Tiko ra Egipta ri fananisiwa ni murhi lowukulu
1Hi lembe ra vu-11 hi ri evukhumbini, hi siku ro rhanga ra n'hweti ya vunharhu, HOSI Xikwembu xi vulavula na mina xi ku: 2“Wena munhu, byela Faro hosi ya le Egipta emahlweni ka vanhu va yena hinkwavo, u ku ka yena:
“A ku na la ringanaka na wena hi matimba!
3Ndzi ku fananisa ni murhi wa kipresi kumbe wa kedari eLebanoni,
wa marhavi layo saseka lama nyikaka ndzhuti,
murhi wo leha swinene lowu dlivaka ni tilo.
4A wu mirile kusuhi ni nambu,
wu cheletiwa hi mati lama pfelelaka, wu kula wu ya henhla;
ensin'wini leyi murhi wu byariweke ka yona,
a ku khuluka swinambyana swi wu rhendzela,
mati ya kona ma ya cheleta
ni mirhi hinkwayo ya le xihlahleni.
5Murhi lowu a wu lehile swinene,
wu tlula mirhi leyin'wana hinkwayo;
a wu phaka marhavi, wu mila ni matluka layo tala,
hikuva a wu kuma mati layo tala eku hlukeni ka wona.
6Tinyanyana ta tinxaka-xaka
a ti aka swisaka emarhavini ya wona,
swiharhi hinkwaswo swi vundza ehansi ka wona
swi ri ni vana va swona.
Vanhu hinkwavo va matiko lamakulu
a va wisa endzhutini wa wona.
7Ku leha ka murhi lowu ni ku nava ka marhavi ya wona
a swi sasekile swinene;
timitsu ta wona a ti tlhavile ti ya hansi,
ti kuma mati layo tala.
8Mirhi ya kedari leyi nga ntangeni wa Xikwembu a yi nga ringani na wona,
matluka ya wona a ma tlula ya kipresi hi ku tala;
hambi ya ri marhavi ya xirhombe-rhombe
a ma nga fiki eka marhavi ya murhi lowu;
entangeni wa Xikwembu a ku ri hava murhi wun'wana
lowu sasekeke kukota lowu.
9Mina HOSI a ndzi wu nyikile vumbhurhi loko ndzi wu endla,
wu sasekisiwa hi ku tala ka marhavi ya wona;
mirhi hinkwayo leyi nga ntangeni wa Edeni
a yi navela ku fana ni murhi lowu.
10“Hambiswiritano mina HOSI N'wini wa hinkwaswo, ndzi ri: Murhi lowu wa kedari wu kurile wu ya henhla wu dliva ni tilo, kambe wu tidzunisile hi vukulu bya wona. 11Hikokwalaho ndzi wu nyiketile emavokweni ya mufumi lonkulu wa matiko, kutani yena ú wu bile a wu bela ku homboloka ka wona; na mina ndzi wu cukumetile. 12Vanhu va tihanyi vo huma ematikweni man'wana va wu tsemile, va wu siyisa sweswo; marhavi ya wona ma wele etintshaveni ni le minkoveni hinkwayo; swirhabyana swa wona swi tshovekile swi wela ematini ya swinambyana hinkwaswo swa tiko, kutani vamatiko hinkwavo lava a va tshama endzhutini wa wona va sukile va famba, va wu siyisa sweswo. 13Tinyanyana hinkwato ti tile ti ta phatsama laha a wu ri kona, swiharhi hinkwaswo swi kandziyerile swirhabyana swa wona. 14Swi vile tano leswaku murhi wun'wana ni wun'wana lowu milaka kusuhi ni nambu wu nga tshuki wu kula, wu leha wu ya dliva ni tilo; mirhi leyo tano hinkwayo yi fanele ku tsemiwa, yi cukumetiwa exivandleni xa vafi yi ya hlangana ni vanhu lava feke khale.
15“Mina HOSI N'wini wa hinkwaswo ndzi ri, siku murhi lowu wu cukumetiweke exivandleni xa vafi, ndzi lerisile mati lama nga hansi ka misava leswaku ma wu funengeta, ma rila ku fa ka murhi wa kona; hikwalaho ka wona ndzi pfarile ni swinambyana swa le hansi, leswaku mati ya kona ma nga ha khuluki; ndzi funengetile ni ntshava ya Lebanoni hi xinyami hikwalaho ka wona, kutani mirhi hinkwayo ya le nhoveni yi vunile hi mhaka ya wona. 16Siku ndzi cukumeteke murhi lowu exivandleni xa vafi leswaku wu ya hlangana ni vanhu lava feke khale, ndzi tsekatsekisile matiko hinkwawo hi mpfumawulo wa ku wa ka wona; kutani mirhi hinkwayo leyinene yo saseka ya le Edeni, yona leyi nga ntshaveni ya Lebanoni kusuhi ni milambu, yi tsakisiwile hi ku wa ka wona, loko wu cukumetiwa exivandleni xa vafi. 17Kambe na yona mirhi leyi yi ta cukumetiwa exivandleni xa vafi, yi ya hlangana ni lava dlayiweke hi fumu, hikuva yi tirhisanile ni murhi wa kedari; swi tano ni vamatiko lava wiseke endzhutini wa wona: Va ta lova.
18“Murhi wa kedari lowu wu tlulaka mirhi hinkwayo ya le Edeni hi ku saseka ni vukulu, wu fanisa Faro ni vanhu va yena: Va ta rhelela va ya exivandleni xa vafi, va ya hlangana kona ni lavo soleka, va latiwa ni vanhu lava dlayiweke hi fumu. Ndzi vula sweswo mina HOSI N'wini wa hinkwaswo!”
