Yoxuwa 11

₁Loko timhaka leti ti fika etindleveni ta Yabini hosi ya Hasoro, a rhuma vanhu va ya tivisa Yobabu hosi ya Madona; a va rhuma ni le ka hosi ya Ximroni, ni le ka hosi ya Akixafa, ₂ni le ka tihosi leti a ti tshama emagangeni hi tlhelo ra le n'walungwini, ni leti a ti tshama eka Nkova wa Yordani, hi tlhelo ra le dzongeni ra Lwandle ra Galeliya, ni leti a ti tshama etimbaleni, ni leti a ti tshama exifundzheni xa Dori hi tlhelo ra vupeladyambu. ₃A va rhuma ni le ka Vakanana lava a va tshama evuxeni ni le vupeladyambu; ni le ka Vaamori, ni Vahiti, ni Vaperesi, ni Vayebusi lava a va tshama emagangeni, ni le ka Vahivhi lava a va tshama ehansi ka ntshava ya Hermoni etikweni ra Mispa. ₄Kutani tihosi leti ti huma ti ri ni masocha ya tona hinkwawo, lawa a ma endla vandla lerikulu; ntsengo wa wona a wu tele kukota sava eribuweni ra lwandle; a va ri ni tihanci leto tala ni makalichi. ₅Hiloko tihosi leti hinkwato ti yima swin'we, ti ya hlengeletana ti gova kusuhi ni tiva ra Meromi, leswaku ti ta lwa ni Vaisraele.

₆Kutani HOSI Xikwembu xi ku ka Yoxuwa: “U nga va chavi, hikuva mundzuku hi nkarhi wo fana ni lowu, ndzi ta va nyiketa emavokweni ya Vaisraele va file; tihanci ta vona u fanele ku ti lamata hi ku ti tsema misiha ya milenge. Makalichi wona u ma hisa hi ndzilo.” ₇Hiloko Yoxuwa ni masocha ya yena va humelela etiveni ra Meromi, va fika va va hlasela va nga ehleketanga nchumu. ₈Kutani HOSI Xikwembu xi va nyiketa emavokweni ya Vaisraele, va va hlasela, va va hlongorisa ku kondza va ya fika emutini lowukulu wa Sidoni ni le Misrefoto-Mayimi. Hi tlhelo ra le vuxeni, va va hlongorisile ku kondza va ya fika eka Nkova wa Mispa, va va dlayetela ku nga sali na un'we wa mhamba. ₉Hiloko Yoxuwa a endla hilaha HOSI Xikwembu xi n'wi leriseke hakona: A lamata tihanci ta vona hi ku ti tsema misiha ya milenge, a tlhela a hisa makalichi ya vona hi ndzilo.

₁₀Hi nkarhi wolowo, Yoxuwa a hundzuluka a kongoma emutini wa Hasoro, a fika a wu teka, a dlaya hosi ya wona hi fumu. (Muti lowu wa Hasoro khale a wu ri ntsindza wa mimfumo hinkwayo leyi a yi ri kona.) ₁₁Vaisraele va dlayetela hinkwavo lava a va ri kona hi fumu, va va herisa, ku nga sali na xilo na xin'we lexi hanyaka; va tlhela va hisa muti lowu hi ndzilo. ₁₂Kutani Yoxuwa a hlasela miti leyi hinkwayo ni tihosi ta yona, a dlayetela vaaki va yona hi fumu, a va herisa hilaha Muxe nandza wa HOSI Xikwembu a leriseke hakona. ₁₃Vaisraele a va hisanga na muti na wun'we eka leyi a yi akiwile ehenhla ka marhumbi, ehandle ka muti wa Hasoro lowu Yoxuwa a wu hiseke. ₁₄Swifuwo ni swilo hinkwaswo leswi phanghiweke emitini leyi, Vaisraele va titekerile swona. Kambe vanhu vona va va dlayeterile hi fumu, va va herisa, ku nga sali na xilo na xin'we lexi hanyaka. ₁₅Yoxuwa ú endlile hinkwaswo leswi Muxe nandza wa HOSI Xikwembu a n'wi leriseke swona, hilaha Muxe a leriseke hakona hi HOSI Xikwembu. Yoxuwa a nga siyanga na xilo na xin'we.

₁₆Hiloko Yoxuwa a teka tiko hinkwaro, ku nga tindhawu ta le magangeni ni ta le dzongeni, ni tiko hinkwaro ra Goxeni ni tindhawu ta le timbaleni, ni ta le ka Nkova wa Yordani, ni ta le magangeni ya tiko ra Israele, ni le timbaleni ta kona; ₁₇a teka ku sukela ehansi ka ntshava ya Halaka leyi nga kusuhi na Seyira, yi hundza yi ya fika le Baali-Gadi eka Nkova wa Lebanoni, ehansi ka ntshava ya Hermoni. Yoxuwa a khoma tihosi ta kona hinkwato, a ti ba a ti dlaya. ₁₈Yoxuwa ú lwile ni tihosi leti nkarhi wo leha swinene. ₁₉A ku nga ri na muti na wun'we lowu endleke xinakulobye ni Vaisraele, ehandle ka Vahivhi, vona vaaki va muti wa Gibiyoni; miti leyi hinkwayo Vaisraele va yi kumile hi ku lwa nyimpi. ₂₀HOSI Xikwembu hi xona xi nga nonon'hwisa timbilu ta vanhu lava leswaku va ta lwa nyimpi ni Vaisraele. HOSI Xikwembu a xi endlela leswaku vanhu lava va nga tweriwi vusiwana, kambe va herisiwa va nyamalalela makumu hilaha xi leriseke Muxe hakona.

₂₁Kutani enkarhini wolowo Yoxuwa a fika a dlayetela va ka Anaka lava a va tshama emagangeni, ni le Hebroni, ni le Debiri, ni le Anabu, ni le magangeni hinkwawo ya tiko ra Yuda, ni le magangeni hinkwawo ya tiko ra Israele; Yoxuwa a va herisa hinkwavo ni miti ya vona. ₂₂Etikweni ra Vaisraele a ku salanga na un'we wa va ka Anaka; laha a va selenyana hi le mutini wa Gaza ni wa Gati ni wa Axidodo ntsena. ₂₃Hiloko Yoxuwa a teka tiko hinkwaro hilaha HOSI Xikwembu xi leriseke Muxe hakona. Kutani Yoxuwa a ri nyika Vaisraele hi ku ya hi tinyimba ta vona, leswaku yi va ndzhaka ya vona. Kutani ku va ni ku rhula etikweni.