Ezekiele 6

₁HOSI Xikwembu xi vulavula na mina, xi ku: ₂“Wena munhu, languta leswi humelelaka etintshaveni ta Israele, kutani u twarisa mahungu ya mina, ₃u byela tintshava leti ni swintshabyana swa kona, u lerisa ni minkova ni timbala leswaku swi yingisa rito na mina leri nge: ‘Vonani, ndzi ta mi vangela tinyimpi, mina hi xiviri, ndzi onhetela switsunga swa n'wina swa vukhongeri bya hava. ₄Ndzi ta herisa tialitari ta n'wina ta magandzelo ya nyama ni ta mirhi ya risuna, ndzi ti faya. Varikwenu lava khongelaka swikwembu swa swifaniso, ndzi ta va dlayela emahlweni ka swifaniso swa kona. ₅Mintsumbu ya n'wina Vaisraele ndzi ta yi cukumeta emahlweni ka swikwembu leswi swa hava, ndzi ta sala ndzi hangalasa ni marhambu ya kona kusuhi ni tialitari ta n'wina. ₆Tivani leswaku hambi mi nga tshama kwihi na kwihi, miti ya n'wina yi ta hlaseriwa; switsunga swa vukhongeri bya hava ni tialitari ta kona swi ta hirimuxiwa swi hundzuka marhumbi; swikwembu swa swifaniso swi ta fayiwa, ku herisiwa ni tialitari ta mirhi ya risuna, kutani ntirho wa mavoko ya n'wina wu ta hela. ₇Loko mintsumbu yi ta ku n'walálálá, exikarhi ka n'wina, mi ta pfumela leswaku HOSI hi mina!’

₈“Hambiswiritano, ndzi ta tshika van'wana va n'wina va hanya; va ta pona ku dlawa, va hangalasiwa va ya ematikweni mambe, ₉kutani varikwenu lava, lava nga ta va va ponile ku dlawa, va ta ndzi anakanya loko va ri evukhumbini exikarhi ka vamatiko. Va ndzi vavisile ngopfu, hikuva timbilu ta vona ti ndzi tshikile ti ndzi fularhela; va langutile eka swikwembu swa vona swa hava, mina va nga ha ndzi tshembi. Kambe eku heteleleni va ta tisola ehenhla ka mintirho ya vona leyo homboloka ni manyala ya vona hinkwawo, ₁₀kutani va ta tiva leswaku HOSI Xikwembu hi mina! Loko ndzi vula leswaku ndzi ta va vangela makhombo, a ndzi vungunyi!”

₁₁HOSI N'wini wa hinkwaswo ú vurisa sweswo ú ri: “Rhwalani mavoko mi cina-cina, mi rila mi ku ‘Yo!’ hikuva Vaisraele va herisiwa hi matlhari ni tindlala ni mintungu, hikwalaho ka manyala hinkwawo lawa va ma endleke. ₁₂Lava nga ya tumbela kule va ta fa hi ntungu, lava lwaka kusuhi ni muti va ta dlawa hi matlhari; kutani lava nga ta sala emutini va rhendzeriwe hi valala, vona va ta fa hi tindlala. Hi swona leswi ndzi nga ta va vangela swona eku hlundzukeni ka mina, ₁₃kutani mi ta tiva leswaku HOSI Xikwembu hi mina! Lava gandzelaka swikwembu swa swifaniso, va ta dlayeriwa emahlweni ka swona; mintsumbu ya vona yi ta cukumetiwa kusuhi ni tialitari ta vona, yi kumeka eswitsungeni hinkwaswo, ni le tinhlohlorhini hinkwato ta tintshava, ni le murhini wun'wana ni wun'wana lowu tlhumeke, ni le hansi ka minkuhlu, ti nga tindhawu hinkwato leti Vaisraele va gandzelaka swikwembu swa vona swa swifaniso eka tona, loko va swi humesela magandzelo layo nun'hwela. ₁₄Ndzi ta tshambuluta voko ra mina ndzi va ba; ndzi ta hlasela tiko ra vona ni miti ya yona, ndzi swi onhetela, ku sukela emananga ya le dzongeni ku ya fika emutini wa Ribila le n'walungwini; kutani va ta tiva leswaku HOSI Xikwembu, hi mina!”