Ta loko va twanana ku dlaya Yesu
1A ka ha lo sala masiku mambirhi, ku nga si va ni nkhuvo wa Paseka ni wa Xinkwa lexo-ke-comela; kutani vaprista lavakulu ni vatsari a va lava ndlela yo n'wi khoma ha yona hi vutlhari leswaku va ta n'wi dlaya. 2Ntsena a va ku: “Swi nga endliwi enkhubyeni, hikuva ku nga tshuka ku pfuka dzolonga exikarhi ka vanhu.”
Ta Yesu loko a cheriwa mafurha enhlokweni eBetaniya
3Yesu a a ri eBetaniya, emutini wa Simoni lowa nhlokonho; loko a tshamile eswakudyeni, ku ta wansati la nga ni ximbitana xa ribye ro basa lexi teleke hi mafurha layo nun'hwela yo durha ngopfu, lama endliweke hi murhi wa narda leyinene. Hiloko wansati loyi a faya ximbitana, a chela mafurha enhlokweni ya Yesu. 4Van'wana va vilela swinene va ku: “Mafurha lawa ma halateriwa yini ke? 5Kasi a ma ta xavisiwa ma kuma tidenari leti tlulaka 300; mali ya kona a yi ta nyikiwa swisiwana!” Kutani va n'wi tshinya. 6Kambe Yesu a ku: “N'wi tshikeni, mi n'wi karhatela yini? Ú ndzi endlele ntirho lowo saseka. 7Loko swi ri swisiwana, mi na swona masiku hinkwawo, kutani mi kota ku swi endlela leswinene, siku mi swi rhandzaka; kasi nkarhi wa mina wo tshama na n'wina wa hela sweswi. 8Wansati loyi ú endlile leswi a swi koteke, ú totile miri wa mina hi mafurha ndzi nga si lahliwa esirheni. 9Ndzi tiyisile ndzi ri ka n'wina: Emisaveni hinkwayo laha Evhangeli leyi yi nga ta twarisiwa kona, leswi a nga swi endla swi ta vuriwa na swona, a anakanyiwa ha swona.”
Ta Yudasi loko a pfumela ku xenga Yesu
10Kutani Yudasi Iskariyota, un'wana wa lava khume na vambirhi, a ya eka vaprista lavakulu ku ya nyiketa Yesu eka vona. 11Loko va n'wi yingisile, va tsaka; va n'wi tshembisa mali; kutani a lava nkarhi lowunene wo va nyiketa yena ha wona.
Ta Yesu loko a dya Paseka na vadyondzisiwa va yena
12Hi siku ro rhanga ra nkhuvo wa Xinkwa lexo-ke-comela, ri nga leri va tlhavaka swinyimpfana swa Paseka ha rona, vadyondzisiwa va yena va n'wi vutisa va ku: “Xana u lava leswaku hi ya ku lunghisela kwihi laha u nga ta dyela kona Paseka xana?” 13Hiloko a rhuma vadyondzisiwa va yena vambirhi, a ku ka vona: “Yanani emutini, mi ta hlangana ni wanuna la rhwaleke nghotsa ya mati. N'wi landzeni. 14Laha a nghenaka kona, mi ta ku eka n'wini wa muti: ‘Mudyondzisi ú ri, yi kwihi yindlu leyi a nga ta dyela eka yona Paseka, a ri ni vadyondzisiwa va yena ke?’ 15Yena ú ta mi komba yindlu leyikulu leyi nge henhla, leyi andlaleriweke ni ku lunghisiwa; mi hi lunghisela kona.” 16Kutani vadyondzisiwa va yena va suka, va ya fika emutini, va kuma swi ri hilaha a nga va byela hakona; kutani va lunghisa Paseka.
17Loko dyambu ri perile, Yesu a fika ni lava khume na vambirhi. 18Kuteloko va tshamile, va ri karhi va dya, Yesu a ku: “Ndzi tiyisile ndzi ri ka n'wina: Un'wana wa n'wina ú ta ndzi xenga ... la dyaka na mina.” 19Kutani va sungula ku khomiwa hi gome, va n'wi vutisa ha un'we-un'we va ku: “A ndzi ri, a wu vuli mina?” 20A hlamula a ku: “I un'wana wa n'wina lava khume na vambirhi, la phemaka na mina enkambaneni. 21Loko a ri N'wana-wa-Munhu, ú ta tifambela hilaha ku tsariweke hakona ehenhla ka yena; kambe ú ni khombo munhu loyi N'wana-wa-Munhu a xengiwaka ha yena! A swi ta antswa eka munhu loyi loko onge a nga velekiwanga.”
