuva a va pfumeleriwa ku phakeriwa leswo hlawuleka minkarhi hinkwayo. ₁₉Loko va ri vaprista va ka Aroni lava akeke kusuhi ni masimu ya vona ehandle ka miti ya ka vona, a va phakeriwa hi vavanuna lava tsarisiweke etibukwini.

₂₀Hi swona leswi Hezekiya a swi tirheke etikweni hinkwaro ra Yuda, a chivirikela ku endla leswi lulameke, leswi nkhensekaka emahlweni ka HOSI Xikwembu xa yena. ₂₁Ú tinyiketile hi mbilu ya yena hinkwayo ku fambisa mintirho ya vukhongeri eTempeleni, a ri karhi a lava Xikwembu, a hlayisa milawu ya xona ni swileriso swa xona, kutani a kateka swinene.