Pisalema ya 46

₁Xikwembu i khokholo ra hina leri tiyeke;

vanhu lava nga khombyeni, xi hatla xi va pfuna.

₂Hikokwalaho hi nga ka hi nga rhurhumeli, hambiloko misava yi nga hundzuka,

kumbe tintshava ti ninginika ti wela elwandle;

₃hambiloko magandlati ma pfuma ma phupha ni khuvi,

ni loko tintshava ti tsekatseka hi ku kariha ka wona, hi nga ka hi nga chavi.

₄Ku ni nambu lowu khulukaka wu tisaka ntsako emutini wa Xikwembu;

muti lowu i ndhawu ya Loyi a nge henhla-henhla, wu hlawulekile ku tlula tindhawu hinkwato.

₅Xikwembu xi le mutini wa kona, a ku na loyi a nga wu ninginisaka,

hikuva Xikwembu xi ta wu sirhelela ka ha ri mpundzu.

₆Matiko ma ba huwa, mimfumo yi tlula-tlula,

kambe loko Xikwembu xi tlakusa rito, misava ya n'oka.

₇HOSI ya matimba hinkwawo yi na hina,

khokholo ra hina i Xikwembu xa va ka Yakobo.

₈Tanani mi ta hlalela mintirho ya HOSI Xikwembu!

Xi endlile swilo leswo hlamarisa laha misaveni:

₉Xi siverile tinyimpi ku ya fika evugimamusi,

vurha xi tshovile, xi bvinyile ni matlhari;

makalichi ya nyimpi xi ma hisile!

₁₀Xikwembu xi ri: “Tshikani matlhari! Swi tiveni leswaku hi mina Xikwembu.

Ndzi le henhla ka vanhu hinkwavo,

misava hinkwayo yi fuma hi mina.”

₁₁HOSI ya matimba hinkwawo yi na hina,

khokholo ra hina i Xikwembu xa va ka Yakobo.