Yobo 26

₂“Munhu la pfumalaka matimba, we Bilidada, u ri, wa n'wi pfuna!

U ri, u seketela loyi a tsaneke!

₃Kambe u n'wi tsundzuxile yini, munhu loyi wo pfumala vutlhari,

u n'wi kombile vutivi bya wena hi ndlela yihi, xana?

₄Xana marito lawa u ma vuleke, u lerisiwile wona hi mani,

i moya wa mani lowu wu ku susumeteke, xana?

₅“Ehansi ka misava, mimoya ya vafi

ni swidziva, ni leswi nga ka swona, swa rhurhumela,

₆hikuva emahlweni ka Xikwembu, xivandla xa vafi xi tshama xi pfulekile,

ku hava xo sirhelela khele ra lava loveke.

₇Xikwembu xi vamba matilo laha ku nga riki na nchumu,

xi yimisa misava empfhukeni.

₈Xi hlengeleta mati emapapeni ya ntima,

kambe mapapa ya kona a ma handzuki.

₉Xi fihla xiluvelo xa xona

hi ku andlala papa ehansi ka xona.

₁₀Elwandle le vugimamusi, xi ba ndzilekana,

xi hambanisa munyama ni ku vonakala.

₁₁Loko Xikwembu xi ri eku tshinyeni,

tiphuphu ta matilo ta chava ti tsekatseka.

₁₂Xi miyeta magandlati hi matimba ya xona;

hi vutlhari bya xona, xi hlula Rahaba nyoka ya lwandle.

₁₃Xi hungisa moya, wu hangalasa mapapa,

xi tlhava ni nyoka ya ximememe.

₁₄Leswi i masungulo ntsena ya mintirho ya Xikwembu,

ho hleveriwa swona etindleveni!

Kambe loko matimba ya xona ma dzindza,

ku nga twisisa mani xana?”