Duteronoma 30

₁“Loko mi ta va mi humeleriwile hi swilo leswi hinkwaswo, mi ta tsundzuka mi ri ematikweni hinkwawo lawa HOSI Xikwembu xa n'wina xi mi hangalaseleke eka wona, leswaku ndzi mi nyikile nkarhi wo hlawula minkateko kumbe makhombo. ₂Loko n'wina ni vana va n'wina mi endla hinkwaswo leswi ndzi mi lerisaka swona namuntlha, mi tlhelela eka HOSI Xikwembu xa n'wina, mi yingisa leswi xi mi byelaka swona, hi timbilu ta n'wina hinkwato ni mimoya ya n'wina hinkwayo, ₃hi kona HOSI Xikwembu xa n'wina xi nga ta tilhela xi mi katekisa, xi mi twela vusiwana, xi mi vuyisa ematikweni lawa a xi mi hangalasele eka wona. ₄Hambiloko mi yisiwile emakun'wini ya misava, HOSI Xikwembu xa n'wina xi ta ya mi teka, xi mi hlengeleta, ₅xi mi vuyisa etikweni leri a ri ri ra vatata wa n'wina, leswaku ri va ra n'wina; kutani xi ta mi katekisa, xi mi andzisa, mi tlula vatata wa n'wina hi ku tala. ₆HOSI Xikwembu xa n'wina xi ta hundzuluxa timbilu ta n'wina ni ta vana va n'wina, mi ta kota ku xi rhandza hi timbilu ta n'wina hinkwato ni mimoya ya n'wina hinkwayo, leswaku mi ta kuma vutomi. ₇Loko ma ri makhombo lawa ndzi ma vuleke, HOSI Xikwembu xa n'wina xi ta ma rhwexa valala va n'wina lava a va mi venga ni ku mi xanisa. ₈N'wina mi ta fanela ku tlhela mi yingisa leswi HOSI Xikwembu xi mi byelaka swona, mi endla hinkwaswo leswi ndzi mi lerisaka swona namuntlha; ₉hikokwalaho HOSI Xikwembu xi ta mi fumisa, mi kateka emintirhweni ya n'wina hinkwayo: Mi ta va ni vana lavo tala, swifuwo swa n'wina swi ta veleka ngopfu, ni masimu ya n'wina ma ta humesa ntshovelo lowunene, hikuva HOSI Xikwembu xi ta tlhela xi mi katekisa, xi mi tsakela ku fana ni leswi a xi va tsakerisa xiswona vatata wa n'wina; ₁₀ntsena mi ta fanela ku yingisa leswi HOSI Xikwembu xa n'wina xi mi byelaka swona, mi hlayisa swileriso swa xona ni milawu ya xona leyi tsariweke ebukwini leyi ya Nawu, mi tinyiketa eka xona hi timbilu ta n'wina hinkwato ni mimoya ya n'wina hinkwayo.

₁₁“Nawu lowu ndzi mi nyikaka wona namuntlha, a wu nga mi nonon'hweli, naswona a wu le kule na n'wina. ₁₂A wu le tilweni, hikokwalaho mi nge vuli mi ku: ‘Hi ta rhuma mani etilweni, a ya hi tekela wona leswaku hi ta wu twa, kutani hi hanya ha wona!’ ₁₃Naswona a wu le ntsungeni wa malwandle, kutani mi nge vuli mi ku: ‘I mani la nga ta tsemakanya malwandle a ya hi tekela wona leswaku hi ta wu twa, kutani hi hanya ha wona!’ ₁₄Kambe nawu lowu mi na wona kwala kusuhi na n'wina; ma wu tiva swinene, mi nga wu hlamusela, hikokwalaho mi nge tsandzeki ku hanya ha wona.

₁₅“Langutani, namuntlha ndzi mi nyika nkarhi wo hlawula vutomi kumbe rifu, leswinene kumbe leswo biha. ₁₆Loko mi yingisa swileriso swa HOSI Xikwembu xa n'wina leswi ndzi mi nyikaka swona namuntlha, mi xi rhandza ni ku famba etindleleni ta xona, mi hlayisa swileriso, ni milawu, ni swiletelo swa xona, xi ta mi katekisa, mi hanya, mi andza etikweni leri mi yaka mi ya ri teka ri va ra n'wina. ₁₇Kambe loko mi tinonon'hwisa, mi ala ku yingisa, kutani mi ya mi ya gandzela swikwembu swin'wana, mi tirhela swona, ₁₈ndza mi byela namuntlha leswaku mi ta fa hakunene! Mi nga ka mi nga hanyi nkarhi wo leha etikweni leri mi nga ta nghena eka rona mi ri teka ri va ra n'wina, loko mi perile nambu wa Yordani.

₁₉“Namuntlha ndzi kombela matilo ni misava ku va timbhoni ta mina leswaku ndzi mi nyikile nkarhi wo hlawula vutomi kumbe rifu, minkateko kumbe makhombo. Hlawulani vutomi, leswaku mi ta hanya, n'wina ni vana va n'wina! ₂₀Rhandzani HOSI Xikwembu xa n'wina, mi endla leswi xi mi byelaka swona, mi xi namarhela. Loko mi endla sweswo, mi ta va ni vutomi, mi hanya masiku layo tala, mi tshama etikweni leri HOSI Xikwembu xi hlambanyeke ku ri nyika vatata wa n'wina Abrahama na Isaka na Yakobo.”