Filemoni 1

₁Mina Pawulo, mubohiwa hikwalaho ka Kriste Yesu, na Timotiya makwerhu, hi tsalela wena Filemoni mutirhi-kulorhi la rhandzekaka, ₂ni kereke leyi hlengeletanaka endlwini ya wena, hi tsalela na Afiya makwerhu wa xisati na Arkipo nhenha-kulorhi, hi ri:

₃Tintswalo ni ku rhula a swi ve na n'wina, swi huma eka Xikwembu Tata wa hina, ni le ka Hosi Yesu Kriste.

₄Ndzi nkhensa Xikwembu xa mina masiku hinkwawo, loko ndzi ku anakanya emikhongelweni ya mina, ₅hikuva ndzi twa ta rirhandzu ra wena eka vahlawuriwa hinkwavo ni ta ku pfumela loku u nga na kona eka Hosi Yesu. ₆Kutani ku khongela ka mina hileswaku ku pfumela ka wena loku u ku avelaka van'wana, ku nga yisa emahlweni vutivi bya hinkwaswo leswinene leswi nga swa hina eka Kriste. ₇Hikuva ndzi kumile ku tsaka lokukulu ni ku chaveleriwa swinene hi rirhandzu ra wena makwerhu, naswona timbilu ta vahlawuriwa ti kumile matimba lamantshwa hikwalaho ka wena.

₈Hikokwalaho, hambileswi eka Kriste ndzi titwaka ndzi ri ni matimba ya ku ku lerisa ku endla leswi lavekaka, ₉ndzi hlawula ku ku kombela hi ndlela ya rirhandzu, mina Pawulo ndzi nga munhu la dyuhaleke, kambe naswona ndzi nga mubohiwa sweswi, hikwalaho ka Kriste Yesu. ₁₀Ndzi ri, ndza ku kombela hikwalaho ka n'wananga Onesima, loyi ndzi nga hundzuka tata wa yena, sweswi ndzi nga ekhotsweni, ₁₁loyi khale a a nga ku pfuni nchumu, kambe sweswi ú hundzukile la pfunaka ngopfu, eka mina na wena.

₁₂Ndzi n'wi tlherisele eka wena, ku ri ku ku rhumela mbilu ya mina ya xiviri. ₁₃A ndzi ta va ndzi tsakile ku n'wi khoma a tshama na mina kwala, leswaku a ta ndzi tirhela, a siva wena enkarhini wa ku bohiwa ka mina ekhotsweni hikwalaho ka Evhangeli. ₁₄Kambe a ndzi lavanga ku endla nchumu ehandle ka mpfumelelo wa wena, leswaku tintswalo ta wena ti nga kombiwi hi ku sindzisiwa, kambe ku ri hi ku titwa ka wena. ₁₅Kumbexana leswi endleke leswaku Onesima a susiwa nkarhinyana le ka wena, hileswaku u ta tlhela u va na yena hi masiku, ₁₆a nga ha ri hlonga, kambe a ri la tlulaka hlonga hi xiyimo, a va makwavo la rhandzekaka; eka mina, ú rhandzeka swinene, kambe eka wena, ú ta rhandzeka ku tlula sweswo, a ri munhu, ni makwenu eHosini.

₁₇Hikokwalaho, loko u ndzi vona ndzi ri mutirhi-kuloni, n'wi amukele tanihi loko u amukela mina. ₁₈Loko a ku dyoherile hi swin'wana, kumbe a ri ni nandzu wa swin'wana eka wena, swi lave eka mina. ₁₉Mina Pawulo, ndzi tsala leswi hi ndzexe, hi xandla xa mina, ndzi ri: “Ndzi ta hakela!” — ehandle ka ku vula leswaku wena hi xiviri, u leswi u nga swona hikwalaho ka mina. ₂₀Ina makwerhu, ndzi lava ku vuyeriwa hi tlhelo ra wena eHosini. Nyika mbilu ya mina matimba lamantshwa ya ka Kriste.

₂₁Hi ku tshemba ku yingisa ka wena, ndza ku tsalela ndzi ri karhi ndzi tiva leswaku u ta endla ku tlula ni leswi ndzi swi vulaka. ₂₂Naswona, ndzi lunghisele yindlu yo tshama eka yona, hikuva ndzi ni ku tshemba leswaku, hikwalaho ka mikhongelo ya n'wina hinkwenu, ndzi ta tlheriseriwa eka n'wina.

₂₃Epafra, mubohiwa-kulorhi hikwalaho ka Kriste Yesu, wa ku rungula. ₂₄swi tano na Marka, na Aristarko, na Demasi, na Luka, va nga vatirhi-kulorhi: Na vona va ku rungula.

₂₅Tintswalo ta Hosi Yesu Kriste a ti ve ni mimoya ya n'wina.