Ta Xilalelo xa Hosi
22Loko va ha ri eku dyeni, a teka xinkwa, kutani loko a nkhensile, a xi phema, a nyika vadyondzisiwa, a ku: “Tekani; leswi i miri wa mina.” 23Kutani a teka xinwelo, a nkhensa, a va nyika xona; va nwela ka xona hinkwavo. 24A ku ka vona: “Leswi i ngati ya mina, ngati ya ntwanano, leyi halateriwaka lavo tala. 25Ndzi tiyisile ndzi ri ka n'wina, a ndzi nga ha nwi kambe swa mihandzu ya vhinya, ku ko ku fika siku leri ndzi nga ta swi nwa swi ri leswintshwa eMfun'weni wa Xikwembu.” 26Kuteloko va yimbelerile risimu, va ya eNtshaveni ya Mitlhwari.
Ta Petro loko a tivisiwa leswaku ú ta landzula Hosi
27Yesu a ku ka vona: “Hinkwenu mi ta khunguvanyeka, hikuva ku tsariwile leswaku:
“ ‘Ndzi ta ba murisi,
kutani tinyimpfu ti ta hangalaka.’
28“Kambe loko ndzi ta va ndzi pfukile eku feni, ndzi ta mi rhangela ku ya le Galeliya.” 29Petro a ku ka yena: “Hambiloko va nga khunguvanyeka hinkwavo, mina ndzi nga ka ndzi nga khunguvanyeki.” 30Yesu a ku ka yena: “Ndzi tiyisile ndzi ri ka wena, namuntlha, vusiku byebyi, nkuku wu nga si ringa kambirhi, u ta va u ndzi landzurile kanharhu.” 31Kambe Petro a tlhela a tiyisa swinene, a ku: “Hambiloko ndzi fanele ku fa na wena, ndzi nga ka ndzi nga ku landzuri.” Kutani hinkwavo va vurisa sweswo.
Ta Yesu loko a khongela eGetsemani
32Hiloko va ya exivandleni lexi vuriwaka Getsemani; kutani Yesu a ku ka vadyondzisiwa va yena: “Tshamani kwala, ndza ha ya ndzi ya khongela.” 33A famba na va Petro, na Yakobo, na Yohane, kutani a sungula ku karhateka ngopfu ni ku kanakana swinene; 34a ku ka vona: “Moya wa mina wu khomiwa hi gome lerikulu, gome ra ku fa; salani kwala, mi hiteka.” 35Kutani a ya kulenyana, a tiwisela hansi, a khongela leswaku loko swi nga endleka, nkarhi wolowo wu fambela kule na yena. 36A ku: “Abba, Tatana! Eka wena hinkwaswo swa endleka; xinwelo lexi xi tshinete kule na mina; ntsena ku nga endliwi ku rhandza ka mina, kambe a ku endliwe ku rhandza ka wena.”
37Kutani a tlhelela ka vona, a va kuma va etlele; a ku ka Petro: “Simoni, wa etlela xana? U tsandzekile ku hiteka hambi yi ri awara yin'we ntsena xana? 38Hitekani mi khongela, leswaku mi nga ngheni emiringweni hikuva moya wa swi lava, kambe nyama yi tsanile.” 39Kutani a tlhela a ya etlhelweni, a ya khongela kukotisa eku sunguleni. 40Kuteloko a tlhelele ka vona, a va kuma va etlele, hikuva mahlo ya vona a ma tika, naswona a va nga tivi leswaku va nga n'wi hlamula yini.
41Loko a vuya ra vunharhu, a ku ka vona: “Xana ma ha etlela ni ku wisa xana? Swi ringene! Nkarhi wu fikile, vonani, N'wana-wa-Munhu wa nyiketiwa emavokweni ya vadyohi. 42Sukani, mi yima, a hi yeni! Langutani, la ndzi xengaka ú le kusuhi.”
Ta Yesu loko a xengiwa ni ku khomiwa
43Hi nomu lo, loko a ha vulavula, ku humelela Yudasi, un'wana wa lava khume na vambirhi, a ta ni ntshungu wa vanhu lava hlomeke mabanga ni tinhonga, va rhumiwe hi vaprista lavakulu, ni vatsari, ni vakulukumba. 44Loyi a n'wi xengaka a a va nyikile xikombiso a ku: “Loyi ndzi nga ta n'wi ntswontswa, hi yena, n'wi khomeni mi famba na yena, mi n'wi rindza swinene.” 45Kuteloko a fika, a hatla a n'wi kongoma, a ku: “Mufundhisi!” Kutani a n'wi ntswontswa. 46Vona ke va tshambuluta mavoko, va n'wi khoma.
