Pisalema ya 30

₁Ndzi ta ku twarisa we HOSI, hikuva u ndzi tsavurile exidziveni,

a wu pfumelanga leswaku valala va mina va tsaka loko ndzi ri ekhombyeni.

₂We HOSI Xikwembu xanga, ndzi huwelerile eka wena,

kutani u ndzi horisile emavabyini.

₃We HOSI, u ndzi humesile exivandleni xa vafi;

a ndzi ri karhi ndzi rhelela ndzi ya esirheni, kambe wena u ndzi hanyisile.

₄Yimbelelani mi dzunisa HOSI, n'wina lava mi yi tshembaka,

yi tlangeleni mi twarisa vito ra yona lero hlawuleka,

₅hikuva vukari bya yona i bya nkarhinyana ntsena,

kambe minkateko ya yona i ya vutomi hinkwabyo.

Nimadyambu i mihloti,

loko ri xa i minkulungwana!

₆Loko ndza ha titwa ndzi tiyile,

a ndzi ku ndzi nge khuguriwi ndzi wa ni siku ni rin'we.

₇We HOSI, a wu ndzi katekisile, ndzi tiya kukota ntshava,

kambe siku u nga ndzi fularhela, ndzi khomiwe hi ku chava lokukulu.

₈Kutani ndzi ku huwelerile we HOSI,

ndzi kombela leswaku u ndzi tsetselela we N'wini wanga, ndzi ku:

₉“Loko ndzi fa, ndzi rhelela ndzi ya ekheleni ra vafi,

xana swi ta ku pfuna yini ke?

Xana loyi a feke a tlhelela entshurini, a nga ha ku dzunisa,

a twarisa ku tshembeka ka wena xana?

₁₀We HOSI, ndzi yingise u ndzi tsetselela,

tana u ta ndzi pfuna, we HOSI.”

₁₁Ku rila ka mina u ku hundzurile ku tsaka,

u ndzi hluvurile swiambalo leswo khwaxa swa nkosi,

u ndzi ambexa swiambalo swa nkhuvo.

₁₂Hikokwalaho, ndzi ta ku dzunisa hi mbilu ya mina hinkwayo, ndzi nga ka ndzi nga miyeli;

We HOSI, Xikwembu xanga, ndzi ta ku tlangela hilaha ku nga heriki.