Mintirho 1

₁Eka Teyofilo!

Ebukwini ya mina leyo rhanga, ndzi tsarile hi ta swilo hinkwaswo leswi Yesu a nga sungula ku swi endla ni ku swi dyondzisa, ₂ku ya fika siku leri a nga tlakuriwa ha rona a ya etilweni, loko a lerisile, hi Moya lowo Kwetsima, vaapostola lava a a va hlawurile. ₃Endzhaku ka loko a twisiwe ku vaviseka, ú tikombile eka vona a ri loyi a hanyaka, hi swikombiso leswo tala leswi khorwisaka; ú voniwile hi vona, hi masiku ya 40, a ri karhi a vulavula na vona hi ta Mfumo wa Xikwembu. ₄Siku rin'wana, loko a ri na vona, a va lerisa a ku: “Mi nga tshuki mi suka eYerusalema, kambe tshamani kona, mi langutela lexi Tatana a mi tshembiseke xona, lexi mi nga xi twa ndzi xi vula, ₅hikuva Yohane ú khuvurile hi mati, kambe n'wina mi ta khuvuriwa hi Moya lowo Kwetsima, endzhaku ka masiku ma nga ri mangani.”

₆Kutani loko va ha hlengeletanile va ri na Yesu, va n'wi vutisa va ku: “Hosi, xana hi wona nkarhi lowu u nga ta pfuxa mfumo wa Israele ke?” ₇Yesu a ku ka vona: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena; ₈kambe mi ta nyikiwa matimba, siku Moya lowo Kwetsima wu taka ehenhla ka n'wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun'wini ya misava.”

₉Loko a vulavurile timhaka teto, a tlakuriwa va ri karhi va langutile, kutani papa ri siva, va nga ha n'wi voni. ₁₀Va te va ha tlakusile mahlo va languta etilweni loko a ri karhi a tlhandluka, hi nomu lo vavanuna vambirhi lava ambaleke swo basa, va humelela kwala va nga kona, ₁₁va ku: “Vavanuna va Galeliya, mi yimele yini mi langutile etilweni ke? Yesu loyi a susiweke exikarhi ka n'wina ni ku tlakuleriwa etilweni, ú ta tlhela a vuya hi mukhuva lowu mi n'wi voneke a ya etilweni ha wona.”

₁₂Kavaloko va suka entshaveni leyi va nge i ya Mitlhwari, va tlhelela eYerusalema, mpfhuka wa kona wu ri wa kwalomu ka 1 km. ₁₃Kuteloko va nghenile emutini, va khandziya endlwini ya le henhla, laha a va tshama kona: A ku ri na Petro, na Yohane, na Yakobo, na Andriya, na Filipi, na Tomasi, na Bartolomi, na Matewu, na Yakobo n'wana Alfiya, na Simoni Muhiseki, na Yudasi n'wana Yakobo. ₁₄Volavo hinkwavo a va tiyisela eku khongeleni, hi mbilu yi ri yin'we, va ri ni vavasati van'wana, na Mariya mana wa Yesu, ni vamakwavo wa Yesu.

₁₅Hi masiku walawo, Petro a yima enhlengeletanweni ya vamakwavo eHosini (lava nhlayo ya vona a yi lava ku va 120), kutani a ku: ₁₆“N'wina varikwerhu, a swi fanele leswaku Tsalwa ri hetiseka, leri Moya lowo Kwetsima wu nga ri vula hi nomo wa Davhida, ehenhla ka Yudasi loyi a a ri mufambisi wa lava khomeke Yesu. ₁₇Kasi Yudasi a a hlayiwa exikarhi ka hina, naswona a a ri un'wana wa hina entirhweni.”

₁₈(Yudasi a a tixavele nsimu hi mali leyi a a yi kumile hi ndlela yo homboloka; kutani ú yile a ya wa hi nhloko ensin'wini ya kona, a handzuka hi le xikarhi, marhumbu ya yena ma huma hinkwawo. ₁₉Mhaka leyi yi tiviwile hi vanhu hinkwavo lava akeke Yerusalema; hikokwalaho va nga thya nsimu leyi evito ra “Hakeldama” hi ririmi ra ka vona, hileswaku “Nsimu ya Ngati”.)

₂₀“Kutani, ebukwini ya Tipisalema, ku tsariwile leswi:

₂₁“Hikwalaho ke, ku laveka munhu un'wana eka vavanuna lava a va ri na hina eminkarhini hinkwayo leyi Hosi Yesu a nga tshama na hina ni ku famba-famba na hina, ₂₂ku sukela enkarhini lowu Yohane a a khuvula vanhu, ku fikela loko Yesu a tlakuriwile a ya ehenhla, a suka exikarhi ka hina; munhu wa kona ú fanele ku va mbhoni ya ku pfuka ka Hosi eku feni, swin'we na hina.” ₂₃Hiloko va humesa vambirhi: Yosefa loyi a va ku i Barsaba (rin'wana a va ku i Yusto), na Matiyasi. ₂₄Kutani va khongela, va ku: “Hosi, wena la tivaka timbilu ta vanhu hinkwavo, kombisa loyi u n'wi hlawuleke eka lavambirhi lava, ₂₅leswaku a teka ndhawu ya Yudasi, entirhweni wa vuapostola lowu a wu tshikeke ku ya lomu a nga ya kona.”

₂₆Hiloko va hlawula musivi hi ku hoxa vuhlolotwana, kutani byi komba Matiyasi; kavaloko a hlayiwa swin'we ni vaapostola lava khume na un'we.