Duteronoma 34

₁Kutani Muxe a suka erivaleni ra Mowabu, a kongoma entshaveni ya Nebo, a fika a khandziya nhlohlorhi ya Pisga, evuxeni bya muti wa Yeriko. Kutani HOSI Xikwembu xi n'wi komba tiko hinkwaro, ku sukela Giliyadi ku ya fika eDani, ₂ni tiko hinkwaro ra va ka Neftali, ni ra va ka Efrayimi, ni ra va ka Manase, ni tiko hinkwaro ra va ka Yuda ku ya fika eLwandle ra Mediteraniya, ₃ni tindhawu ta le dzongeni ni ta le nkoveni, ri nga rivala ra Yeriko laha ku milaka micindzu, xi n'wi komba ku ya fika emutini wa Sowara. ₄Kutani HOSI Xikwembu xi ku ka Muxe: “Hi rona tiko leri ndzi tshembiseke Abrahama na Isaka na Yakobo leswaku ndzi ta ri nyika vatukulu va vona. Ndzi ku kombile rona leswaku u ri vona hi mahlo ntsena, kambe u nga ka u nga ngheni eka rona.”

₅Kutani Muxe nandza wa HOSI Xikwembu a fela kwale tikweni ra Mowabu, hilaha HOSI Xikwembu a xi vurile hakona, ₆kutani a lahliwa enkoveni lowu langutaneke ni muti wa Beta-Peyori, kwale tikweni ra Mowabu; kambe, ku fikela namuntlha, a ku na munhu loyi a tivaka sirha ra yena. ₇Loko Muxe a fa, a a ri ni malembe ya 120, kambe mahlo ya yena a ma nga si karhala, naswona a ha tiyile swinene. ₈Vaisraele va rila nkosi wa Muxe masiku ya 30, erivaleni ra Mowabu, kutani nkosi wa kona wu hela.

₉Yoxuwa n'wana Nuni a a tele moya wa vutlhari, hikuva Muxe a a n'wi tlhandlekile mavoko. Hikokwalaho Vaisraele a va n'wi yingisa, va endla hinkwaswo leswi HOSI Xikwembu xi swi leriseke Muxe. ₁₀Exikarhi ka Vaisraele, a ka ha humelelanga muprofeta wo fana na Muxe, hikuva HOSI Xikwembu a xi vulavula na yena va langutanile. ₁₁A ku vanga na muprofeta na un'we loyi a endleke mahlori ni swihlamariso ku fana ni leswi HOSI Xikwembu xi rhumeke Muxe ku ya swi endla etikweni ra Egipta, eka Faro ni malandza ya yena hinkwawo ni vanhu va yena hinkwavo. ₁₂A ku vanga na muprofeta un'wana loyi a nga va ni matimba ku fana na Muxe, a endla leswikulu swo chavisa, Vaisraele hinkwavo va ri karhi va swi vona.