Swivuriso 8

₁Vutlhari bya huwelela,

ku twala rito ra ku twisisa leri tlakukeke.

₂Byi yima eswitsungeni etlhelo ka magondzo,

ni le mahandzeni ya tindlela bya kumeka.

₃Byi ya ni le tindleleni leti nghenaka emutini,

byi yima etlhelo ka tinyangwa, byi huwelela byi ku:

₄“N'wina vanhu hinkwenu, ndza mi rhamba,

ndzi vitana un'wana ni un'wana wa n'wina.

₅N'wina mi kalaka mano, tlharihani,

dyondzani ku anakanya, n'wina swiphunta.

₆Yingisani, hikuva ndzi ni mhaka ya ntikelo,

leswi ndzi nga ta swi vula, swi tiyile.

₇Leswi humaka enon'wini wa mina i ntiyiso ntsena,

eka mina swa yila ku vulavula leswo homboloka.

₈Hinkwaswo leswi ndzi swi vulaka swi lulamile,

a ku na xin'we xa swona lexi gombonyokeke kumbe ku huma endleleni;

₉eka loyi a twisisaka, marito ya mina ma twala swinene,

ni ka loyi a nga ni vutivi, ma le rivaleni.

₁₀Ematshan'wini ya silivhere, hlawula swiletelo swa mina,

ni vutivi ematshan'wini ya nsuku lowunene,

₁₁hikuva vutlhari byi tlula swilo swo bomba ha swona,

hinkwaswo leswi munhu a swi lavaka swi nga ka swi nga byi tluli.

₁₂“Mina vutlhari, ndzi pfula miehleketo,

ndzi kumiwa hi loyi a nga ni vutivi ni mianakanyo leyinene.

₁₃Loyi a chavaka HOSI Xikwembu ú venga leswo biha.

Ku tikurisa, ni ku tiarisa, ni mahanyelo layo biha, ni ku vulavula mavunwa, ndza swi venga.

₁₄Ndzi ni switsundzuxo ni mianakanyo leyinene,

ku twisisa ni matimba i swa mina.

₁₅Tihosi ti fuma hi matimba ya mina,

vafumi va veka milawu leyinene hikwalaho ka mina.

₁₆Hinkwavo lava fumaka hi ku lulama, hambi tindhuna kumbe varhangeri,

va pfuniwa hi mina.

₁₇Ndzi rhandza lava va ndzi rhandzaka,

lava fambaka va ndzi lava, va ndzi kuma.

₁₈Rifuwo ni ku dzuneka swi le ka mina,

hi mina ndzi nga ni xuma lexi nga boriki ni minkateko.

₁₉Mihandzu leyi kumekaka eka mina yi ni nkoka ku tlula nsuku lowo tenga,

ntshovelo lowu ndzi wu nyikaka wu tlula silivhere leyo saseka.

₂₀Gondzo leri ndzi fambaka ha rona ri yisa eka leswo lulama,

i ndlela leyi kongomaka emilawini leyinene.

₂₁Ndzi fumisa lava va ndzi rhandzaka,

ndzi tata vuhlayiselo bya xuma xa vona.”

₂₂“HOSI Xikwembu xi rhangile xi endla mina xi nga si tumbuluxa nchumu,

ndzi va ntirho wa xona wo sungula;

₂₃ndzi nyikiwile xivumbeko khale

ni misava yi nga si va kona.

₂₄Mina ndzi velekiwile, xidziva lexikulu

ni swihlovo leswi pfelelaka mati swi nga si tumbuluxiwa.

₂₅Loko tintshava ni swintshabyana swi simekiwa,

mina a ndzi velekiwile khale;

₂₆ndzi vile kona HOSI Xikwembu xi nga si endla misava ni swimila,

hambi ritshuri rinene a ri nga si va kona.

₂₇Mina a ndzi ri kona loko HOSI Xikwembu xi vamba matilo,

ni loko xi ba xirhendzevutana emakumu ka malwandle.

₂₈A ndzi ri kona loko xi hayeka mapapa empfhukeni,

ni loko swihlovo swa xidziva lexikulu swi sungula ku pfelela hi matimba.

₂₉Loko HOSI Xikwembu xi bela lwandle ndzilekana leswaku mati ma nga tluli nawu wa xona,

ni loko xi veka masungulo ya misava,

₃₀mina a ndzi lo gèè, etlhelo ka xona, ku fana ni n'wana,

masiku hinkwawo a ndzi xi tsakisa,

ndzi tihuhela emahlweni ka xona.

₃₁A ndzi tiphina emisaveni ya xona,

ndzi titsakela ni vanhu hinkwavo.

₃₂“N'wina vana, ndzi yingiseni:

Ku katekile lava hlayisaka switsundzuxo swa mina.

₃₃Yingisani swiletelo, mi ta tlhariha,

mi nga tshuki mi swi ba hi makatla.

₃₄Ku katekile munhu loyi a ndzi yingisaka,

loyi a tshamaka a langutile enyangweni ya mina,

a nghena emutini wa mina minkarhi hinkwayo.

₃₅Loyi a ndzi kumeke, ú kumile vutomi,

kutani HOSI Xikwembu xi ta n'wi tsakela;

₃₆kambe loyi a nga ndzi kumiki, wo tivavisa,

hinkwavo lava va ndzi vengaka, vo lava rifu.”