Yoxuwa 22

₁Kutani Yoxuwa a hlengeleta va ka Rhuveni ni va ka Gadi ni hafu ya va ka Manase, ₂a ku ka vona: “Hinkwaswo leswi Muxe nandza wa HOSI Xikwembu a mi leriseke swona mi swi hlayisile, naswona mi ndzi yingisile eka hinkwaswo leswi ndzi mi leriseke swona. ₃Emasikwini layo tala lawa ma hundzeke a mi tshikanga vamakwenu ekhombyeni; mi hlayisile xileriso xa HOSI Xikwembu ku ta fikela namuntlha. ₄Sweswi HOSI Xikwembu xi wisisile vamakwenu hilaha xi tshembiseke hakona; kutani n'wina tlhelelani emakaya, etikweni ra n'wina leri Muxe nandza wa HOSI Xikwembu a mi nyikeke rona entsungeni wa nambu wa Yordani. ₅Vonani leswaku mi hlayisa swileriso ni milawu ya HOSI Xikwembu leyi Muxe nandza wa xona a mi leriseke yona, ku nga ku rhandza HOSI Xikwembu xa n'wina, ni ku famba etindleleni ta xona, ni ku hlayisa swileriso swa xona, ni ku xi namarhela, ni ku xi tirhela hi mbilu hinkwayo ni moya hinkwawo.” ₆Kutani Yoxuwa a va katekisa, a va byela leswaku va muka; kutani va tlhelela emakaya ya vona.

₇Hafu ya nyimba ya ka Manase Muxe a a yi nyikile ndhawu ya yona eBaxani, kasi hafu leyin'wana Yoxuwa a a yi nyikile ndhawu swin'we ni vamakwavo evupeladyambu bya nambu wa Yordani.

Loko Yoxuwa a va katekisa leswaku va ta tlhelela emakaya, ₈ú te ka vona: “Tlhelelani emakaya ni rifuwo ra n'wina lero tala, ra swifuwo, ni silivhere, ni nsuku, ni koporo, ni nsimbhi, ni swiambalo; mi fanele ku avelana ni vamakwenu swilo leswi swi phanghiweke eka valala va n'wina.” ₉Kutani va ka Rhuveni ni va ka Gadi ni hafu ya va ka Manase va hambana ni Vaisraele emutini wa Xilo etikweni ra Kanana, va tlhelela emakaya etikweni ra Giliyadi, ri nga tiko leri va ri tekeke ri va ra vona, hilaha HOSI Xikwembu xi leriseke hakona.

₁₀Loko va ka Rhuveni ni va ka Gadi ni hafu ya nyimba ya va ka Manase va fika exifundzheni lexi xi nga kusuhi ni nambu wa Yordani, etikweni ra Kanana, va akile alitari leyikulu swinene kwala kusuhi ni nambu. ₁₁Kutani Vaisraele va twa van'wana va ku: “Vonani, va ka Rhuveni ni va ka Gadi ni hafu ya nyimba ya va ka Manase va akile alitari kwala tikweni ra Kanana, exifundzheni lexi xi nga kusuhi ni nambu wa Yordani, endhawini leyi nga ya n'wina Vaisraele.” ₁₂Loko ntshungu wa Vaisraele wu twa mhaka leyi, wu hlengeletana hinkwawo eXilo, wu hloma matlhari ku ya lwa ni va ka Rhuveni ni va ka Gadi ni hafu ya nyimba ya va ka Manase.

₁₃Kutani Vaisraele va rhuma Finiyasi n'wana muprista Eliyazara etikweni ra Giliyadi eka va ka Rhuveni ni va ka Gadi ni hafu ya nyimba ya va ka Manase. ₁₄Finiyasi ú fambile ni varhangeri va 10 lava a va ri tinhloko emindyangwini ya ka vona. Nyimba yin'wana ni yin'wana yi humesile munhu un'we. ₁₅Kutani va ya fika etikweni ra Giliyadi eka va ka Rhuveni ni va ka Gadi ni hafu ya nyimba ya va ka Manase va ku ka vona: ₁₆“Ntshungu hinkwawo wa HOSI Xikwembu wu vula sweswo wu ri: ‘Xana i mhaka muni leyi mi yi endleke namuntlha, leswi mi tshikeke ku tshembeka eka HOSI Xikwembu xa Israele, mi tshika ni ku xi landza, mi tlhela mi xi fularhela hi ku ya tiakela alitari xana? ₁₇Xana xidyoho lexi hi nga xi endla ePeyori, lexi xi vangeleke ntshungu wa HOSI Xikwembu entungu, lexi hambi ku ri sweswi hi nga si tibasisaka eka xona, xo ka xi nga ringananga xana, ₁₈leswi namuntlha mi tshikaka ku landza HOSI Xikwembu? Loko namuntlha mi fularhela HOSI Xikwembu, mundzuku xi ta hlundzukela ntshungu hinkwawo wa Vaisraele. ₁₉Loko mi vona leswaku tiko ra n'wina ri nyamile, tsemakanyelani etikweni ra HOSI Xikwembu, laha ku nga ni Ntsonga wa xona, mi fika mi tilavela tindhawu ta n'wina exikarhi ka hina; ntsena mi nga tshuki mi fularhela HOSI Xikwembu kumbe mi endla leswaku na hina hi xi fularhela, hi ku tiakela alitari ya n'wina ehandle ka alitari ya HOSI Xikwembu xa hina. ₂₀Xana vukari bya HOSI Xikwembu a byi welanga ntshungu hinkwawo wa Vaisraele, loko Akani a tlurile xileriso hi tlhelo ra swilo leswi swi nyiketiweke leswaku swi herisiwa xana? Akani a nga fanga a ri yexe hi mhaka ya nandzu wa yena.’ ”

