Vakolosa 1

₁Mina Pawulo, muapostola wa Kriste Yesu hi ku rhandza ka Xikwembu, na Timotiya makwerhu, ₂hi tsalela vahlawuriwa va Xikwembu lava nga le Kolosa, vamakwerhu lava tshembekaka eka Kriste, hi ri:

Tintswalo ni ku rhula a swi ve na n'wina, swi huma ka Xikwembu Tata wa hina.

₃Masiku hinkwawo, hi nkhensa Xikwembu tata wa Hosi ya hina Yesu Kriste, emikhongelweni leyi hi mi khongelelaka ha yona, ₄hikuva hi twile ta ku pfumela ka n'wina eka Kriste Yesu, ni ta rirhandzu ra n'wina eka vahlawuriwa va Xikwembu hinkwavo, ₅hikwalaho ka ku tshemba loku ku hlayiseriweke n'wina ematilweni. Ta ku tshemba loku, mi rhange mi ti twa eritweni ra ntiyiso, yi nga Evhangeli, ₆leyi fikeke eka n'wina kukota leswi yi fikeke ematikweni hinkwawo; yi karhi yi veka mihandzu ni ku kula, kukota leswi yi endlisaka xiswona eka n'wina, ku sukela siku mi tweke ni ku twisisa tintswalo ta Xikwembu hi ntiyiso wa tona. ₇Mi dyondzisiwile swona hi Epafrasi, nandza-kulorhi la rhandzekaka, la tirhelaka Kriste hi ku tshembeka ematshan'wini ya hina. ₈Hi yena la nga hi tivisa ta rirhandzu leri mi nga nyikiwa rona hi Moya.

₉Hikokwalaho, ku sukela siku leri hi swi tweke, a hi tshikanga ku mi khongelela, ni ku kombela Xikwembu leswaku xi mi tata hi vutivi bya ku rhandza ka xona, evutlharini hinkwabyo ni ku twisiseni hinkwako loku nyikiwaka hi Moya; ₁₀hi ndlela leyi, mi ta hanya vutomi lebyi fanekelaka emahlweni ka Hosi, mi yi tsakisa etimhakeni hinkwato, mi tswala mihandzu hi ku tirha mintirho leyinene ya tinxaka-xaka, mi ya mi kula hi tlhelo ra ku tiva Xikwembu. ₁₁Mawaku loko mi nga tiyisiwa swinene hi matimba, hi ku ya hi ntamu wa xona wo twakala, mi kota ku tiyisela swinene, ni ku leha mbilu mi tsakile. ₁₂Naswona, nkhensani Tatana, loyi a endleke leswaku na n'wina mi averiwa ndzhaka ya vahlawuriwa, eku fumeni ka ku vonakala. ₁₃Ú hi humesile ematimbeni ya munyama, a hi rhurhisela eku fumeni ka N'wana wa yena loyi a rhandzekaka, ₁₄loyi eka yena hi nga ni ku rivaleriwa ka swidyoho ni ku kutsuriwa.

₁₅Kriste i xifaniso xa Xikwembu lexi nga voniwiki, mativula ya hinkwaswo leswi tumbuluxiweke. ₁₆Ha yena, Xikwembu xi tumbuluxile swilo hinkwaswo, ematilweni ni la misaveni, swilo leswi vonekaka ni leswi nga vonekiki, kukota swiluvelo kumbe leswi nga ni vuhosi, ni leswi nga ni vundhuna kumbe ku fuma. Hinkwaswo swi tumbuluxiwile ha yena, naswona swi tumbuluxeriwe yena. ₁₇Ú rhangele swilo hinkwaswo, kutani eka yena swilo hinkwaswo swi khomene swin'we. ₁₈Hi yena nhloko ya miri, hileswaku ya Kereke. Hi yena masungulo ya hinkwaswo ni loyi a rhangeke a pfuka exikarhi ka vafi, leswaku a va lowo rhanga eswilweni hinkwaswo. ₁₉Hikuva swi tsakisile Xikwembu leswaku vukwembu hinkwabyo bya xona byi tshama eka yena, ₂₀ni ku endla leswaku, ha yena, swilo hinkwaswo swi vuyelelana na xona, hikuva hi yena Kriste la tiseke ku rhula hi ku fa ka yena exihambanweni; hinkwaswo, hambi la misaveni, hambi le matilweni, swi vuyelelana ni Xikwembu ha yena.

₂₁Na n'wina lava khale a mi ri kule ni Xikwembu, a mi ri valala va xona hi miehleketo ya n'wina ni mintirho ya n'wina leyo biha; ₂₂kambe sweswi Xikwembu xi endlile leswaku mi vuyelelana na xona, hi N'wana wa xona la nga hanya a ri munhu, a tlhela a fa leswaku mi tisiwa eka Xikwembu mi ri lava hlawulekeke, mi nga ri na xisandzu kumbe ku soleka emahlweni ka xona. ₂₃Kambe mi fanele ku tiya eku pfumeleni, mi yimile emasungulweni ya kona mi nga tsekatseki, mi nga hambani ni ku tshemba loku mi ku kumeke hi ku twa Evhangeli; Evhangeli leyi yi twarisiwile eka swivumbiwa hinkwaswo leswi nge hansi ka tilo, kutani mina Pawulo, ndzi endliwile nandza wa yona.

₂₄Sweswi ke, ndzi tsaka hileswi ndzi xanisiwaka hikwalaho ka n'wina; kutani, hi ku xaniseka ka mina emirini, ndzi hetisa leswi kayiveleke emaxangwini ya Kriste, hikwalaho ka miri wa yena, yi nga Kereke. ₂₅Ndzi endliwile nandza wa Kereke hi makungu ya Xikwembu lexi nga ndzi nyika ntirho lowu hikwalaho ka n'wina. Ntirho wa kona i ku dyondzisa Rito ra Xikwembu, ₂₆xi nga xihundla lexi a xi tumberile malembe ni malembe, eka tinxaka hinkwato, kambe sweswi xi pfuleteriwile eka vahlawuriwa va Xikwembu. ₂₇Eka vona Xikwembu xi rhandzile ku tivisa rifuwo ra xihundla lexi, ni ku kwetsima ka xona exikarhi ka vamatiko; xihundla xa kona hileswaku Kriste ú le ka n'wina, kutani ha yena mi langutela ku kwetsima loku taka. ₂₈Hi yena loyi hi n'wi twarisaka, hi ri karhi hi tsundzuxa ni ku dyondzisa vanhu hinkwavo, hi vutlhari hinkwabyo; hi endlela ku tisa vanhu hinkwavo eka Xikwembu va ri lava vupfeke eka Kriste. ₂₉Hi swona leswi ndzi tikarhatelaka swona, ndzi ri karhi ndzi lwa hi ntamu wa yena, lowu a wu pfuxaka hi matimba endzeni ka mina.