Pisalema ya 103

₁Ndzi lava ku nkhensa HOSI Xikwembu ndzi vuyelela,

ndzi tlangela vito ra xona lero hlawuleka hi mbilu ya mina hinkwayo.

₂Ina, ndzi lava ku nkhensa HOSI Xikwembu,

mintirho ya xona leyinene ndza yi tsundzuka hinkwayo.

₃Hi xona xi ndzi rivalelaka swidyoho hinkwaswo,

xi horisaka mavabyi ya mina hinkwawo.

₄Hi xona xi kutsulaka vutomi bya mina esirheni,

xi ndzi rhendzela hi rirhandzu ni tintswalo.

₅Xi ndzi phamela leswinene, kutani ndzi tiyile;

vuntshwa bya mina bya pfuxetiwa, onge ndzi ngo haha kukota gama.

₆HOSI Xikwembu xi lwela hinkwavo lava xanisiwaka,

xa va sirhelela.

₇Xi tivisile Muxe makungu ya xona,

mintirho ya xona ya matimba, xi yi kombile Vaisraele.

₈HOSI Xikwembu xi ni tintswalo, xa tsetselela,

xi tele rirhandzu, xi hlwela ku hlundzuka.

₉A xi holoveli vanhu minkarhi hinkwayo,

a xi tshameli ku va karihela.

₁₀A xi hi banga hi mpimo wa swidyoho swa hina,

a xi hi rihisanga hi ku ya hi milandzu ya hina.

₁₁Hilaha matilo ma tlulaka misava hi ku tlakuka ni vukulu,

na rona rirhandzu ra Xikwembu i rikulu eka lava va xi chavaka.

₁₂Hilaha vuxa byi hambaneke kule hakona ni vupeladyambu,

Xikwembu xi vekisa sweswo ku dyoha ka hina kule na hina.

₁₃Xi tsetselela lava va xi chavaka

ku fana na tatana la tsetselelaka vana va yena,

₁₄hikuva xa swi tiva leswaku hi endliwe hi yini,

a xi rivali leswaku hi ntshuri ntsena!

₁₅Masiku ya ku hanya ka munhu ma fana ni byanyi,

kumbe swiluva swa nhova loko swi balekile:

₁₆Loko moya wu hunga ehenhla ka swona,

swa vuna swi nyamalala, ndhawu ya swona yi nga ha tiveki.

₁₇Kasi rirhandzu ra HOSI Xikwembu rona a ri ri kona na khale,

ra ha ta va kona hilaha ku nga heriki.

Xikwembu xi lwela lava va xi chavaka,

xi tshembeka ku ya fika eka vatukulu va vona hinkwavo,

₁₈loko va hlayisa ntwanano wa xona,

va nga rivali ku endla leswi xi va lerisaka swona.

₁₉HOSI Xikwembu xi vekile xiluvelo xa xona ematilweni,

vuhosi bya xona byi le henhla ka swilo hinkwaswo.

₂₀Nkhensani HOSI Xikwembu n'wina tintsumi ta xona,

n'wina tinhenha ta matimba

leti yingisaka rito ra xona ti hanya ha rona.

₂₁Nkhensani HOSI Xikwembu n'wina hinkwenu mavandla ya xona,

n'wina mi xi tirhelaka ni ku endla ku rhandza ka xona.

₂₂Nkhensani HOSI Xikwembu n'wina mintirho ya xona hinkwayo,

etindhawini hinkwato leti nga hansi ka mfumo wa xona.

Na mina ndzi lava ku nkhensa HOSI ndzi vuyelela.