47Hiloko un'wana wa lava a va ri na Yesu, a hlomula banga, a ba nandza wa Muprista lonkulu, a n'wi tsema ndleve. 48Kutani Yesu a va vutisa a ku: “Leswi mi humeke mi ri ni mabanga ni tinhonga ku ta ndzi khoma, ndzo va xigevenga xana? 49Masiku hinkwawo a ndzi ri na n'wina ndzi ri karhi ndzi dyondzisa eTempeleni, kutani a mi ndzi khomanga; kambe Matsalwa ma fanele ku hetiseka!” 50Kavaloko vadyondzisiwa hinkwavo va n'wi tshika, va tsutsuma.
Ta jaha leri nga tsutsuma
51Jaha rin'wana a ri landza Yesu, ri funengele nkumba ntsena; kutani va ri khoma; 52kambe rona ri chupuka ri siya nkumba, ri tsutsuma ri nga ambalanga nchumu.
Ta Yesu loko a yisiwa ehubyeni
53Va yisa Yesu eka Muprista lonkulu, kutani vaprista lavakulu hinkwavo, ni vakulukumba, ni vatsari va hlengeletana kwalaho. 54Petro na yena a n'wi landza hi le kule, a nghena exivaveni xa Muprista lonkulu, a tshamisa ni malandza, a orha ndzilo.
55Vaprista lavakulu ni huvo hinkwayo a va lava vumbhoni byo veka Yesu enandzu leswaku va ta n'wi dlaya; kambe a va byi kumanga. 56Lavo tala a va n'wi hehla hi mavunwa, kambe vumbhoni bya vona a byi nga yelani. 57Van'wana a va yima va n'wi hehla hi ku hemba va ku: 58“Hi n'wi twile, a ku: ‘Ndzi ta nhlanhla Tempele leyi yo akiwa hi mavoko, kutani endzhaku ka masiku manharhu ndzi ta tlhela ndzi yimisa yin'wana leyi nga akiwangiki hi mavoko.’ ” 59Kambe hambi ku ri ka sweswo, vumbhoni bya vona a byi yelananga.
60Hiloko Muprista lonkulu a yima exikarhi ka vona, a vutisa Yesu, a ku: “Xana a wu hlamuli nchumu xana? Hi yihi mhaka leyi va ku hehlaka ha yona xana?” 61Kambe Yesu a miyela, a nga hlamuli nchumu. Muprista lonkulu a engeta a n'wi vutisa, a ku: “Xana hi wena Mesiya, N'wana wa Xikwembu lexi dzunekaka ke?” 62Yesu a ku: “Hi mina!
“ ‘Kutani mi ta vona N'wana-wa-Munhu
a tshamile evokweni ra xinene ra Loyi a nga ni matimba hinkwawo,
mi n'wi vona a ta hi mapapa ya le tilweni.’ ”
63Kavaloko Muprista lonkulu a handzula tinguvu ta yena, a ku: “Ha ha lavela yini timbhoni? 64Mi twile ku sandza ka yena; mi boha yini xana?” Hinkwavo va n'wi avanyisa, va ku: “Ú fanekele ku fa.”
65Van'wana va sungula ku n'wi tshwutela marha, va n'wi boha mahlo, va n'wi ba hi swibakela, va ku ka yena: “Vhumbha ke!” Malandza na wona ma famba na yena ma ri karhi ma n'wi himetela.
Ta Petro loko a landzula Yesu
66Enkarhini wolowo Petro a a ri le hansi exivaveni; kutani ku ta un'wana wa malandza ya xisati ya Muprista lonkulu; 67loko a vona Petro a ri karhi a tinyawusa endzilweni, a n'wi honolela, a ku: “Na wena, a wu ri na Munazarene loyi va nge i Yesu.” 68Kambe Petro a kaneta, a ku: “Leswi u swi vulaka, a ndzi swi tivi; ni ku swi twisisa a ndzi swi twisisi.” Kutani a huma, a ya yima ehandle kusuhi ni nyangwa. [Kavaloko nkuku wu ringa.]
69Nandza loyi wa wanhwana, loko a n'wi vona, a engeta a byela lava a va ri kwalaho, a ku: “Loyi, hi un'wana wa vona.” 70Kambe Petro a tlhela a kaneta. Endzhakunyana, lava a va ri kwalaho, va engeta va ku ka Petro: “U un'wana wa vona hakunene, hikuva u Mugaleliya na wena.” 71Hiloko a sungula ku hlambanya hi matimba a ku: “Munhu loyi mi n'wi vulaka, mina a ndzi n'wi tivi!” 72Nkarhi wolowo nkuku wu ringa ra vumbirhi. Kwalaho Petro a tsundzuka rito leri Yesu a n'wi byeleke rona, loko a te: “Nkuku wu nga si ringa kambirhi, u ta va u ndzi landzurile kanharhu.” Hiloko Petro a tlhaveka a rila.
