Yuwele 1

₂Yingisani mhaka leyi, n'wina vakulukumba,

hinkwenu vaaki va tiko, rhiyani tindleve!

Hi mpfhuka xa loko mi velekiwile,

kumbe eminkarhini ya vatata wa n'wina,

xana mhaka yo fana ni leyi yi tshama yi humelela xana?

₃Rungulelani vana va n'wina eswilo leswi,

vona va ta rungulela vatukulu va n'wina,

kutani vatukulu va ta rungulela vana va vona:

₄Leswi siyeke hi xigon'wani, swi dyiwile hi magerere.

Leswi magerere ma swi siyeke, xijajani xi dyile,

kutani leswi siyeke hi xijajani, swi dyiwile hi mherhavunguvungu.

₅Xalamukani mi rila, n'wina va le mabyaleni;

n'wina hinkwenu vanwi va vhinyo, banani nkalanga,

hikuva vhinyo leyo nandziha

a mi nga ha yi nantswi!

₆Tiko ra hina ri ngheneriwile hi vanhu va matimba,

va ntsandza-vahlayi;

meno ya vona ma fana ni ya tinghala,

tinhlaya ta vona ti fana ni ta nghala ya nkati.

₇Va onhile masimu ya hina ya vhinya,

ni mirhi ya hina ya minkuwa, va yi tsemelerile.

Va kwamurile mahanti ya yona, va ma cukumetela ehansi,

marhavi ya yona va ma kwalarisile.

₈Rilani ku fana ni nhwana la ambaleke leswo khwaxa,

a rila jaha ra yena.

₉Mapa ya magandzelo ni vhinyo ya wona,

a swa ha ri kona endlwini ya HOSI Xikwembu,

kutani vaprista, vona malandza ya HOSI,

va le ku rileni.

₁₀Masimu ma onhiwile,

misava ya kona yi le nkosini,

hikuva mavele ma herisiwile,

vhinyo a ya ha kumeki,

ni mafurha ma nyamalala.

₁₁N'wina varimi, nyumani;

banani nkalanga, n'wina mi byaleke vhinya,

na n'wina mi byaleke koroni na maxalana,

hikuva ntshovelo ku hava emasin'wini.

₁₂Murhi wa vhinya wa vuna,

nkuwa wu hela matimba;

mirhi ya magrenada, ni ya mincindzu, ni ya maapula,

hinkwayo ya vuna;

ku tsaka a ka ha ri kona

exikarhi ka vanhu.

₁₃N'wina vaprista, ambalani leswo khwaxa mi rila;

banani nkalanga, n'wina vatirhi va le alitarini.

Nghenani eTempeleni, mi rila vusiku hinkwabyo,

n'wina mi tirhelaka Xikwembu xanga,

hikuva mapa ya magandzelo ni vhinyo ya wona

a swa ha yisiwi endlwini ya Xikwembu xa n'wina.

₁₄Tilulamiseleni siku ra ku titsona swakudya,

mi vitana nhlengeletano leyo hlawuleka.

Vitanani vakulukumba,

ni vaaki hinkwavo va tiko,

va ta endlwini ya HOSI Xikwembu xa n'wina,

kutani mi huwelela eka xona.

₁₅Yo! Siku ra kona!

Siku ra HOSI ri le kusuhi;

ra ta siku leri Xikwembu-xa-matimba-hinkwawo xi nga ta herisa swilo ha rona.

₁₆Xana a hi ko ku hela ka swakudya,

hi ri karhi hi swi vona, xana?

Xana ku yimbelela ni ntsako,

a swi helanga xana, endlwini ya Xikwembu xa hina ke?

₁₇Mbewu yi bolele ehansi,

kutani switlati swi lo ahlama;

minkundla ya birimuka

hikuva mavele ku hava.

₁₈Hambi swi ri swifuwo swi le ku konyeni!

Mintlhambi ya tihomu yi le ku kayakayeni,

hikuva madyelo ya yona ma omile;

na yona mintlhambi ya tinyimpfu, yi le ku xanisekeni.

₁₉We Hosi, ndzi huwelela eka wena,

hikuva ndzilo wu herisile madyelo ya swifuwo,

malangavi ma hisile

mirhi hinkwayo enhoveni.

₂₀Hambi swi ri swiharhi swa nhova,

swi rilela eka wena,

hikuva milambu yi phyile,

ni ndzilo wu herisile madyelo ya swona.