Pisalema ya 148

₁Dzunisani HOSI!

Dzunisani HOSI Xikwembu, n'wina swivumbiwa swa le tilweni,

xi dzuniseni eswivandleni swa le henhla-henhla.

₂Xi dzuniseni n'wina hinkwenu tintsumi ta xona,

n'wina hinkwenu mavandla ya xona, xi dzuniseni.

₃Wena dyambu na wena n'weti xi dzuniseni,

xi dzuniseni n'wina hinkwenu tinyeleti leti vangamaka.

₄Xi dzuniseni n'wina matilo ya le henhla-henhla,

kun'we na n'wina mati lama nge henhla matilweni.

₅Swilo leswi hinkwaswo a swi dzunise vito ra HOSI Xikwembu,

hikuva swi tumbulukile hi ku lerisa ka xona,

₆xi swi vekile etindhawini ta swona leti nga hundzukiki,

xi swi vekela milawu leyi swi tsandzekaka ku yi tlula.

₇Dzunisani HOSI Xikwembu, n'wina swivumbiwa swa laha misaveni,

xi dzuniseni n'wina swiharhi leswikulu swa le lwandle na n'wina hinkwenu swidziva swa kona,

₈wena ndzilo na wena xihangu, wena gamboko na wena gwitsi,

hambi a ri wena xidzedze, wena u endlaka ku rhandza ka xona.

₉Tintshava ni swintshabyana hinkwaswo,

mirhi ya mihandzu na swona swihlahla,

₁₀swiharhi ni swifuwo hinkwaswo,

swikokovi ni tinyanyana, hinkwaswo a swi dzunise HOSI Xikwembu.

₁₁Xi dzuniseni n'wina tihosi ta la misaveni na n'wina hinkwenu mi akeke eka yona,

n'wina tihosana na n'wina hinkwenu vafambisi,

₁₂n'wina majaha na n'wina vanhwana,

n'wina lavakulu na n'wina lavatsongo.

₁₃Hinkwenu, dzunisani HOSI Xikwembu,

hikuva vito ra xona hi rona ntsena ri nga rikulu,

ku dzuneka ka xona ku vonaka etilweni ni laha misaveni.

₁₄Xi tiyisile Vaisraele vanhu va xona, vona hinkwavo lava va xi tshembaka,

kutani va tidzunisa ha swona, hikuva xi le kusuhi na vona.

Dzunisani HOSI!