Swirilo 5

₁We HOSI, tsundzuka leswi

swi hi humeleleke;

languta, u vona tingana ta hina.

₂Ndzhaka ya hina yi nyikiwile vamatiko,

miti ya hina yi tekiwile hi swi-ta-swi-famba.

₃Hi hundzukile swisiwana, hi pfumala vatatana,

vamana wa hina va kota tinoni.

₄Mati lawa hi ma nwaka, ho xava kunene,

hambi ti ri tihunyi, hi ti kuma hi mali.

₅Vaxanisi va hina va hi tshikelela, va hi khayima;

hambi hi karhele, a va hi wisisi.

₆Hi tinyiketile eka Vaegipta ni Vaasiriya,

leswaku va ta hi pfuna hi swakudya swo ringana.

₇Vatata wa hina va dyohile, kambe sweswi a va ha ri kona,

kutani hina hi rhwexiwa nandzu wa swidyoho swa vona.

₈Hi fumiwa hi mahlonga,

ku ri hava loyi a hi kutsulaka emavokweni ya wona.

₉Loko hi ya eku singileni ho tisunga,

hikuva ku ni swigevenga emananga.

₁₀Dyandza ra hi vabyisa,

kutani miri wa hina wu hisa ngopfu.

₁₁Le Siyoni ni le mitini hinkwayo ya tiko ra Yuda,

vavasati ni vanhwana va pfinyiwa.

₁₂Tihosana ti boheleriwa mavoko ti hayekiwa,

vakulukumba a va ha xiximiwi.

₁₃Majaha ma sindzisiwa ku sila mavele,

vafana va dedeleka hi matshwinga ya tihunyi.

₁₄Vakulukumba a va ha yi ehubyeni,

majaha a ma ha chayi swichaya-chayani swa wona.

₁₅Ntsako wu herile etimbilwini ta hina,

ku cina ka hina ku hundzuke nkosi.

₁₆Yóò! Hi le khombyeni, hikuva hi dyohile,

kutani harhi ya ntsako yi sukile etinhlokweni ta hina.

₁₇Timbilu ta hina ta vava, mahlo ya hina ma tenga-tenga mihloti,

hikwalaho ka leswi swi hi humeleleke:

₁₈Hi rilela ntshava ya Siyoni leyi onhiweke,

laha timhungubye namuntlha ti rhendzelekaka kona.

₁₉Kambe we HOSI, ku fuma ka wena hi loku nga heriki,

vuhosi bya wena i bya minkarhi hinkwayo.

₂₀Hikwalaho ka yini u tshamela ku hi rivala,

ni ku hi tshika minkarhi hinkwayo xana?

₂₁We HOSI, hi vuyisele eka wena, leswaku hi ta va lava vuyeke eka wena hakunene;

hi tlherisele exiyin'weni lexi a hi ri eka xona khale.

₂₂Xana u nga va u hi tshikele makumu,

u nga va u hi hlundzukele hilaha ku nga heriki xana?