Swivuriso 23

₁Loko u dya na hosi,

xiyaxiya leswi vekiweke emahlweni ka wena,

₂u nga dyi hi makolo,

hambi ndlala yi ku khome ngopfu;

₃u nga naveli ngopfu swakudya leswo nandziha,

hikuva swi nga ku kanganyisa.

₄Tlhariha u tikhoma,

u nga tidlaya-dlayi u hlongorisa rifuwo;

₅rifuwo a ri hlweli ku nyamalala,

ri hatla ri mila timpapa,

ri haha ku fana ni gama, ri ya henhla.

₆U nga tshuki u dya xinkwa xa munhu wo tsonana,

swakudya swa yena leswo nandziha, u nga swi naveli,

₇hikuva ú pimile embilwini leswi a lavaka leswaku u dya swona;

hi nomo, wa vula a ku: “Dyana, u tlhela u nwa!”

kambe a nga ku tsakeli.

₈Swakudyanyana leswi u nga ta swi dya, u ta swi hlanta,

kutani u ta va u tlangile hi marito ya wena ya ku nkhensa.

₉U nga tikarhateli ku dyondzisa xiphunta,

hikuva miehleketo ya wena leyinene, xi nge yi amukeli.

₁₀U nga tshuki u hundzuluxa mindzilekana leyi vekiweke khale,

kumbe ku tekela swisiwana masimu ya swona,

₁₁hikuva Mulweri wa swona ú ni matimba,

ú ta yima na swona, a swi lwela.

₁₂Tikarhatele ku yingisa swiletelo,

rhiya ndleve a amukela marito ya vutivi.

₁₃U nga tshuki u chava ku tshinya n'wana,

hikuva nkhavi a wu dlayi munhu;

₁₄loko u n'wi ba hi nkhavi,

u ta n'wi ponisa ku ya exivandleni xa vafi.

₁₅N'wananga, loko u nga va ni vutlhari,

ndzi ta tsaka ngopfu;

₁₆loko u vulavula leswi nga swona,

ndzi ta va ni ntsako lowukulu embilwini.

₁₇Vadyohi, u nga va naveli,

kambe minkarhi hinkwayo, chava HOSI Xikwembu,

₁₈kutani u ta vona swa nkarhi lowu taka,

ku tshemba ka wena ku nge heleli empfhukeni.

₁₉N'wananga, yingisa, u ta tlhariha,

kongomisa miehleketo ya wena endleleni leyinene.

₂₀U nga tshuki u tolovelana ni swidakwa,

kumbe lava dyaka nyama hi makolo,

₂₁hikuva xidakwa ni munhu wa makampfu va ta hundzuka swisiwana,

vurhongo byi ta va ambexa switlakati.

₂₂Yingisa tata wa wena, hikuva hi yena la ku kombeke misava,

ni mana wa wena, loko a dyuharile, u nga n'wi nyenyi.

₂₃Xava ntiyiso, u nga wu xavisi,

xava vutlhari, ni swiletelo, ni ku twisisa.

₂₄Ku va ni n'wana la lulameke, i ntsako lowukulu eka mutswari;

ni loyi a velekeke n'wana wo tlhariha, ú tinyungubyisa hi yena.

₂₅Tsakisa tata wa wena ni mana wa wena;

loyi a ku mamiseke, n'wi nyike ntsako.

₂₆N'wananga, ndzi yingise swinene,

u tekelela leswi ndzi swi endlaka,

₂₇hikuva vavasati va tinghwavava kumbe madlakuta

va nga ku nghenisa ekhombyeni lero chavisa:

₂₈Va tshamela vavanuna lomu tindleleni ku fana ni swigevenga,

kutani va andzisa ntsengo wa vavanuna lava nga tshembekiki.

₂₉Ku ni vanhu lava tshamelaka ku konya ni ku gomela,

vanhu va vuntswaka, lava nga ku vileleni minkarhi hinkwayo,

lava kumaka timbanga swi nga fanelanga,

lava tshamaka va tshwukile mahlo! Xana vanhu lava, i vamani xana?

₃₀Volavo i vanhu lava dzumbaka ebyalweni,

lava minkarhi hinkwayo va hlotaka lebyo bava.

₃₁Ku tshwuka ka vhinyo, ni ku vangama ka yona exinwelweni,

ni ku nandziha ka yona enon'weni,

swi nga ku kanganyisi,

₃₂hikuva eku heteleleni, vhinyo yi luma ku fana ni nyoka,

yi godya ku fana ni mhiri.

₃₃Mahlo ya wena ma ta vona swilo,

u ta vulavula swo huma endleleni.

₃₄U ta twa wonge u lo papama emagandlatini ya lwandle,

kumbe u lo etlela exihondzweni xa ngalava.

₃₅U ta ku: “Va ndzi himile, kambe a ndzi twanga ku vava,

va ndzi bile, kambe a ndzi swi vonanga.

Ri ta xa rini,

ndzi ta ya susa babalaza!”