₂₁Kutani va ka Rhuveni ni va ka Gadi ni hafu ya nyimba ya va ka Manase va hlamula varhangeri va mindyangu ya Vaisraele va ku: ₂₂“HOSI i Xikwembu xa matimba hinkwawo! HOSI Xikwembu xa matimba hinkwawo xa swi tiva, kutani na n'wina Vaisraele mi fanele ku swi tiva! Loko hi fularhele HOSI Xikwembu, kumbe loko hi tlurile xileriso xa xona, namuntlha mi nga hi tsetseleli! ₂₃Loko hi tshikile ku landza HOSI Xikwembu hi ku tiakela alitari leswaku hi ta humesela eka yona magandzelo lama hisiwaka, kumbe ya swa le masin'wini, kumbe ya xinakulobye, HOSI Xikwembu a xi hi be hi xoxe! ₂₄Kambe hina hi akile hi ku chava leswaku eminkarhini leyi taka, vana va n'wina va ta byela vana va hina va ku: ‘Xana mi tiva yini hi HOSI Xikwembu xa Israele xana? ₂₅HOSI Xikwembu xi vekile nambu wa Yordani wu va wona ndzilekana exikarhi ka hina na n'wina va ka Rhuveni ni va ka Gadi, kutani a ku na nchumu lexi xi nga xa n'wina eka HOSI Xikwembu.’ Hi ndlela leyi, vana wa n'wina va ta endla leswaku lava va ka hina va tshika ku gandzela HOSI Xikwembu. ₂₆Hikwalaho ka leswi, hi te ha ha aka alitari, kambe yi nga ri yo humesela eka yona magandzelo lama hisiwaka kumbe timhamba, ₂₇kambe leyi yi nga ta va vumbhoni exikarhi ka hina na n'wina, ni le xikarhi ka lava va nga ta ta endzhaku ka hina, leswaku hina ha xi tirhela HOSI Xikwembu hi ku xi humesela magandzelo ya hina lama hisiwaka, ni timhamba ni magandzelo ya xinakulobye; hikuva loko ni nga endli tano, vana va n'wina va ta byela vana va hina eminkarhini leyi taka vaku: ‘A ku na nchumu lexi xi nga xa n'wina eka HOSI Xikwembu.’ ₂₈Hi ehleketile leswaku loko hina kumbe vana va hina hi byeriwa mhaka leyi eminkarhini leyi yi taka, hi ta ku: ‘Vonani xifaniso xa alitari ya HOSI Xikwembu, lexi vatata wa hina va xi akeke, kambe a hi alitari yo humesela eka yona magandzelo lama hisiwaka kumbe timhamba, kambe i vumbhoni exikarhi ka hina na n'wina.’ ₂₉Hina hi nge pfuki ni siku ni rin'we hi fularhele HOSI Xikwembu, kumbe ku tshika ku xi landza hi ku ya tiakela alitari yo humesela eka yona magandzelo lama hisiwaka, kumbe ya swa le masin'wini, kumbe timhamba, ehandle ka alitari ya HOSI Xikwembu leyi yimeke emahlweni ka Ntsonga wa xona.”

₃₀Marito lawa ma vuleke hi va ka Rhuveni ni va ka Gadi ni hafu ya nyimba ya va ka Manase ma tsakisile muprista Finiyasi ni varhangeri va ntshungu ni tinhloko ta mindyangu ya Vaisraele, loko va ma twa. ₃₁Kutani Finiyasi n'wana muprista Eliyazara a byela va ka Rhuveni ni va ka Gadi ni va ka Manase a ku: “Namuntlha ha swi tiva leswaku HOSI Xikwembu xi le xikarhi ka hina, hikuva n'wina a mi tshikanga ku va lavo tshembeka eka xona, kutani mi ponisile Vaisraele eka vukari bya xona.”

₃₂Kutani Finiyasi n'wana muprista Eliyazara ni varhangeri, va suka etikweni ra Giliyadi eka va ka Rhuveni ni va ka Gadi, va tlhelela eka Vaisraele etikweni ra Kanana va ri ni marungula. ₃₃Xiviko xa kona xi tsakisile Vaisraele, kutani va dzunisa Xikwembu, va tshika ku vulavula hi ta ku ya lwa nyimpi, ni ku ya herisa tiko leri va ka Rhuveni ni va ka Gadi va tshamaka eka rona. ₃₄Va ka Rhuveni ni va ka Gadi va ku: “Alitari leyi, i vumbhoni exikarhi ka hina leswaku HOSI hi xona Xikwembu.”