Esaya 55

“N'wina hinkwenu mi nga ni torha,

tanani mi ta nwa mati,

na n'wina mi nga riki na mali,

tanani mi ta teka swakudya mi dya!

Hambi mi nga ri na mali, tanani mi ta kuma vhinyo ni ntswamba,

a mi nga hakeli nchumu.

₂Xana mi xavela yini hi mali ya n'wina swilo leswi nga riki swakudya,

naswona hikwalaho ka yini mi tirhela leswi nga xurhisiki, xana?

Tikarhateleni ku yingisa mina,

kutani mi ta dya leswo nandziha, mi hanya emafurheni.

₃Rhiyani ndleve, mi yingisa;

tanani eka mina, mi ta kuma vutomi.

Ndzi ta endla na n'wina ntwanano lowu nga heriki,

ndzi hlayisa rirhandzu ra mina lero tshembeka leri ndzi ri kombeke Davhida.

₄Ndzi vekile Davhida ku va mbhoni ya mina exikarhi ka vanhu van'wana,

a va mufumi ni mulawuri wa vona.

₅Vonani, na n'wina mi ta vitana vanhu lava a mi nga va tivi khale;

hambileswi na vona va nga mi tiviki, va ta ta ka n'wina hi ku tsutsuma,

hikuva mina HOSI Xikwembu xa n'wina, Muhlawuleki wa Israele, ndzi lava leswaku mi dzunisiwa.”

₆Lavani HOSI Xikwembu loko xa ha kumeka,

xi vitaneni loko xa ha ri kusuhi.

₇Lavo homboloka a va tshike mahanyelo ya vona layo biha,

ni lava nga lulamangiki a va cukumete kule miehleketo leyo biha leyi va nga na yona;

hinkwavo a va tlhelele eka HOSI Xikwembu xa hina,

kutani xi ta va twela vusiwana,

xi va rivalela swidyoho swa vona hinkwaswo.

₈HOSI Xikwembu xi vurisa sweswo, xi ri:

“Miehleketo ya mina yi hambanile ni miehleketo ya n'wina,

ni tindlela ta mina ti hambene ni tindlela ta n'wina:

₉Swi fana ni matilo lama nga henhla kule ni misava.

Tindlela ta mina ni miehleketo ya mina swi le henhla ngopfu,

swi tlula tindlela ta n'wina ni miehleketo ya n'wina.

₁₀“Loko mpfula ni gamboko swi ta swi huma etilweni,

a swi tlheli swi nga tsakamisanga misava;

swi hlukisa swimilana ni ku balekisa swiluva,

leswaku mubyari a kuma timbewu, ni vanhu va kuma swakudya.

₁₁Swi ta va tano ni rito leri humaka enon'wini wa mina:

Ri nge vuyeli ka mina ri nga tirhanga nchumu;

ri ta endla ku rhandza ka mina,

ri hetisisa ni makungu ya mina.

₁₂“Mi ta huma mi tsakile

mi fambisiwa hi ku rhula;

tintshava ni swintshabyana swi ta yimbelela

swi ba minkulungwana emahlweni ka n'wina,

mirhi hinkwayo yi ri karhi yi phokotela.

₁₃Ematshan'wini ya mitwa, ku ta mila mirhi ya kipresi,

mirhi ya mirta yi ta mila laha a ku ri ni swigatlu.

Swilo leswi swi ta va xitsundzuxo eka mina HOSI,

swi ta va mfungho lowu nga ta va kona hilaha ku nga heriki.”