Pisalema ya 113

₁Dzunisani HOSI!

N'wina malandza ya HOSI Xikwembu, xi dzuniseni,

dzunisani vito ra xona!

₂A ku tlangeriwe vito ra xona

ku sukela namuntlha ni minkarhi hinkwayo.

₃Vito ra HOSI a ri dzunisiwe

ku sukela evuxeni ku ya fika evupeladyambu.

₄HOSI Xikwembu xi fuma vanhu va matiko hinkwawo,

ku dzuneka ka xona ku tlula matilo hi vukulu.

₅Xana HOSI Xikwembu xa hina xi nga ringanisiwa na mani xana?

Vutshamo bya xona byi le henhla-henhla;

₆loko xi languta matilo kumbe misava,

xo korhama kunene.

₇Xi humesa swisiwana entshurini,

xi pfuxa vapfumari etaleni,

₈xi va tshamisisa ni tinganakana,

va nga varhangeri va tiko ra xona.

₉Wansati loyi a a ri mhika, xi n'wi nyika ku tshamiseka emutini,

ni ntsako wo veleka vana.

Dzunisani HOSI!