Pisalema ya 22

₁Xikwembu xanga, Xikwembu xanga, u ndzi tshikele yini!

Ndzi le ku konyeni, ndzi kombela ku pfuniwa;

u yimela yini kule na mina xana?

₂Xikwembu xanga, ndzi huwelela ka wena ninhlekanhi, kambe a wu hlamuri;

ndzi huwelela nivusiku, kambe a ndzi kumi ku wisa.

₃Hambiswiritano, wena u Muhlawuleki

loyi Vaisraele va dzunisaka vuhosi bya yena.

₄Vatata wa hina a va ku tshemba;

u va kutsurile, hikuva a va tshemba wena ntsena.

₅Va huwelerile eka wena, kutani u va kutsula;

a va khomiwanga hi tingana, hikuva a va tshemba wena.

₆Kambe mina a ndzi munhu wa nchumu, ndzo va xivungu;

vanhu va ndzi monya, va ndzi langutela hansi.

₇Hinkwavo lava va ndzi vonaka, va ndzi hlekula,

va minyula, va hlakahla ni tinhloko, va ku:

₈“Wena u ri u titshembele HOSI Xikwembu!

Loko hakunene xi ku tsakela, a xi ku ponise, xi ku kutsula.”

₉Hi wena u ndzi humeseke ekhwirini ra manana,

u ndzi hlayisa exifuveni xa yena.

₁₀Ku sukela siku leri ndzi nga velekiwa ha rona, ndzi nyiketiwile eka wena;

u vile Xikwembu xanga ku sukela evuhlangini bya mina.

₁₁Khombo ri le kusuhi, hikokwalaho u nga vi kule na mina,

hikuva ku hava un'wana loyi a nga ndzi pfunaka.

₁₂Valala lava va ndzi rhendzeleke, va tele,

va kota tinkuzi letikulu to chavisa ta le Baxani;

₁₃va pfula milomo ya vona kukota tinghala leti bongaka,

leti lavaka ku ndzi handzulela.

₁₄Matimba ya mina ma hela kukota mati lama halatiweke,

marhambu ya mina hinkwawo ma gudla-gudla,

ni mbilu ya mina yi fana ni mafurha

lama n'okisiwaka endzilweni.

₁₅Nkolo wa mina wu omile kukota xirhengele,

ririmi ri namarhela emalakeni;

we Hosi, u ndzi tsongahatile ku yisa eku feni.

₁₆Ntshungu wa lavo homboloka wu ndzi rhendzele kukota timbyana,

wu ndzi handzulele milenge ni mavoko.

₁₇Ndzi ondzile, ndzi lo sala timbambu ntsena,

valala va ndzi languta hi ku ndzi honokela;

₁₈va avelana swiambalo swa mina

hi ku hoxa vuhlolotwana.

₁₉We HOSI, u nga yimi kule na mina!

Hatlisa u ta ndzi lamulela, wena u ndzi nyikaka matimba.

₂₀Ndzi ponise enyimpini leyi,

u kutsula vutomi bya mina emilon'weni ya timbyana leti.

₂₁Ndzi ponise emin'waleni ya tinghala,

loko ndzi ri etimhondzweni ta tinyarhi, ndzi lamulele!

₂₂Ndzi ta tivisa vamakwerhu leswaku hi wena mani,

ndzi ta ku dzunisa exikarhi ka ntshungu ndzi ku:

₂₃“N'wina lava chavaka HOSI Xikwembu, xi dzuniseni,

xi tlangeleni, n'wina hinkwenu va ka Yakobo,

mi xi komba xichavo, n'wina hinkwenu Vaisraele,

₂₄hikuva a xi solanga loyi a nga nhlomulweni,

kumbe ku n'wi honisa;

a xi n'wi fularhelanga,

kambe xi n'wi yingisile loko a huwelela eka xona.”

₂₅Hi wena u ndzi nyikaka matimba ya ku ku dzunisa exikarhi ka ntshungu lowukulu,

emahlweni ka lava va ku chavaka, ndzi ta ku humesela magandzelo lawa ndzi nga tiboha ku ma humesa.

₂₆Swisiwana swi ta dya swi xurha;

lava va ku chavaka, va ta ku dzunisa we HOSI,

va engeteriwa masiku ya ku hanya.

₂₇Vanhu vo huma ematikweni hinkwawo va ta tsundzuka HOSI Xikwembu, va ta eka xona,

vanhu va tinxaka hinkwato va ta xi nkhinsamela.

₂₈Vuhosi hinkwabyo i bya xona,

hi xona xi fumaka vanhu hinkwavo.

₂₉Vanhu hinkwavo va misava lava tikurisaka,

va ta tsongahatiwa emahlweni ka N'wini wa hinkwaswo.

Hinkwavo lava faka va ta n'wi nkhinsamela,

va nga lava hlulekeke ku hlayisa vutomi bya vona.

₃₀Vatukulu va vona va ta n'wi tirhela;

vanhu va minkarhi leyi taka, va ta byeriwa ta yena,

₃₁lava nga si velekiwaka va ta tivisiwa

leswaku hi yena la kutsuleke Vaisraele.