Swivuriso 16

₁Munhu a nga endla makungu,

kambe HOSI Xikwembu hi xona

lexi nga ni rito ro hetelela.

₂Hinkwaswo leswi munhu a swi endlaka, ú swi vona swi tengile,

kambe HOSI Xikwembu xi kambela miehleketo ya yena.

₃Loko u endla xilo, kombela HOSI Xikwembu xi ku pfuna,

kutani makungu ya wena ma ta katekisiwa.

₄Hinkwaswo leswi HOSI Xikwembu xi swi tumbuluxeke, swi ni lomu swi kongomeke kona,

hambi va ri lavo homboloka, va kongoma esikwini ra khombo.

₅HOSI Xikwembu xi nyenya un'wana ni un'wana loyi a tikurisaka,

munhu wo tano a nge poni, ú ta biwa hakunene.

₆Munhu loyi a nga ni tintswalo, a tlhela a tshembeka, HOSI Xikwembu xa n'wi rivalela milandzu ya yena,

naswona loyi a xi chavaka, ú kota ku papalata leswo biha.

₇Munhu loyi HOSI Xikwembu xi tsakelaka vutomi bya yena,

xi endla leswaku hambi va ri valala va yena, va hanyisana na yena hi ku rhula.

₈Ku va ni swilo switsongo leswi u swi kumeke hi tindlela letinene,

swi tlula ku va ni xuma lexo tala lexi u xi kumeke hi tindlela leto biha.

₉Munhu a nga endla makungu ya lomu a yaka kona,

kambe HOSI Xikwembu hi xona xi nga ta n'wi komba ndlela.

₁₀Leswi hosi ya tiko yi vulaka swona, yi lo hlavuteriwa,

loko yi tsema mhaka, a yi hoxi.

₁₁Mimpimo leyi nga yona, i ya HOSI Xikwembu,

hinkwayo yi endliwile hi xona.

₁₂Emahlweni ka tihosi, swa yila ku endla leswo biha,

hikuva vuhosi byi tiyisiwa hi leswo lulama.

₁₃Tihosi ti tsakela lava vulavulaka ntiyiso,

ti rhandza lava vulaka leswi nga swona.

₁₄Vukari bya hosi byi nga vanga rifu,

munhu wo tlhariha ú ringeta ku yi rheleta mbilu.

₁₅Loko hosi yi n'wayitela, ku ni vutomi,

ku tsakeriwa hi yona, swi fana ni mapapa lama tisaka mpfula ya ximun'wana.

₁₆Ku kuma vutlhari, swi tlula ku kuma nsuku,

ku hlawula ku twisisa, swi tlula ku hlawula silivhere.

₁₇Gondzo ra lavo lulama ri papalata leswo biha,

hinkwavo lava fambaka eka rona, va ponisa vutomi bya vona.

₁₈Ku tikurisa, swi vitana khombo,

manyunyu ma vangela munhu ku wa.

₁₉Swa antswa ku titsongahata, u hanya ni swisiwana,

ku ri ni ku avelana ni vanhu lavo tikurisa swilo leswi va swi phangheke.

₂₀Munhu loyi a amukelaka switsundzuxo, ú ta humelela;

loyi a tshembaka HOSI Xikwembu, ú ta kuma minkateko.

₂₁Munhu loyi a tlhariheke, u ta vuriwa “la twisisaka”;

hi ku tsokombela ka marito ya yena, ú kota ku khorwisa vanhu.

₂₂Loyi a nga ni vutlhari, ú ni xihlovo xa vutomi,

kambe swiphukuphuku swi biwa hikwalaho ka vuphukuphuku bya swona.

₂₃Munhu wa miehleketo ú kota ku vulavula hi vutlhari,

a khorwisa van'wana hi marito ya yena.

₂₄Marito lama tsakisaka ma fana ni xihlenge xa vulombe,

lexi nandzihaka enon'weni, xi tlhela xi tiyisa miri.

₂₅Ku ni ndlela leyi munhu a yi vonaka yi lulamile,

kasi eku heteleleni, yi yisa eku feni.

₂₆Munhu loyi a tirhaka, ú susumetiwa hi ndlala,

i khwiri leri ri n'wi sindzisaka.

₂₇Loyi a nga pfuniki nchumu, ú luka mano layo biha,

leswi humaka enon'weni wa yena, i malangavi ya ndzilo.

₂₈Munhu wa mbilu yo biha, ú pfuxa madzolonga,

loyi a hlevaka, ú lwisa vanghana.

₂₉Munhu wa tihanyi, ú kucetela muakelani wa yena,

a n'wi yisa etindhawini leto biha.

₃₀Loyi a tshunyetaka hi mahlo, u le ku lukeni ka mano layo biha,

loyi a lumaka nomo, ú hetile makungu ya yena layo homboloka.

₃₁Timpfi i harhi yo dzuneka,

leyi kumiwaka hi vanhu va mahanyelo lamanene.

₃₂Loyi a hlwelaka ku hlundzuka, ú tlula nghwazi,

munhu la kotaka ku tikhoma, ú tlula loyi a hlulaka miti.

₃₃Vanhu va nga vutisa timhaka hi ku hoxa vuhlolotwana,

kambe nhlamulo, yi tiva hi HOSI Xikwembu ntsena.